गोरबो इसिंनिफ्राइ -19 Poem by Ronjoy Brahma

सानो नोंनि सोरजिमाखौ सोर सोरजिनायनि
गोमोथाव सावगारि बेलाइ?
मा साननि उनाव हर
गले गले बेसेबांदि खोमसि हरनि उनाव सोरां

सोर दानायनि एसेग्राब गुवार बुहुम
मिथिस'वा नुहरस'वा
रिउ रिउ नो
सोर खालामनायनि जादु जाखो बेलाइ?

आंनि मेगनावनो एखमब्ला गोसा सान्दुं
एखमब्ला अखा दोमैलु जोमै
मा गोमोथाव माया महिमा
जाखो बेलाइ?

मानसिफ्रा बुंसो लायो
सोरजिगिरि अबंलावरियानो सोरजिदोंलै बे बुहुमखौ
गासै सान हर
सोरांनि उनाव खोमसि
जोबा बिनिनो माया महिमा

सोरजिगिरिनि माया
जादु गेलेनाय
बे गोमोथाव सावगारियाबो
अब्ला सोरजिगिरिया सोर जाखो?
हर सान बेलाइ बबावथो थायो?

सुबुंफ्रा बुंसो लायो
सोरजिगिरिया बोराइ बाथौआनोलै
सोरबा सोरबाया बुंसो गारो
सोरजिगिरिखौ जों जोंनि मेगनजों नुनो मोनालै

बेयो बयनिबो गोसो आरो
सोलेरावसो थायो
सिबिनो रोङोब्ला गोसो गोरबोजोंनो
नुनो मोनो सोरजिगिरिखौ।