गोरबो इसिँनिफ्राइ- 197 Poem by Ronjoy Brahma

थैथारनाय बायदि नोँखौ बावहाबो
बेसेबा आंहा गोरोन्थि जायो
दुखुआव सुखुआव नोँनो जेरावबो
थेवबो लोगो नोँखौ सोँखारियो
-
दिनै बयनिबो सोरां जानानै
बयनिबो मददगिरि जानानै
ओँखारबोदोँ नोङो सान जानानै
मुलुगनि खोमसि आन्दायनायखौ सावफ्लेनानै
-
लोगो आं नोँखौ खुलुमहरदोँ
खुलुमहरदोँ दुलाराइ मिथिँगानि गासैबो
दाउसिन-दाउला मेथाइ रोजाबदोँ
जाय फारा-फारि हाबायाव अखा बयनिबो
-
लोगो बेसेबा अनसुला नोङो
मेगनखौ खेँबाय आङो
थमेनदोँ गेवलांदोँ बिबार खुसियाव
गोसो जादोँ थांखि फारसे सिमांआ
-
आंनि मोखांखौ नोँनि मोखांआव होबाय
नोङो दिनै आंनि गोरबोआव थादो
जेरै नोँनि सोरांआव आंनि सौथुनाय जाया
लोगो बयनिबो थुलुंगा जादो
-
थैथारनाय बायदि आं जेब्ला उन्दुलाङो
अब्लाबो नोँनो आंजोँ थायो
नुयै मिथियैआव आं नोँखौ बावलाङो
थेवबो हर सान जानानै नोँनो थायो
07/06/2016