थिरिँ बिरिँ 1287-1346 Poem by Ronjoy Brahma

1287
बोहैयो दैमा फिथिखा
रैसुमै बोर्दाउलि सिफुं रिँखाङो
दाहानि हांमा-हांसानि
सुबुंनि गोरबो बिखा लाइसियाव।
1288
जिरि जिरि दैसा बोहैयो
नोँ आं जोँनि गेजेराव
नोँ फैयो आं थाङो बेवहाय
फुं थाङो मोनाबिलि फैयो
1289
इनायनि हेँथायै नोरजिया दांसाफोरा
जावरिसे अखानि थाखाय आर'ज गाबो
बिग्रायनायनि असिलायै अर सुयो
अख्रां गंसे सोरां होनो-
1290
एनजर इंगिनिमोना माय रोगायो
हेँथायै आबादारिया खैसार सायो
उदाङै गांखं बुब्राबो दाउफ्रि
लांसुनिया फलाना गावख्लायो
1291
गैया दुखु गाबनाय
फुंबिलि आलायारनाव
गोरबो रोदा रोदा
रैसुमै जाखाङो मिनिसुलु मिनिनाय
1292
गोग्लैना थायो
आंनि गासै सोलेर
बिरलाङो गोजोना उदाङै-
1293
अखा सिनायजोँ
आं गोजांदोँमोन
बार खोलो गावदेरनायजोँ
1294
खोमसिया साग्लोबबोयो
अखा, बार बारो-
जोँ लामायाव गाड़िजोँमोन
1295
खोनासंदोँ दाउसिनफोरनि रोजाबनाय
बेसेबा खुसि बिफां-लाइफांनि बिलाइफोर
1296
नायहरदोँ बेसे समायना
जारौ सान गोरलै
सोमखोर अख्रांनिफ्राय-
सोरां सारफावदोँ बिलाद मुलुगाव।
1297
रैरुब मिथिँगानि सोलेराव
साननि दुंबुर बिलिरनाय
मासे गोमोथाव सोरजि
1298
मिथिस'यै साथि
फोजोँदोँ जोँनि गोरबोआव
लेँहरदोँ मावनां हाबायाव इसारा।
1299
बिरखांदोँ बाहानिफ्राय दाउसिनफोर
उदां राफोद गांखंजोँ
रंगिना आलायारन
साना ओँखारबोदोँ खुसियै-
1300
थैसुला जिउनि मुलुगाव
सानसे बयखौबो नायनो
मिथिँगानि फैसालि दिन्थिनानै
रैसुमै दाउनि गारांआव
1301
खोनासं, आं खोनासंदोँ-
नैबे फुंबिलि
गुबुन गुबुन दाउनि मेथाइआव
गोदै गोखा खाब्रां थेरनाय।
1302
थाखोमा
नोँ थाखोमा
Ecstasy moment -आव
1303
नायनो लुबैयो
ओरैबादि-
नोँ हुखुमोरनो हायै
1304
नोँबादिनो-
सोँनायनि गेजेरजोँ
फिन्नाय आं नागिरो
1305
दख्ला दख्लि जोमैया
बाहा लादोँ अख्रांआव
गोजोनै गोजावदोँ
1306
जारौ मिनिसुलु
गोमालांदोँ सोनाबजोँ
फैफिन फैफिन
1307
बोहैयो देँखो
रैसुमै जेरै निजोरा
जिउ फैसालि मोनस'यै-
1308
सोदोब मोनथाव
सुदेम मोनाबिलिनि आगानाव
नागिरबायो मिथिँगानि मिनिनाय
1309
खबामनि खबाम
सन्दे-बन्दे रिँनाय
दलर दलर बारनि फारि
बेबादिनो मोसालाङो
1310
दा मोनाबिलिया बेँखनो
सोदोबनि सोदोबफोरखौ
थाखोमायो मिनियै खनायाव
1311
उसु-खुथु आं
बिलाइनि खथायाव
गोमानाय बुब्लिनि रोबै रोबै
जेन'बा आं मासे एम्फौथारसो
1312
जाखाङो रंजानाय
मिथिँगानि बिखायाव
समायना रंगिना
1313
स्राय स्राय बार बारदोँ
मोसादोँ बिफांनि बिलाइ
सैथोनि सोमखोर मिथिँगा
1314
अखा थायफ्रिदोँ
फ्रि फ्रि मिथिँगायाव
बिफां-लाइफां बाज्लखांदोँ
1315
गेवलां गेवलां
