Ronjoy Brahma

Gold Star - 35,125 Points (2 November 1995- / Amteka (Chirang) /Assam, India)

निनिमा (25) : बर' हारिनि उदांस्रिनि बिथा - Poem by Ronjoy Brahma

बर' हारिनि उदांस्रिनि बिथा,
बर'नि उदांस्रि सोमावसारगिरिफोर-
गुरुदेब कालिचरण ब्रह्म,
बड'फा उपेन्द्र नाथ ब्रह्म
मुं मिथिजोबै गोबां गेदेमाफोर
बिसोर जोँनो हानायमानि लामाखौ दिन्थिना गालांबाय।
नाथाय हावरिया जोँ खाफालनि सायाव सोनारग्रा,
बिथां गेदेमामोननि लामाजोँबो जोँ हान्थिनो हायाखै।
बेनि थाखायनो जोँनि आवगायनाय थांखिसिम
दाबो मोनाखै सौहैयाखै।
जोँ सोमावसारनांगोन आलादा हादोदजोँ लोगो लोगो
जोँनि थुनलाइखौ साबना हामना,
समायना रैसुमै राव-हारिमु,
रांखान्थि-राजखान्थि गासैखौबो गोगोमै।
जौगानायनि मिजिँ लानानै,
गोख्रोँ गोसोयै गोगो मेलेमै,
गोथारै गावखौनो बावसोमनांगोन।
बारा गोलाव बुंनो सानाखै,
बेखौल'नो बुंनानै दोनदिनि-
मोनफ्रोम नंगौ सोमावसारनायखौ
जोँ दोननो नाङा।
मानोना लैथोनि सोमावसारनाया बिनि गुथालासो।'
ड॰ बिरखांनि अनसुलि बिसि
मुस्रिमा बिबारि ब्रह्मआ बिबुंथि होबावदोँमोन-
'जाय हादोदआव दिनै उदांस्रिनि अर,
ब्लाव ब्लाव अर जोँनो हमदोँ।
जेराव हौवा हिनजाव,
सेंग्रा सिख्ला गासैबो
आलादा हादोदनि थाखाय
ओँखारबोदोँ जांख्रिखांदोँ गिर्जाब गिर्जाब-
फावसायनाय गैयै गावखौनो बावसोमदोँ।
बे सोमाव सारनायाव आं
जोँ साफ्रोम लाइमोन आरो
दुलाराय आयजोनिबो गोगोम बाहागो लानांगौ दं।
संसाराव उजिदोँ बयबो
मोनसे नङा मोनसे हाबा दं
हारि आरो हादोदनि थाखाय मावनांगौ दं।
गावखौ दा बुथार,
गावखौ बुथारनाया गिदिर मोनसे फाफ।
सानसे समाव आंबो आलाय-सिलायमोन
आं थैनो ओँखारदोँमोन नाथाय-
आंनि सानस्रियानो आंखौ हमथादोँ।
जाय समाव आङो
हाया हाया गेदेमाफोरनि बोसोनखौ
सोलिनो नाजादोँमोन।
आं बुंनो गोसो जायो दिनै-
मुवा मोनसेनिबो जोँ जुदि
हारि सुबुं आरो हादोदनि थाखाय
गाहाम हाबा मावनो हाया,
नंगौ जोँनि बे जिउआ बेसेन गैया।
बेखौ आं बै समाव बुजिदोँमोन।
नोँथांमोना मिथिबाय जानो हागौ सोरबा सोरबा-
आंबो सासे बिमा बिफानि गुमुर मोनै
आलाय-सिलाय मावरियासो।
थेवबो आंनि सानस्रिया बुफ्लै जायै
जोबोद गोफार आरो गथा।'
गावनि समायना जिउ सल'खौ
बियो दाजाब देरो,
गोदै मिलौहाब थुलुंगानाय जायो
गावनि मोजांथार सल'आ।
रायजोफ्रा सोरबा सोरबा गाबदोँमोन,
फेरलेबसे दुखु खालामदोँ,
थरथिँसे मोदै हुगारो गोबांआ।
बिबारिया बिबुंथि फोजोबनायाव रायजोफ्रा
गोमलायनाय ख्रब ख्रब आफा खबदोँमोन।
समायना रमायना गोमो गोथां
बायदि गाबनि बिबुंथि,
सेंग्रा सिख्ला बेरफ्रावनाय दिनैनि बे मेला
जोँमानि सोनाब फैसालियाव
लासै लासैनो दोबैलांनायाव थुंगेलांबाय।
बयबो रायजो राजाफ्रानो
गथ' गथाय सेंग्रा सिख्ला लाइमोनफ्रानो थुलुंगानि दाहारजोँ
गाव गावनि बिखाखौ सिगां फारसे लानानै
हानजा हानजा न'फारसे फैफिनबाय।
-
मोनानि जानायखौ जानानै
गावनि आलांगि टिबिलाव
सल'मा लिरनायखौ जुरिफिन्दोँ सोमखोरा।
गोबाव सानसिम सानफ्रोमबो
खनले खनले मेल मिथिँ गाबाय बायनानै
मेँख्रुब मेंख्राब लिरनाय जाथाराखै।
दिनैसो आरो थांनाय द' खोन्दोनिफ्राय
आरोबाव सानहाब सानहाब जुरिफिन्दोँ।
गोसो होना लिरदोँ आरो लिरदोँ बियो।
जानाय खालाय दैफोनखौ बोस्रांनानै
