गोरबो इसिँनिफ्राइ- 137 Poem by Ronjoy Brahma

सिमांआव नागिर नागिर
आं बोदोर जायो सना
सोरांस्लाब मोनै लामायाव नेयो
मोखां बुलब मैखि लानानैबो
-
फैदो दिनै आज्लंनानै नोङो
समायना साबसिन मिनिनानै
हाग्रामानि दालांजोँ थाबायनानै
नेदोँ आं फैसालि गेजेराव
-
दावहा निन्दा हिंसा हिंसि
सिमांआव गाग्लोब जाबाय आं
बारहुंखा दैबानाजोँ
मुनुस मैया अन्थाइ बिखा
हाथाइ गोफार जिबि जिरादजोँ
-
नाथाय नोँखौ मोजां मोन्नायादि गोथार
उथ्रिबोबाय आं सिमांखौ
नोँखौ नागिरै नागिरै सना
फैदो दिनै आज्लंनानै नोङो
-
सिखिरिया बिरथिँबायदोँ सना
अनजालि बिबारिखौ नागिरनानै
नोँखौ नेदोँ आंबो मेंख्लाबनानै
नागिरफैदो नोङो आंखौ आज्लंनानै
-
फै सना गुदु मुलुगाव थमेनै
बेवनो दं आं फुंनि लामायाव
हाद्रियाव हाद्रिनि मुलुगाव
जेराव नोँखौ आं लोगो हमगोन
नोँखौ गोथार मोजां मोन्नानै
-
फै सना गावदां नोङो
मोदोमफ्रु बाराव थाबायनानै
अलसिया जिउ जिबिखौ फोजानानै
बेवनो होनो नोङो सना
आंनि हाबाखौ नोँजोँ आंनि
-
नै अनजालि गोबाफैदो नोङो
मिनिखुसि आंखौ रंजानानै
खाहाबनाय गैयै आंनि हाबाखौ
मोदोमफ्रु होदो नोङो लामाखौ
खैहाबनाय गैलिया सान्नायखौ
नोङो बिलिर बिलिर होदो मिजिँआव
-
हरसे खोमसिया बारलांबाय
सिमांआव गोरबोआव दावहा नाङै नाङै
फैबाय सौफैबाय आं
-
हरनि बिबायारि हान्थियारिफोरा
दान्थे बिदान्थे गोरबोजोँ गोरबोआव
बेयो गोमालांबाय गोमालांबाय
फैदो नोङो मोजां मोन्नानै दिनै
-
सानस्रिलाय थब्ल'लाय बारलाय
लैथो मोनसेखौ बारबाय आं
अनजालि अनजालुजोँ सिमांनि फोथाराव
मोसायै मोसायै गेलेनायखौ बावगारबाय
नोँखौ हास्थायनानै फैबाय फैबाय
गुदुं उन्दुनायखौ नागारनानै
-
फैदो दिनै आज्लंनानै नोङो
समायना साबसिन मिनिनानै
सोरांस्लाब मोनै लामायाव नेयो
मोखां बुलब मैखि लानानैबो।
-
16/10/2015
बंङाइगामियाव