थिरिँ बिरिँ 196-240 Poem by Ronjoy Brahma

196
उदां अख्रांनि गुफुर जोमैया
लेँहरो नङो गोथार साजायना,
गोसोम जोमैया हरखाबनो
नारसोमो मिथिमोनै हाब्रुआव,
हाबाब मेँग्लियो दिनै सिमांङाव।
197
बैसोनि सानजा फैसालियाव
हरखाब बिरलाङो गोरबोआ,
हां थोनो मेँग्लियो फैफिन्ना;
लाबोयो रादाब गोजाम दाइरि
गिजि जिलांनाय गारसोनाय समनि।
198
खारबाय थानाय अट'नि उखुन्दैया
बिरदोँ दाखा दाखा,
सोमखोर बिफांफोरा नायहाबदोँ
बिसोरो सानसुथिर समाव गल' गल'।
199
गोदो उन्दुलांनायनिफ्राय
हरखाब सिरि मोनो हराव,
खोमायाव गोग्लैयो-
पिल्टारनि थरथिँ थरथिँ
दैनि गोगो सरगारनाय;
गोरबोआव गोगो मिजिँखौ नागिरो
खोमसि हराव हार्सिँनो।
200
मेंब्रा मोखांङै मिनियो
सावगारि साजायो लोगोआव,
साजायनाय गोरोबै समायना
हाबाब मिनिफ्लाङो ओँथि गैयै मोखांआव।
201
देरहासादनाय गोरबोआव
सोँनायनि फिन जाखां फैयो,
ओँथि गोनां मिनिनाय आंनि-
मोदैजोँ गोरोबो रंजानाय।
202
थुनलाइनि गोरबोआव एब्रेयो
लाजिस्लु लोरबां सानस्रियै,
मिनिनाय गैया नंखायै
नाजायो आं हाथासि मिजिँआव थाबायनो।
203
दंमोन आं हान्थियाव
साइकेलनि खारनाय जागायबाय
दं आं बेयावनो,
सोमखोर फैलाव मायनि दुब्लि
गोसोखौ बोदोँ मोसाग्लांना
अखाया उन्दै उन्दै बाग्लायदोँ
गोसोआ मुखुब मेगनजोँ बेयाव,
हरखाब बारा गोब्राबै फैयो
साइकेलनि बोलोआ दबथायो
फ्रि फ्रि अखा मोदोमाव बिलिरो।
204
थाखोमानाय जिउनि सैथोखौ
नागिर नागिर मेंग्लियो,
आं मोन्दाङो आं सैथो
आं सैथोखौ नुयो।
205
गोसोआ मेवहाबनाय आंनिया
गुसु बोजबना आं हान्थियो
गोब्राबै बारनाय बारा अख्राथार
मिथिनोसो हाया मा मिजिँ।
206
नायगोमोदोँ आं साथानि
थख्रब ख्रब बायग्रेबनायखौ
अखाया बिलिरो सोलेरखौ।
207
आं जोबोद रंजानो सानो
गावनि गुरै गोरबोजोँ,
मोनबो जाहोन नागिरै।
208
जिउनि बिसम्बियाव गारबोनाय
दाबो फैयो मिनिसुलु
आं गोजोनो, रंजायो।
209
जोबनाय गैयै लैथो
आंनि गोरबोनि,
गोथौनिफ्राय गोथौसिन
थब्ल'यो आं बेवहानो।
210
बिलिर बिलिर बोहैदोँ अखाया
दिँखिया लाइफां मोसाग्लांदोँ बारजोँ
आंनि लांथिया मोदोमाव नांदोँ
गुसु स्रो स्रो बारा
आखाय खिथेबना नायहरदोँ आं
मोसाग्लांनाय गंस्रो लेवामोनखौ।
211
गोसो मुहिथारनाय आंनि
बावगोमाथारदोँ मेसेबनो मेगना
आय' गोरबोआ आंनि रंजा रंजा
गब'दोँ मोजां सानस्रि लैथोआव।
212
आं मेथाइ, आं रोजाबदोँ
देँखो बोनानै गावनि,
जिउखौ लानानै-
आं खन्थाइ, आं आवरायदोँ
सोलेरखौ लानानै,
गोमो गोथां सानस्रि गोरबो बिलिर बिलिर।
213
गावनि जिउखौ मोजां मोनो
समायनाय दं बेयाव,
