अरननि दाइरि 2.03 गिरि दैसानिफ्राइ Poem by Ronjoy Brahma

237
जेब्ला अरनाव हाजोआव आन्दो जाहैयो
अब्लानो रुम्बांआ गिरि दैसानिफ्राय,
आफां फारसे मोखां जानायसै
खारस्लिउ खारस्लिउ थाबायनायसै बियो।
238
उनाव दखनाया नांथा नांथा जानायलाय
दखनाखौ खुबाय बियो,
आखायाव दखनाखौ लानानै
जोबोद गोख्रैयै दैसा सेर सेर खारनायसै।
239
बेसेबा गिदिर गौथौ अरन
बे अरननि दैसा गिरि दैसाया,
सा-खोला सानजा-सोनाब
जेरैबो आन्दायनाय रुम्बांआ।
240
बबेजोँ मा जायगायाव सहैयो
जेबो मिथिया बियो,
थाबायलाय खारलाय बेबादिनो
खोला फारसे मोखां जादोँ बियो।
241
बेबादिनो गिरि दैसायाबो मोनसे समाव
थुंगे फैबाय मोनसे बालाबारियाव,
बेसेबा गुवार बालाबारि बियो
सेरेप सेरेप बालाजोँ बुंनाय।
242
सिरिया रुम्बांनि थाखाय
बिनो दिँग्राय बिन्दो जाफैबाय,
बबेजोँ सानजा-सोनाब?
बबेजोँ सा-खोला?
243
जेबो दिग हमनो हायाखिसै
बे समाव अब्ला माब्लाबानो,
सोनाबहा साना हाबलांबायमोन
जारौ नायहरना दंसै बियो।
244
रुम्बांआ सान हाबनाय मोखांजोँ
लासै लासै जेब्ला थाङो,
अब्लाबो साना गोमालांबायमोन
बिनि मेगननि सिगांआवनो।
245
बुहुमा खोमसि जाबाय
जेबो आरो नुनो मोनलिया,
खोमसिजोँ बेँखन जानाय
गाम्बारि अरनाव सफैबाय बियो।
246
नाथाय रुम्बांआ जेबो मिथिया
थाबायदोँ अरन गेजेर गेजेर,
अरन गेजेरनि आरोबाव
सुज्राय बिलोआव सफैबाय बियो।
247
हराव जोँनाय अख्रांनि हाथर्खिजोँ
सुज्राय बिलोनि दैया जोँखांदोँ,
नाथाय बियो जोबोद लेथ्रा
जोबोद मोनामनाय मोनबाय रुम्बांआ।
248
हराव जेबो नुयै जानानै
बेसेबा उखै जानानै थानायसै,
फांसे बिफांआवनो गाखोनायसै बियो
हरसे सहायनो हायै उखैनायजोँ।
249
खोलो खोलो बिलाइ गोरलैनि बाराव
बियो गोबां गोजांनायसै,
गावनि दखनाखौ जोमनानै
बिफांआव बाबथाबना थानायसै।
250
हरसे खोमसिखौ बेबादिनो
बिफांनि दालाइयाव बारहो हरबाय,
हराव बियो उन्दुलांनो हायाखै
गोरबोजोँ बियो गाबदोँमोन।
251
साना फिन हानजा फैसालिनिफ्राय
खुसियै ओँखार बोफिनोब्ला,
फुंआव सासे फलाना बिखौ नुदोँमोन
बियो जोबोद सोमोनांदोँमोन।
252
दखना खाख्लोमनानै थानायखाय
बियो सिनायनो हायैयाव,
गावनो सिरि सिरि थांनायसै
गिस्रोम गिस्रोम बियो गोख्रै थाङो।
253
दान्दिसे उनाव खाथियाव बहाबा
सिलाइनि सोदोब खोनादोँमोन,
रुम्बांआ बाग्दावखांनायसै हरखाबै
जल्दब लुथुर-फुथुर गोग्लैनायसै।
254
अब्लाबो बियो उदिस मोनबाय
गाव बिफां सायावनो दंमोन,
खोमसिखौ हगार हरदोँमोन
हर थांबाय फिन साना फैफिनबाय।