थिरिँ बिरिँ 1347-1400 Poem by Ronjoy Brahma

1347
फुं
दिनैनि बे फुंखौ
बेसेबा मोजां मोनबाय आं
मोजां मोनबाय मुलुगखौ
1348
माब्लाबा
सुबुंफ्रा आंनि गोरबोआव फैयो
आरो मोदैखौ गालांनानै
गावसोर खुसियै थांफिनो
1349
अखाफोर
सोरांआ जेरावबो नांदोँ
जेरैबो खना खनला
दिनै जेरैबो सोरां
1350
दिनै हर
सिनायनो हायै हांगार गोसोम
गैया फुर्णिमा
बहाबा थांदोँ हन्थायाव
1351
रंजाखाङो
आयनि गोजोँ मिनिनायजोँ
मिजिँ फारसे आगान सुरनो
बेसेबा थुलुंगा मोनो
1352
बुजिबाय
आंहा मिजिँ बेखायनो
आयनि गोरबोआव खुसि लाबोनो
आयनि गाबनायखौ होखारनो
1353
थुलुंगा
बेसेबा गोजोन बारजोँ
आंहा बोलो फैयो
आं खुसिखौ नागिरो
1354
आं थायो सोरां आरो खोमसि
मोन्नै सिमानि मिरुआव
आरो आंनि खख' लामाजोँ गिदिँङो
मोनडाइन मिथिँगानि मोन्दांथि
1355
आद्रि जानायफोरखौ हिसाब लाजाथारलिया
अदेबानि मुलाम्फानिबो बेसेना बाङाइसै
बेखायनो मोनदाइन मिथिँगा बारलाङो
आंनि बिखा आरो गोरबोजोँ
1356
हायखंसि गोसोजोँ हास्थायो आं
मुलुग सोरजिनो गोदानै
हा आरो अख्रांनि गेजेराव
जोमै जाना मेथाइ रोजाबनो
1357
मिथिँगा आंसोल
मुलुगनि फैसालि
आख्रांनि रुगुं रुगुं
सोर्गोनि गोजोन रोबै रोबै
1358
सिमा गैया नोँनि आंनि गेजेराव
आंनिसिम फै
आंबो नोँनिसिम थांगोन
देलाइनानै सुफिन दामनानै
1359
थाङो आरो फैयो
फैयो आरो थाङो
बेनो जोँनि ओँथि गोनां लोगो हमलायनाय
बेसेबा ओँथि गोनां
1360
सोरजिनायाव फोजोबनाय दं
जोबनायावबो सोरजिनाय जायो
जोनोम आरो थैनाय
1361
सोरांनि रोदाजोँ-
आंनि गोथे मेगना खामफ्लं जायो
अब्लाबाबो नाथाय
खेबफ्रोम हरावनो आं गाबनाङो
1362
जोखोम जायो माब्लाबा
सिफाय जाय गोसोआ
गोदान मिजिँ सुजुनानै
1363
जिउआव आबुं जायो
खेबसे गोथार रंजानायजोँ
आरो मिथिँगानि गोदोन
मुलुगनि खौसेथियाव
1364
गोसोखांथाव बुब्लि थालाङो
सना फिथर सम
समफोरा बेबादिनो थाङो
1365
आं नोँखौ फोथायो
नोँ गाबनो रोँगौ मिथिँगा
नोँ मिनिनोबो रोँगौ
1366
बा! आं गोसोखांगारदोँ
दिनै जोबोद मोजां सममोन
आं जेब्ला गाबनो बावलांदोँमोन
1367
अखाया माब्लाबानो हाजो मोनहैबाय
बिफां-लाइफांआ मोसाबाय
दुगैबाय अखा दामब्राजोँ
1368
जोमैया अख्रांखौ फांथेबाय
खोमसि जाबोबाय
जोमैजोँ जोमै दावहा
मोफ्लाम-मोसि हब्रा-हसि
1369
रैसुमै मेथाइ अरननिफ्राय गोजावबोदोँ
बबेबा फांसे गेरेमसा बिफांनिफ्राय
आं खोनासंदोँ-
नंगौ दाउथुनि सानसुथिर समाव
1370
मोसौनि मेगना देग'ग
थालिर बिलाइखौ नोजोर होदोँ
जेब्ला दुब्रि गांसोआआव हासुयो
सालाइ फोलावना आंखौ होसोबोदोँ
1371
सिमां आरो जोमै
लोगोसे गंसे लैथोनि दिङा
सोरबा आंखौ गोमोहाबो
1372
मेगननि गोजौआव आंनि थांखि
बेसेबा गोजौ नुहरा आं
नायथारगौ नायथारगौ सानथारो
1373
आं जेब्ला सिरि मोनो
बुहुमा सिरिमोनबायमोन
जिउनि लामा हान्थिनो
