अरननि दाइरि 2.09 सिरिया सानहाबनायनिफ्राइ Poem by Ronjoy Brahma

416
सोरांनाय लोगो लोगो अरनाव
जेरैबो दाउसिन-दाउलाफ्रा गाबस्रावबाय
सानजानि जोँमा साना गुरैयै
बुहुमखौ गोबाना लादोँ समायनायै।
417
जेरैबो साना बुहुमखौ सोरां होबाय
उन्दुनायनिफ्राय सिखारना रुम्बांआ सियायबाय,
बियो अरनखौ मोदोम नारना फोजाबाय
अरना लासैयैनो सिखारनायसै।
418
हरसे दुखुजोँ गाबनाय बिनि मेगनाव
गोरान मैखिया रानथाबना दं,
सिरिया रुम्बांआ बिनि मोखांआव
गुरै नायनानै मिनिस्लुबाय।
419
नाथाय सिरिया अरननि राव रायनो रोङैखौ
गोसोजोँ सान्नानै एसे दुखु मोनबाय,
बियो गावनि मेगनखौ बेसेब्बाय
आरो मोदै गसर होबाय थरथिँसे।
420
बेबादि राव रोङै मानसिजोँ
बेसेबां गोबाव थाबाय थाबावनो?
बियो गोसोजोँ गोसो सानबाय
अरना बिखौ दलरै नायगोमोबाय।
421
बिनि मोखांआव खोमसिनि साया नांबाय
सिरिया अरननि मेगनाव सिथाबना थानाय
गोरान मैखिखौ हुगारना होनायसै
बिनि उनाव गोजोँ मिनिनायसै।
422
बियो अरननि आखायाव हमबाय
आरो दैसा फारसे बोलांबाय,
फुंनि खोलो खोलो बाराव दैसा सेरनि
बिफां-लाइफांआ समायना महरै मोसादोँ।
423
दैसा सेर सेर दाउसिनमोना
बिफांआव बादोँ आरो खायसे दैसायाव गेलेदोँ,
गोगो दैसाया जोँखोल महरै
खोला फारसे आलो आलो बोहैदोँ।
424
जेरैबो सोरां आरो गोजोन मुस्रि
उदां गाब लादोँ फैलाव अखोरां,
हाजोआ दाद गसंना जेरैबो
अरननि बिफां-लाइफांखौ नायहरदोँ।
425
रुम्बांआ अरननि आखायाव हमना
दैसा सेरनि थरसे अन्थायाव जिरायबाय,
बियो गावनि गुरै आखायजोँ
दै खावखांना अरननि मोखांखौ सुना होबाय।
426
बिनि उनाव गावनि मोखांखौ सुनायसै
अरना अनथाव बाथाव जानानै
बियो सिरियाखौ नायबाय थानायसै
मिनिसुलु बेसेबा खुसि रुम्बांआ।
427
अरननि नायबाय थानायखौ नुनानै
सिरिया रुम्बांआ मिनिस्लुयै बुंबाय-
''नोँ मा सानदोँ आं मिथिनो जोबोद लुबैयो
नाथाय नोँदि बाथ्रा बुंनो हाया जाबाय!
428
अरन नोङो आंखौ मोजां मोनो
आं रोखायै मिथिगौ जेब्लाबो,
नाथाय नोँनि जिउनि गासै सल'खौनो
आं मिथिनो आरोबाव लुबैबावो।
429
नोँनि अन्नाय रावजोँ नोँनि गोरबोनि
गासै बाथ्राखौ आं खोनासंनो लुबैयो,
नाथाय नोँबादिनो बे दैसाया राव रोङा
बे अरननि गासैबो राव रोङा!
430
अरन आं नोँखौ मोजां मोनो
गावखौनो खाफाल गोनां होन्नानै सानो,
नोङो आंखौ बामखांनानै लाबोदोँमोन
बेसेबा खुसिमोन नोङो आरो अरना।
431
अरन नोँ आंखौ गावनि खालामदो
आं नोँखौ सिबिबाय थागोन,
अरन नोँबादिनो आंबो बबि जायोब्ला
बेसेबा गोरोबलायथारगौमोन हाबाब!
432
जोँ सानैजोँ गोबां रायज्लायगौमोन
गोरबोजोँ गोरबो आरो फावजोँ फाव,
नाथाय नोँ राव रोङै बबा
आं जाबाय राव गोरोँ।
433
अरन नोँ सानसे राव रोँगोन
आं दिनैनिफ्राय सानजानि ओँखारजेन्नाय
सान गोरलैखौ खुलुमगोन नोँनि थाखाय
अरन आं फोथायो रजे।
434
अरन आं नोँखौ मोजां मोनो
बेबादिनो नोँनि खुगानिफ्राय-
आं खोनासंनो लुबैयो जेब्लाबो
मोजां मोन्नायनि गोदै राव।''
435
बेबादि बुंनानै सिरिया रुम्बांआ
मिनिनाय मोखांजोँ अरननि सेराव जिरायो,
आरो बियो अरनखौ गोबायो
खोलो खोलो बारा बिसोरखौ बिलिर फैयो।
436
उन्दै उन्दै दैसानि नाफोरा
बाज्ल बाज्ल रंजायो दैसायाव,
अन्थाइ खनायाव नाथुरमोनो
बिसोरखौ थमेन नुजाना नायहरो।
437
उदां अखोरांखौ गुफुर जोमैया साग्लोबो
समायनायै दाउसिनफोरा सिँखावो,
दैसानि मासे दाउसिन फैनानै
सेराव लानजाइ सोमाव फैयो।
438
दान्दिसे उनाव बियो बिरलाङो
सानजानि अरन फारसे लासै लासै,
बेसेबा गोजोन आरो दुंबुर
सानजानि साना लासैयै थिखिनि मोनो।
439
सिरिया रुम्बांआ गावनि उखैनायखौ फोरमायो
अरना बिखौ लानानै खुसियै
सानजानि अरनाव लासैयै थाङो
बिसोर उदै बुंजासे बिफांनि फिथाइ जायो।
440
बेरायै बेरायै मोनाबिलियाव
बिसोर फांसे गिदिर बिफांनि सेराव
बिलाइ गोरान बुथुम बुथुम
बेयावनो गोजोनै हराव उन्दुलाङो।