Ronjoy Brahma

Gold Star - 35,125 Points (2 November 1995- / Amteka (Chirang) /Assam, India)

निनिमा (11) : हांमाया लासैयैनो सोँबावो - Poem by Ronjoy Brahma

हांमाया लासैयैनो सोँबावो-
' मुलाम्फायानो दाजाथोँ,
थेवबो बाजै नोँनि सिनायथि,
नोँनि गुमुर आंनो एसे होनांगोन बाजै।
फ्लिस ना बाजै, एसे खिन्थाथार! '
निनिमाया सिरि स्राय जायो,
बियो मिनिनाय गैयै जालाङो,
हरखाब दावबायनाय अखोरांनि जोमैया
बिनि मोखांखौ जेन' साग्लोबदोँसै।
मा बुंगोन-
मा फिन्नाय होगोन-
सान्नानै आगोर मोनैबादि बियो,
थेवबो गोलाव हां हगारनानै
हांमानि अख्राखौ नुनानै बुङो बियो-
' खोनासं बिदिब्ला नानि-
आंनि दुखु गोनां जारिमिन,
आंनि हांमा गोनां जिउ सल'खौ-
आं खांजानाय सासे सोरनिबा फिसाजो,
जाय आंखौ खांदों,
जाय आंखौ फेदेरदोँ,
जाय आंखौ फोरोँदोँ.
बिसोरनि अनगायै आंहा रावबो गैया।
ना जोनोमगिरि बिमा बिफा,
ना जाथि बाय बाहागि,
थै मोनसेनिबो आंहा आंगो गैया,
दंङब्ला आं दिनैसिम नाथाय मिथिया! '
बेखिनियावनो निनिमाया सिरि थायो।
नाथाय सिरियैनो खोनासंना थानाय हांमाया
हरखाब हांमा थब बुङो-
' बिदिब्ला बाजैया- '
गासैबो दान्दिसे सम सिरि,
गाव-गाबागाव उल्टां फाल्थां मोखां,
मिथिँगानि हायना महराव
जानांगौ बिसोर गोमोहाबदोँ।
समायना रमायना उजिरनि न'खौ
मेगन बोनो हानाय बे देराखौ
नायनानै गोमो हाबदोँ निनिमाया।
बियो गोसोआव खेँ खेँ मोन्दोँ
बियो माबा बुंगौ बुंगौ।
सम दोरोदगासे बारलांनायनि उनाव
अनथाव-बाथाव बियो हांमानि मोखांआव नायना सोँदोँ-
' बै एसेग्राब समायना
गाबजोँ साजायनाय देरा
नायथाव-थाव नायबाय थाथाव
गोथां न'आ सोरनि नानि? '
' बांगालनि,
बांगाल उजिर आलिनि।
आय आफामोन बुंनाय बादिब्ला
बेयो गोदो बर' बिरफुं माहाजोननिमोननो।'
' बर'नि,
बिरफुं माहाजोननिमोन-
बिदिब्ला माबोरै सासे
बांगालनि न'जाखो? '
हांमाया बुङो-
' बेयो बर'निफ्राय बांगालनि आखायाव थांनाया
गोलाव जारिमिन दं बाजै।
आरो बे जारिमिनखौ आं बारा मिथिस'वा।
माने सोरनिबा सल' आरो रायथायफोरावनो
दासिम लिरनाय गैया नालाय।
थेवबो खुगाजोँ खुगा आबौमोन
आरो आयंमोन उन्दै समाव जौ लोँब्ला
सावरि जाब्ला आरो मेल मिथिँफ्राव रायज्लायनायखौ
खोनासंखौमानाय आंहा गोसोआव दं एसे एसे।'
मिथिनो बोदोर जायो निनिमाया
बियो हरखाब गोमजोरैनो सोङो-
' ससे खिन्थानायसाय नानि'
हांमाया मिनिसुलु जानानै खिन्थायो-
' खोनासं बिदिब्ला बाजै-
दिनैनिफ्राय नैजि नैजिबा बोसोरानो जाबाय खोमा,
नङाबा बाराबो जाबायसो नामाथाय-
जेब्ला बिरफुं माहाजोना
गावनि रां रुफाजोँ बुंफबनाय न'आ दरसि जायो
अब्ला सासे फिसाज्लाखौ
उन्दै बैसोआवनो हाबा होयो।
बे समाव फरायफुनायल' सेंग्रामोन होनना आफामोना बुंदोँ।
सिबाय फरायनाय नागारनानै हाबा लानो गोनां जाबाय
गावनि गोसोथोनाय सिख्लाखौ।
बेनि उनावनो बिरफुं माहाजोननि फिसाजोआबो
सासे बांगाल हौवाजोँ जुलि जाहैयो।
लासै लासै बेबादिनो बिरफुं माहाजोननि हिनजाव
बिरफुं माहाजोन आरो फिसाज्लाया
लासै लासैनो थैलाङो माखासे जाहोनाव।
बेनि उनावनो एंगारथावा नागारथावा
घोन दौलतखौ नागारथावा
बिरफुं माहाजोननि फिसाजो
जाय बांगाल हौवाजोँ हाबा जाहैदोँमोन
बियो गावनि बंस'खौ लानानै