आंनि गोरबोखौ दांग्रोमो
गोजोन्नाय दं बेयाव;
आं गोजोन्नाय मोनो।
214
समायना, आं नायगोमोयो
दावदै बिबार,
बेसे समायना गेवलां गेवलां
बार सिरिसे स्राय बारनायजोँ
मिनिसुलु बाज्ल'दोँ।
215
अखाफोरा नायहरदोँ
औवा बायग्रबनाय लामायाव,
आं नायगोमोदोँ-
दखरसे खोमसि खावसे सोरां।
216
आंनि मिनिनायखौ आं मोन्दाङो
आंनि मोखांआव थाबथाफैयो
आरो आं मोन्दाङो
आंनि खुसिजोँ आं रंजानाय।
217
खोमसिया गोग्लैदोँ
आंनि गोसोआ नोँखौ हांख्रायदोँ
हे गसाइ होन्नानै।
218
हाथासि सोमखोर मिथिँगाया
मिनिनाय गैया बिफांफोरा
रंजानाय जायाखै दाउसिनफोरा,
बरायजायाखै मानोबा सुदेम बारा
सिरि दरसि सानसुथिर समाव।
219
बादामालि मोसानाय खोमसि हराव
हुदुआ गाबदोँ,
आं थाथ'यो लामायाव;
सोरां नायहरो।
220
जोबोद खोमसि
मेगन सौसियै हराव,
आं खोनायो दैसानि बोहैनाय
सिरि-
जिरि जिरि बोहैनाय।
221
फोर फोर दाउसिनफ्रा
बिरै बिरै मेथाइ रोजाबो,
हांमा थायो आंहा
आरोबाव खोनासंनो।
222
गुसु निजोम हर
मोनानि जाना दान्दिसे सिलायाव,
आं नायहरो बारियाव-
देँखोबोनाय गुमा खुसेँग्रानि।
223
गुसु हराव मिनिजि
गुसु निहोर,
बाज्रुम बोयो अख्रांनिफ्राइ;
आंखौ गोबाफैयो।
224
दैस्लुं दुब्रि बिलाइनि
आंनि सेन्डेलाव,
आफा दावदै खुदुमो
आंखौ लाजिस्लु होयो।
225
जोबोद फुंनि समाव
आं एम नागारो,
जाम्फैनि दैयाव आथिँ गासोमो
नायहरो दाउसिन जरासेया।
226
नैबे आफानि दुब्लियाव
गांसो सावलेनाय मोसौ-बोरमानि
बादिलायनाय बिसोरनि।
227
दावदै बिबार बारदोँ
आयनि बारि खनायाव,
दाउसिन माखासेनि मेथाइ
आफानि बिफां दालाइयाव।
228
गोलोम बोथोर दायो
बिफांफोरा मेँग्लियो
ज्रय सानसुथिर समाव।
229
फुंबिलिया आंनि अनजालि
एमनिफ्राय सिखारना
लोगो हमो आं।
230
आयआ गल' नायहरदोँ
मोदै गहां गहां-
आं जोबोद गोमो हाबो
आखाय सोमाव सोमाव।
231
दिन्दां अखाफोरा मिनिदोँ
जारौ समायना,
सुदेम हर गेजेराव।
232
मेगननिफ्राय मोदैया जिरिदोँ
थरथिँ थरथिँ, जिरिदोँ
आरो रोजाबदोँ।
233
खनफ्रोम सोदोबा
थरथिँ निहोरनि-
रैसुमै खबाम।
234
निला अख्रांआव
आरोबाव हाथर्खि-
अखाफोरा लाजिगुसु।
235
सुहाबनाय-
निहोरनि सोदोब
थरथिँ थरथिँ उखुमाव।
236
गुसुनि बुब्लियाव
आं बेरायग्लाङो-
बिबारफोरा आंखौ नायहरो।
237
मोनाबिलिनि बारा
मिथिँगानि मेगनाव बिलिरलाङो-
आं गोमोहाबो समायना।
238
एब्रेदोँ आरो एब्रेदोँ
सोनाब फैसालियाव-
नायहरो समायना गोसोजोँ आं।
239
दाउसिनफ्रा रोजाबलाङो-
फैसालि होसोना
आं खोनासंङो।
400
थाबायनायनि सिगां
आं खेबसे मेसेबदोँ,
मिनिसुलु आगान सुरदोँ।