थिरिँ बिरिँ 1501-1550 Poem by Ronjoy Brahma

1501
बाया मोजोमा गले गले
सान हर बेबादिनो थाङो फैयो,
थांनानै थागोन जोँ बेबादिनो
खोमसिखौ बुस्रां सोरांखौ सुखां।
1502
थांना थानो थाखाय
थांनानै थानायनि सानस्रि ओँथि थानांगोन,
जिउनि मोनसे सोदोमस्रिया
बयजोँबो अनसाय जानांगोन।
1503
मावनां मोकथांनि दुब्लियाव
बेयाव रंजानो गोलोमदैजोँ,
फुं बेलासि जेब्लाबो
गोजोन बार मिथिँगायाव।
1504
गोरबो गोरा रेबगन
जिउनि बिलाइनि थाखाय,
सुजुगोन जारिमिन थांनायनि
हां गोलाव जोनोमनि।
1505
लुबैयो आं जिउनि निजोरा
गोरबो गंसे मन्दिराव,
जिउनि नंखायमानिखौ
सावै सावै सावफ्लेनानै।
1506
नांगौ गोजोन होनो दैसा
सुदेम बाराव फिन्नाय हरनो,
सोर गाबज्रिहरो लामायाव
सोनाबहा साना दोबैलाङो।
1507
स्रां सोरांआव लामा थाबायनो
जिउनि हान्थिनायाव,
आगान सुरनो फोलावबाय
हगारबाय दिङाखौ मुलुगाव।
1508
आंनि रादाबखौ दैबायहरनो
मेथाइ रोजाबो आं,
रैसुमै खबाम सुजुनो
जिउनि थांखि गुबै दावबायनायाव।
1509
आंनि लामायाव सोरां
फांसे गेरेमसा बिफां,
मेँगा होनो आं बेवहाय
मेंग्लिनाय आंनि देहाखौ।
1510
जिउनि हान्थिनायाव
नागिरो समायना गंसे गोरबो,
अराय बोहैनाय गुदुं मेथाइयाव
आबुं उदांस्रि जोनोमनि।
1511
गाबोन आरो गाबोन
साना फैगासिनो थादोँ,
औ बिसोरजोँ आंनि हान्थिनाय
थियारि आं फैफै।
1512
आं आंनि सानस्रिखौ मोजां मोनो
मानोना आं बिनि उल्था नङा,
आं मिथिगौ बेनो हान्थिनाय
बेनो आंनि गुबै लोगो।
1513
बिबारा मिनिस्लु मिनियो
सुदेम गोजोन बाराव,
आरो आं मिनिफायो
गोजोन्नाय मोनो आं।
1514
मेथाइजोँ बुंफबनाय आबुं जिउआ
आंखौ मेरायना लायो,
जिउनि असे दिङाया
आंखौ खाख्रबना लाबाय।
1515
देँखो आखिनाय नुनायफोरा
गोमोर लाङो गोसोआव,
आं बावगारलांदोँ
बै सुदेम देँखोखौ।
1516
गुसुसिनथार गोरबो आंनि
गुसुसिन बार हावानिफ्राय,
गोरबो देँखोआ खालामो मिथिनाय
गोहोआ खारदिँबाय थायो।
1517
खोमसियाव जोनोम जायो गोसो
देरो सोरां मोखांजोँ,
बेसेबा सोरां मुलुग
मोजां मोनो आं बेखौनो।
1518
मेगन गेंङै जिउमाफोरा
गेवलां गेवलां मिनिदेरो,
बेसेबा खुसिजोँ आय'
फैबाय बाराव मोसानानै।
1519
आलारिबादि बिबार गोथार
देरहासाथ गोजोँ गोरबो,
जिउ मावसुमानि मुंआव
थांनानै थागोन बावलाङा।
1520
मिथिँगा आंनि रंजानायखौ
जोथोनै लाबाय नोङो,
सोमखोर गोथां
आरो समायना बिखायाव।
1521
बेसे रंजायो आं
खेबफ्रोम सुदेम बाराव,
नोँ बाज्लखाङो दाउसिन
मेथाइ रोजाबना दालाइयाव।
1522
बे समाव आंखौ बिलिरो
बेसेबा गोजोन सुदेम,
बार खोलो खोलो
बारलां आंनि गोरबोजोँ।
1523
मिथिँगा आं मोजां मोनो
गासै बिदिन्था नोँखौ,
बेसेबा समायना गोजोनथाव
नोँजोँ नुलायनायाव।
1524
सानस्रि नोँ समायनासिन
खन्थाइनि खबामनिफ्राय,
आं बेबादि बिजिराखै
नोँ समायना खन्थाइनि खबामबादि।