बारनानै दं गलाब बिबार
आंनि दरखं मोखांआव
1316
थिँ थिँ दुंनायाव
सहायनो हाया सोलेरा
गुदुं हाव हाव बुब्लियाव
लह्रायो बिबार बिलाइ गोरलै
1317
बिफां साया साया
जिब जुनारा एब्रेयो
बार खोलो खोलो बार
सिरि सिरि हांख्रायो
1318
उसाव बादाव जायो
गोजोन गैयै-
थांहां फैहां
दिदोम नङि सान्नायाव
1319
माएसे मोजां बियो
सुदेम मिनिसुलु
आंनि गोजोन मोखांआव
1320
गावनि गोरबो गोरबो
आं बेसेदि गेलेयो
मिथिगौ आं रजे
बेसे गेलेयो नोँदि
1321
थांनानै थायो अराय
खन्थाइ आरो मेथाइनि देँखोआव
जाफुंनायनि मिजिँजोँ
1322
जोँमानि थुलुंगा मोखांआव
सौग्रावो आंनि मेगनाव
मेगन मोदै ज्राम ज्राम
1323
मेगनाव मोदैया ररिङो
बांसिन गाबो आं
नाख्रेब जायो आं
गसरो गोगो सान्नायाव
1324
हमथा हाया जायो
नोँनि आखायाव आंनि
बिलिरो आंगो अन्नायजोँ
1325
आंखौ नोँनि मोदैजोँ
आंनि दुगैनाय जायोब्ला
बेसे गोजोन मोनो
1326
बेबादि जायोब्ला जिउ
मोकथांनि मुलुगाव
गाबनाय आंनि खुसियाव
1327
दाउसिना रोजाबफैयो
आंनि लांगोनायाव
बेसे गोदै रैसुमै
1328
बोखारदो आंनि मोदैखौ
होदो दावबायनायखौ
होदो मावनायखौ हाबानि
1329
सिनायनायखौ होदो
नोँनि गासैबोनो आंगो जेरै
सोरांखौ होदो गिरि
जेरै थाबाय थायो सोरांआ
1330
बारलाङा आंनि गोसोआ
दा बेसेबा खुसियाव
फै आंनि बुब्लियाव
थादोदे बुजिनाय आंनि
1331
लोगो जायो आंजोँ
थाबायनाय लामायाव
नोङो फैगोन बे लामाजोँ
नेना थायो गोजोन नोँखौनो
1332
अन्नाय होयो नोँ
रैसुमै गोरबोआव
बार सुफुङो नोँ सोलेराव
जिउ नोँ आंनि
1333
बिलाइ मोसायो नोङो
गोसोआ खुसि जायो
रमान्टिक गोबानानै
बेसे रैसुमै बार नोङो
1334
मोकथांखोर फैलाव दुब्लियाव
गेजेर गेजेर गोजोन लामायाव
आंनि मुलुग मिथिँगा
नोँ होयो मिनिनाय
1335
खथानि आंनि साथियाव
बिरथिँ बिरथिँ गेलेदोँ
उन्दै उरि एम्फौफोर
1336
जुब जुब अखा हादोँ
सुदेम बारजोँ
दालाइ-बिलाइ मोसानाय आं नुयो
1337
गोजोन गोजोन
बेसेबा गोजोन
मोनाबिलिया सफैयो
1338
मोदोमफ्रु मोदोमदोँ
गोमोन फिथाइनि आहुति होनाय
बेसे गोदै बार
1339
जारौ मिनिसुलु
एब्रेलांदोँ सोनाब फैसालियाव
जारौ जारौ गोजोन
1340
मिथिँगानि गारांआव
रैसुमै मोसायो बिलाइ
सोमखोर मिथिँगानि
1341
स्राय फिरिसे बारजोँ
बयबो खुसिमोन
दाउसिननि मेथाइ
1342
मिजिँनि देरायाव
जिउ आंनि हान्थियो
सिमांनि मोकथांसिम
1343
थांनाय थानायखौ
बेसेबा मोजां मोनबाय आं
बेसेदि मिजिँ बिनि
1344
दुंबुर फुंनि बाराव
समायना सैथोनि मिथिँगा
मोकथांगोर नायनो समायना
1345
आगान आंनि दावबायनायाव
दावबायो दिनैबो
बेसेबा गोसो खुसिजोँ
1346
दुलाराइ मिथिँगाया
बेसेबा गोजोन रिँङो
बार खोलो खोलो
रैसुमै दाउनि मेथाइयाव