गोरबो इसिँनिफ्राइ- 168 Poem by Ronjoy Brahma

नोँनि मिनिसुलु राफोद गोरबोजोँ
निहोर सिनाय आंनि गियानआव
राफोद जायो दुंब्रुद गोसोआ
दिनैनि हाबा दिनै मावनो
-
जारौ दखना गान्नानै
बे लामाजोँ नोँ फैयो
आंजोँ मिनिसुलु मिनिनानै
आंनि हाबाखौ थुलुंगा होयो नोङो
-
सना नोँ बबे दैसायाव गोजोमहैयो
आं दाबो गुमुरखौ मोना
नोँदि समायनासिन देलायना फैबावो आरोबावसो
बेलासि बेलासि सुदेम समाव
-
बेसर बिबार गोमो गोथां दखनाजोँ
नोँ गुसुथिखौ गोजासिन खालामबावो
जारौ महर मोनाबिलि समाव
बे लामाजोँ नोङो फैयो
-
फोरमायलां जिउ रजे आंनि
नोँखौ गोसो थोनाया बहा गोजोमनाय
सना बेबादि गोजोन्नायखौ जेरावबो मोना आं
रावबो गैयै समावबो फै रजे
-
अख्रांआव जोमैया लुथुर-फुथुर नायहरो
हाजोआ गालाला नायहर नोँखौ
लैथोआ सिरि मोन्ना खांख्रांना नायहरो
अन्थाइफोरा खर' लान्था लान्था नायहरबायो
-
दाउसिन दाउलाफोरा नायखोमा बायो
दैमा दैसाया खुसिसिन जाबावो
बिफां-लाइफांआ रंजायो
दुब्रि लेवामोना आज्लंसिनो
-
जिउ नोँखौ मोजां मोन्नाया
मिथिँगाखौ समायना खालामो
नोँखौ हास्थायनाया मुलुगखौ रंजा होयो
रजे नोँखौ मोजां मोन्नायानो थांना थानाय
-
नाथाय रजे आंजोँ मिनिसुलु मिनिनानै
नोँ बहा थाखोमा हैयो?
आंनि हाबायादि आद्रा थायो
आं बिखा खायसिब मोनो
नोङो सोनाब रोबैजोँ आगान सुरो
आंखौ आखाय सोमाव सोमाव।
-
15/12/2015
गामियाव