ओँखाम संग्रा न'खौ फांनानै
उन्दुग्रा न'आव हाबफैदोँ निनिमाया।
बियो जेबो बुङाखिसै
फिसाय सोमखोरा लिरनायाव मुखुब।
सानथामसो सिगांआव जालांबाय जथुम्माया
बिनिफ्राय निनिमाया लाइसि गांसे लाना फैदोँ,
सिनायथि आफादनि खुगा लाइसि।
सिरियै लासै लासै बियो फरायनो लाबाय
दलरै बिसिनायाव जिरायनानै।
बोरैबा गांसे बिलाइ बोलायालाबानो
सथासे बोलानायाव जोबहांनाय बिलाइयाव
हांमा लिरनाय दोँसे 'जांख्रिखांनाय' मुंङै खन्थाइ मोनफ्लांदोँ।
हांमायाबो सम सम लाइसि, बिसम्बिफोराव खन्थाइ हरो
गावनि बुंनो गोनां बाथ्राखौ लिरै लिरै।
बेखौ निनिमाया सिगांनिफ्रायनो मिथिगौ।
नायनि बे खेबाव हांमाया माबादि लिरदोँ-
गोसो होना सिरि सिरि फरायदोँ बियो-
'जोँनि आब्रा उदांस्रि सोमावसारनाया
थार जोनोमनि मोन्थाइखौ
गोथोँ आसि थुनानै।
फोजोबस्रांगोन आं सुथुरखौ
सोलो बोलो बिखा फोर्दाननानै
हेँथा होनाय सोर बे सुथुरा?
सान्दोँ नामा सुथुरा-
जिउ दावहायाव जेन्नाय
हारिखौ अराय खारलुं बिखानि।
आं जाद हायनारि
जागोन आं देरहासादगिरि
बर' आयनि बोर लाना।
आं गोदान खिलिनाय बिलाइ
बयनोबो होगोन गोदान मिजिँ
सोमखोर गोरबो जांख्रिखांनो।'
गोसोजोँ गोसो गावनि होनांगौ कमेनखौ
मिनिसुलु होबाय निनिमाया
'बा! फोजाङानो जादोँ' होन्नानै।
बिनि मोनसे उनजोँ बोलानानै
मोनसे फेस्ला मोनो बियो।
गोसोजोँ गोसो मेगन होनानै सिरियैनो फरायो-
'A- आदैया बबाव थादोँ मादै?
B- गैया आदै दासो दुब्लियाव
लावथि लाना मै होनो थांदोँ।
A- हाब मादै, माब्ला बबेनि
दुब्लियाव मै फैस्लाबखो?
आरो बेबादि लावथिजोँ मैखौ
बोरै मोन्नांगौ जाखो?
र' आंबो अनलानि सिलाय गादाखौ लायनि।
(खारलाङो- बुरैया मिनियो) '
निनिमाया एसे खर' फिदिँनानै
हि: हि: हि सोदोब ओँखारनाय मिनियो।
सोमखोरा हरखाबै गुरलाब बाग्दाखाङो,
बियो आरो सोङो-
'मा जाखो! माखौ मिनिखो? '
लेखा बिलाइखौ मिनि मिनि आसि थुनानै दिन्थियो
निनिमाया अनथाव-बाथाव-
'नायलाय, नायलाय माबादि फेस्ला लिरदोँ-'
' सोर बेलाइ? '
' जानो बबेनिथाय मानसिया?
मुङा गुरब्लां।'
' बेनो बिनि देरहानाय,
नोँ मिथिया नामा?
फेस्ला लिरगिरिया फेस्ला लिरनानै
फरायगिरिखौ मिनि होनो बेसेदि नाजायो।
गावसिनि थांखिया जाफुंबानो
लिरगिरिफोराबो गोजोनो आरो
बिसोरनि रेबगना गोफादसिन जायो,
लिरनो बिसोर बांसिन थुलुंगाबो मोनो।
मानोना लिरगिरिफोरा सोनारो
फरायगिरिफोरनि सायावनो।'
मिनिनानै बुंबावो निनिमाया-
'हि: हि: हि: जा मिनिथाव जाखादोँ हाय।'
' उन्दुदो, जि बाजिबाय।'
निनिमानि मोखांआव अनथाव-बाथाव नायो सोमखोरा,
निनिमाया मिनियै मिनियै बिसिनाखौ
स्राय स्राय गामसाजोँ बुस्रि स्राङो।
सोमखोरा गावनि लिरनायखौ जोख्लोबो,
फिल्टाराव सोनाय दैखौ
गिलासाव आजावना खेबसेयैनो लोङो।

Topic(s) of this poem: poem


Comments about निनिमा (25) : बर' हारिनि उदांस्रिनि बिथा by Ronjoy Brahma

There is no comment submitted by members..



Read this poem in other languages

This poem has not been translated into any other language yet.

I would like to translate this poem »

word flags


Poem Submitted: Monday, September 21, 2015

Poem Edited: Monday, September 21, 2015


[Report Error]