1525
जोमैनि सुदेम मोदैया
बिलिरो आंनि आफा दाउदै,
नंगौ बेसेबा सुदेम
नोँ आंगोथार मोदै।
1526
खबाम रिँसारलांदोँ जिउमाजोँ
गावखौनो फोरमायदोँ,
थांना थानो हास्थायो
आखाय मुथियाव बेसेबा।
1527
आंनि समायना सानस्रिखौ
आखायजोँ आखियो आं,
बेसे गोजोँ सावगारि
आंनि सोरजि गोरबोजोँ।
1528
बे खोमसिनि सुदेम बारा
आंखौ बिलिरो,
जोँथि अखाफोरनि सोरांआव
थागौ सानबाय थायो आं।
1529
बेबादिनो आंनि गोरबोआव
बादिँग्लाय फैयो रंजानाय,
आं उरायलाङो दैसा सेराव
रैसुमै दाउनि मेथाइयाव।
1530
आं गोसोखाङो गारबोनाय
समायना गोजाम बिदिनथा,
हाबाब बेसे गोदैमोन
खालि रंजानाय गाबफ्लानाय।
1531
सोमखोर अरना मेगनाव गसंङो
सोमखोर हाजोआ बेँथेयो,
बेसे गोजौ आंनि मिजिँआ
मानखोयो हाजोखौ।
1532
नायगोमो हरो आं
सारिगिदिँ मुलुग,
उदां जानो हाबिला
दाउसिन जाना अख्रांआव।
1533
गोजोन बेसेबा खुसिजोँ
बावगारलाङो आं,
आंनि गोदो उन्दुनाय
दुखु मेँनायखौ खोमानानै।
1534
गोदान सिमां नुयो आं
बेसेबा हास्थायनायजोँ,
मुलुगखौ गोबानानै
अख्रांखौ खर'आव रुजुन्नानै।
1535
मिथिँगायादि एसेबां रंजाहोबाय
गाबनायनि फारिया थाङो,
आंनि सोलेराव सुदेम
बिसोरनि खुसिनि बिलिरनाय।
1536
थागोन मुलुगनि गोरबोआव
थाजिम थुलुंगा जानानै,
गासै आंनि गोरबोखौ
बिसोरनो आखायाव होनानै।
1537
गोसोखांनो हालिया आरो
गोजाम बिदिन्थानि महर,
बेसेदि समायनामोन
आंनि दाइरियाव खुसेरनाय।
1538
आगोर मोना जायो
अदेबानि उल्थां फाल्थां जायो,
समा खारगासिनो सिगांजोँ
औ खारफादोँ आंबो।
1539
बेयो दावबायनायनि सिगां
रंगिना सिमां मुलुगाव,
बुहुमा खारदिङो आय'
सिगां फारसे सिगांजोँ।
1540
मिथिँगानि बैसोआ द्लाम जाबाय
उन्दुआ मोनफ्रोम बोथोर,
आंबो उन्दुनो लुबैया
मिथिँगाबादि अराय जानानै।
1541
सैथो जोनोमनि दावबायनायजोँ
आं थैयो मिथिँगायाव,
बेसेबा गोजोन्नायजोँ थैयो
गावनि आंगो मुलुगाव।
1542
खारदोँ समा थाथ'आ
खारफायो आं उन उन,
दोखो मेँग्लिना गोग्लैयो
आं आरो सिखारफिनो।
1543
आंहा गोरबोआव जेन्नाय गैया
मेँङै मेँङै खारफायो आं,
हाबिला दं रंगिना संगिना
सिमा गैया मिजिँनि।
1544
मोनसे दैमा बोहैयो
गोजोमो आं बेवहायनो,
जिउनि थाखाय थांना थानायनि
गोजोनसिन बेयो मुलुगनि।
1545
उदांस्रिनि लामायाव
आं अखा सिजायो,
बार गुसु बिलिर फैयो
मोसाथियो बिफां लाइफांआ।
1546
दोबै दोबै मानसि
गोलाव राजा लामायाव,
थाबायो आं बेयावनो
बयनिबो गेजेराव।
1547
दैया बोहैलांदोँ खोला
नायहरो आं सिरियै,
बेसे गोजोन जागौ
आय' उदांस्रिनि बिखायाव।
1548
मटरनि उखुम सायाव
आं नुहरो बिफांनि
बाज्लहरनाय
आखाय सोमाव सोमाव।
1549
सुमफ्रामनि जारौ फिथाइयाव
मेथाइ रोजाबफैयो,
खेबख्लाबो दाउसिना
बिफांनि दालाइयाव बाना।
1550
मिथिँगाया बुङो-
आं सोमखोर जानि
माय बिदां थमेनो
फैलाव सोमखोर दुब्लियाव।