अरननि दाइरि 2.01 सिगुण हाजोनिफ्राइ Poem by Ronjoy Brahma

196
''बेबादि बेसेबा समायना
बहा थायो? बबे सोर्गोआव-
बिलाइ खिलियो बोथोरजोँ बिलिरजाना
बहा नुयो लैथोआव? हायेनाव-''
197
फुंनि खोलो खोलो बारनाय बारजोँ
साननि सुदेम दुंब्रुद बिलिरनायाव,
आरो बिफां-लाइफांखौ नायै नायै
मेथाइ रोजाबदोँ सिरिया रुम्बांआ।
198
बियो दिनै जोबोद खुसि
बे अरननि गोदानसिन मिथिँगाखौ,
आरोबाव नायनो गोसो जादोँ
गोरबोजोँ सिनायथि जानो सानदोँ।
199
समायना रमायना जेरैबो
बिफांनि बिलाइ गोरलै बिथराइ,
गासैखौबो नायै नायै समायनायै
एमनि खुलियाव फैफिनदोँ रुम्बांआ।
200
अरना एमावनो जिरायना दंमोन
सिरिया रुम्बांआ सोँनायसै-
''बे अरनाव थाफैनाया नोङो
बेसेबा गोबाव जाबाय जानो हागौ।
201
नाथाय नोङो सोर?
नोँहा आरो रावबो गैया नामा?
बे अरननि गासैबो दाउसिन-दाउला
जिब-जुनार सिनायजोबगौ ना? ''
202
बेसेबा गोलाव सोँनाय बियो
ओजोँ बाथ्रा मोनसेनिबो,
फिन्नाय होनो हाया अरना
गावनि सालायखौ फोलावनानै।
203
रुम्बांआ आरोबाव सोँबाय-
''नोँ राव रायनो रोङा नामा?
नोँ रायज्लायनो रोङा नामा?
ना आंनि बाथ्राखौ बुजियाखै? ''
204
अब्लाबो अरना जेबो बुङा
रुम्बांआ आरो बुंबाय-
''नोँ आंनि बुंनायखौ बुजियो
नाथाय राव रायनो रोङा? ''
205
रुम्बांनि खुसिनि मोखांआव
अरननि मोखांनि नोजोरा गोग्लैदोँ,
बियो अब्ला फिन्नायसै
खौखाबनि फावखौ थिख खालामबाय।
206
सिरिया रुम्बांआ खुसियै बुंबाय-
''आं बेबादिनो सानहांदोँमोन,
जेखायानो जाया दिनै सानैजोँ
बे अरनखौ बेरायनि।
207
मिथिगौना ओइ सेंग्रा-
बे समायना अरना बेसे समायना?
बे अरनजोँ आंबो सिनायथि जानि
बे अरननि आंबो बारसे जानि।'
208
गोथै फलाननि जलंगाखौ
रुम्बांआ सैनानै लानायसै फाफ्लियाव,
खाबसे जोँफ्रुदखौ लानायसै
बियो आरो दै बथलखौ लानायसै।
209
समायना अरननि बिखाजोँ
बिसोर खुसियै एब्रेनायसै,
अरन गेजेर गेजेर बिसोर दानिया
सिगुण हाजोखौ बारलांगोन।
210
सोमखोर सिगुण हाजोखौ
गिदिँ गिदिँ नायदोँ बिसोर,
आरो सिगुण हाजोनिफ्राय खुसियै
लायदर हाजोसिम थांगोन।