बिबाजैखौ गाग्लोब फैयो।
बे समाव रुंसारि बिरफुं माहाजोननि बिहामजोहा
सानै फिसाजो दंमोननो।
थेवबो बिबोनांनि खायदा बुद्धियाव जेननांदोँमोननो।
बेबादिनो बिरफुं माहाजोननि न'आ
लासै लासै बांगालनि न'आनो जादोँ।
दा सोलिना थानाय उजिर आलियानो
बै समनि बिरफुं माहाजोननि फिसाजोनि
जोबथा बिबोनां गदायमोननो।'
सल'खौ हांमाया लामा थारैनो खिन्थादोँमोन
आरो निनिमायाबो हांमानि सेरावनो
सिथाम सिथाब खोनासंदोँमोन।
निनिमाया मिनिनाय गैया,
बियो बेबादिनो जायो,
बियो दुखु गोनां बर' हारिनि जारिमिन
हारिनि अलखदखौ बेदिनो गोबां बिजाबाव
गोबां समाव फरायनो मोनबोदोँ।
हांमानि सल' फोरमायनायाव बिहा
माबा मोनसे बुंनांगौ दं।
दुखु गोनांङै बियो बुंदोँ-
' नंगौ गासैबो गोरोन्थिया जोँनि,
जोँनि हारिनि सानस'नो हायै
लाइमोन सेंग्रा आरो सिख्लाफोरनिनो।
बै जुदि बिरफुं माहाजोननि फिसाजोआ
जुदि बांगाल हौवाजोँ हाबा जायामोनब्ला!
दिनै अब्ला उजिर आलिनि न'आ बर'निनो जागौमोन।
दिनै एसे समायना न'खौ
बर'फ्रा गामिनि बयबो नायनानैल'
थानांगौ जायो नङा होनबा?
दिनै जोँ बुंनो हागौ-
बर'निमोन होननानै,
नाथाय थेवबो फोरमान होनोनो रावबो गैया जालांनोसो हमबाय।
मोजाङै नानि जोँनि हारिखौ
साजायनाय हुखोमोरनाय
गासैबो दिनैनि लाइमोनफोरनि सायावनो।'
हांमाखौ थांखिना बुंदेरो निनिमाया।
हांमाया खैखायैनो मिनिनानै बुङो-
' आंबो बांगालजोँ हाबा जागोनहाय बाजै,
हि, हि, हि, '
थाबायै थाबायै एसे लोरबां मेँनाय मोननायलाय
लामानि जाम्फै बारनाय सुङायाव जिरायदोँ
हांमा, निनिमा आरो फिनिमोना।
निनिमाया मोनसे गोजोन आरो
गावनि सायाव देरहासादनाय गोरबोखौ लानानै
सोनाब फैसालिनि जारां सानखौ नायहरबाय थायो।
समायना जारां गोजोँ साननि रिफिनायाव
मोखांआ समायना गोजा जादोँ।
बिनि गोलाव खानाया
समायना नायनो हायना सारफावदोँ।
मेगन फारनैया गोजा बिदाय लानो आनज्रायनाय
दिन्दां जारां सानखौ नायनानै मेसेबनो बावगारदोँ।
हांमाया गोमो हाबदोँ,
बियो निनिमाखौ हमनो हादोँ
बे निनिमानि गोरबो साननि रिफिनायजोँ
दुंब्रुद जानाय बायदि जिउनि
मोकथां बिसम्बिनि दुखुआ रोखा रोखा फेँफोना महर लादोँ।
हांमाया राव होनो गोनो गोथो जादोँ।
बेनो जादोँ सुबुंनि बोहैगासिनो थानाय जाथाय,
जिउनि जारिमिन, सुबुंनि हमदांस' हायै प्रतिक।
हांमाया हरखाब माबा सानफ्लांनानै
हमथा हाथाराखिसै सालायखौ,
बियो थब्लंङै सोँथावै बादि सोङो-
' बाजै-
आथिखालाव नोँनि आय आफाया
माबादि अनो नोँखौ? '
सोँथावै बाथ्रा
खेँ मोनखाङो निनिमाया।
थेवबो बियो मिथिखागौ हांमानि गासैबो हमदांना-
बियो जोबोद अख्रा,
बियो मिथिनो आब्राथार,
जायखौ बियो मिथिनो लुबैयो
अदेबानि बियो बेखौ नागारखानाय नङा।
बियो खिन्थाथारनांगोन बेयो सैथो।

Topic(s) of this poem: poem


Comments about निनिमा (11) : हांमाया लासैयैनो सोँबावो by Ronjoy Brahma

There is no comment submitted by members..



Read this poem in other languages

This poem has not been translated into any other language yet.

I would like to translate this poem »

word flags


Poem Submitted: Monday, September 14, 2015

Poem Edited: Monday, September 14, 2015


[Report Error]