गोरबो इसिँनिफ्राइ -25 Poem by Ronjoy Brahma

खोमसिया साग्लोबबाय
आफा
आंनि गोसोखौ
आरोबाव सोमजिबाय
गुबुंले आंनि गोरबोआव
नै राहागिरि जोँमा
आय-आफा
बेयोदि हामाखिसै आंनिया
-
अबं आरोबाव बिरलांबाय
खुगानि रावआ
खेसेरनि हाब्रुआव सिथाबना
नै दिनै बुजि मोन्दोँ
आं आफा-
आरोबाव बांबोबाय
आंनि जिउआव
गिथाव हाखर जमनि
-
नोँनि सोरांनि सायख्लुमखौ
एरायनानै
थाबायलांबाय आं गिथाव
लामाजोँ
-
बोखांदो बोखांदो आफा
आरोबाव आंनो खैफोद हरदो
बायग्लिलांथोँसै गुबुंले
अन्थाइ जानाय
आंनि गोरबोआ
सिबिरोङै नोँखौ
अहंखार गोसोआ
-
दोबैना दाथा-थोँसै आं
गेसाव खेसेरनि हाब्रुआव
सोरांजोँ आफा
आंखौ सोरांजोँ
बोलांदो
-
राहागिरि जिउनि नोँनो आंनि
गसाइ खोमसिया साग्लोबबाय
आफा आंनि गोसोखौ
सोरां जाना फै नोङो
गसाइ नै नोँनो आंनि लोगो
-
बे गुबुंले जानाय गोरबोखौ
नोङो अखा जानानै सुस्र'फै
बार जाना बुखार लांफै
लोगो आंनि नंखायखौ बुथारफै।