1374
आंनि मोदैया सिरियो
सानजानि सोरां रोदायाव
आं जेब्ला मिनिस्लुयो
मिथिँगानि गोदान फुंआव
1375
गोसो आंनि गाबनाय जायोब्ला
नोँ आंखौ बुरखाय
आं मेथाइ रोजाबबोला
नोँ मिनिगेवलां रंजानाय
1376
बैफोर समनि गोसोखांथि
गोरबोआव थफ्ला जानानै दं
दाबो दं मिनिनाय गाबनाय
1377
हाजोनि दाउसिनफोरबादि
गां जांख्रियो आं
अख्रां गंसे गिदिँनो उदाङै
1378
सानस्रि थिलिखौ गुवारसिन खालामनो
गोजान इयुननि बिबार बारियाव
थारैनो गोजोन मोनसे सामाज दागोन
1379
जिउ दिङायाव जनानै
मेथाइ रोजाबदोँ आं
जिउनि लैथोखौनो बारलांनो
सुखुनि जांख्रिखांना दुखु रुजुननानै
1380
जिउनि दाहायाव सान्थौआ
गोनोखोनि सिमब्रेनाय
हगारबाय आं दिङाखौ-
हायनारि सिमांलु सिमां सौसिनानै
1381
गोबां गाबबाय रंजाबाय
सुखु दुखुनि हिसाब गैलिया
ओँखारबाय आं गोदान लामायाव-
1382
जिउनि सांग्रांथियानो जोनोम
थांना थानाय मोकथांनि
थांना थानो थाखाय
जिउनि अनफावरि जानो
1383
उन्दुस्रिदोँ जोँनि समाज
सोरनिबा दुखु गोनां गाबनायाव
सहायनो हालिया आं
गोदान समाज गायसनगोन
1384
सिबि आबुं गोसोजोँ
बरायदोँ आं-
खुसियै दुंलोब गोरबोजोँ
नैबे सोरांआव आंगो सान्नायजोँ
1385
गोरबो फुंखानिफ्राय
ओँखारबोयो आंनि सानस्रि
समायना जिउ दैमायाव
समायना गेवलांङो फामे बिबार
1386
दिनै आं जिउआ
सानसे बारलांदोँमोन सानहाबनायजोँ
मुलुग आरो मुलुगनि आंगो सानथिजोँ
1387
आंनि सान्नायाव
आंनि गाबनाय रंजानायाव
दुखुथिया हार्सिँ नङा आं
लोर्बाँ नङा आं
1388
सिमांखौ आं नुदोँ
जेराव मोकथां खोमसिनि
उदां गोजान बेसेबा दावहानि
मिजिँखौ आं रनसायदोँ
1389
दुखुथिया मैयानि बादियै
आं दिनै गैलिया
अदेबानि आं जाम्बा नंलिया
मोकथांनि सानबोलावरियाव
1390
आं दिनै थांनानै थानो लुबैयो
आंनि मावनायनि सायाव
गोथार गोरबोनि गावनिनो सिङाव
आं दिनै रोजाबनो लुबैयो
1391
थांनानै थानो थाखायनो
दिनै आं बाथ्रा बुङो
सैथोखौ संदान्नानै
मोन्थाइनि थाखाय अरायनि
1392
गां बुब्राबनाय सोदोबजोँ
आंनि दिनै खन्थाइ लिरो
मिजिँ रनसायो फोसावा मेथाइजोँ
1393
मानसिनि बाथ्राखौनो बेसेबां सोँबावनो?
आंदि सोँनो लुबैयो-
जिउ जिबिया माबोरै थांनानै दं?
बेसेबा मोजाङै-
1394
गोसा सान्दुंजोँ फुरहाबदोँ
रिथि रिथाव दाउदै बिबार
बेसेबा समायना गोजोँ
1395
आंनि जिउमाया जोँखांदोँ
गिनाय गैया खोमसियाव
सैथोखौ दिहुनथारगोन
1396
साननि नुजाफैनायाव
जोँ मोखांजोँ सौग्रावलायदोँमोन
आरो आं गंस्रिदोँ लाजिगुसु
1397
साना मिनिग्लाबदोँ
बारा स्राय स्राया मोसादोँ
बिफां-बिलाइनि सासा
1398
मिथिँगानि बारा
बिफां लाइफांखौ बिलिरदोँ
बेसेबा दाउसिनमोना मोसादोँ
1399
सैसे मोखांनि अखाफोरा मिनिसुलि
नायहरदोँ मोनाबिलि समाव
सोनाब फैसालियाव
1400
दैस्लुं मिनियो गाबो
हांसोनि गोजोमनायाव
गुबुंले जायो