Ronjoy Brahma

Gold Star - 35,125 Points (2 November 1995- / Amteka (Chirang) /Assam, India)

निनिमा (26) : जेरैबो सिरि जाहाब्बाय - Poem by Ronjoy Brahma

जेरैबो सिरि जाहाब्बाय,
दरजा खिला मारिनानै
आरोबाव लाइटखौ खोमोरनानै
बिसोरो खोमसियैनो उन्दुबाय।
-
फुंनि गु रिँगासो समाव फुंनि साहा लोँलायनानै
न'नि बयबो ज'यैनो रायज्लायलायदोँ
निनिमा दाम्बु बिलिमोनहा।
सम दोरोदलांनाय दसे उनाव
बोराय दाम्बु आरो बिलिया थांदोँ टि.भिनि खथायाव।
बिसोर दाना टि.भि नायनो
मोजां मोनग्रा जाबाय इनायनो।
बिसोर सम सम सिरियाल नायो,
रामायण महाभारतखौ बांसिन नायो।
ओजोँ मिथिँगा आरो निनिमामोनहा
बायजोआव सावरायज्लायबाय थाबाय मिनि हाला हाला।
मिथिँगाया बांसिन निनिमानि मोखांआव
सिरि सिरि नायदोँ सौग्राव सौग्राव।
निनिमाया गुरैयैनो बुङो-
'मिथिँगामोनाथ' दिनै थांफिनगोन-'
मिनिसुलु जायो मिथिँगाया,
बियो आरो फिन बुङो-
'औ थाङाब्ला जायो,
सासे सरकारि बान्दा जानानै।'
'सासे प्रफेसार जालायनानै,
गुण मेलेम गासैबो थानानैबो
सोरनिबा बान्दा जायो नामा? '
मिथिँगाया मिनि मिनि बुङो-
'मानो जाया जानो?
सरकारनि बिथन जाग्रा नालाय
सरकारनि बान्दाब्रा बाजै।'
'जालायखो बान्दा, हि: हि: '
दसे सम बयबो मिनिदोँमोन
हुरागासे गोमलायनायमोन।
बयबो सम दोरोदनायजोँ लोगोसे
सिरि थाफिनो सासेनि उनाव सासे।
समायना लाजिसुलु गुरै
निनिमाखौ नायनानै मिनिखैरोयै
मिथिँगाया बुङो लासै लासै-
'बाजै! नोँबादि सासे लोखि बिबाजैखौ
आं बोरै लोगोमोनखो?
बियो खाफालनिसो बाथ्रा,
आं खाफाल गोनांलै बाजै।'
एसे एसे लाजियो बियो
गावखौनो गाव खर' गिदिर मोनो,
बाखोनायोब्ला बयबो खर' देरो
बिनि गोसो गुदुं गियान बाराय देरो,
निनिमाया फेस्लायैनो बुङो-
'लोखि जालायखो सोरनिबा!
ए-र' बिदिब्ला राणीबादि देखायनोसै एबार।'
मिथिँगाया थाबनो बुंहरफिनो-
'राणीबादि आरोबाव देखायनो रोँबाथ'-
आरो दाबुंसैलै बाजै।'
निनिमा जिथिना सानैबो मिनियो,
मिथिँगायाबो सिरियैनो मिनिफायो।
बयबो सिरि थाहाबनानै थायो
मिथिँगाया गुरै गारांजोँ सोङो-
'बाजै नोँ आदाजोँ माबोरै लोगो मोनलायना
दिनै बेसे खुसियै जुलि जालायफैखो? '
सोँथावै बाथ्राबादि मोन्दाङो निनिमाया,
थेवबो एसेबां सोँथावैबो नङा।
निनिमाया लासै लासैयैनो खिन्थायो-
'सोरजिगिरिनि दैथिँनायखौ रावबो
बिजिरख'नो हाया आगै खेबसेबो।
बेखायनो जोँ बुङो सोरजिगिरि,
सोरजिगिरि सोरजिगिरि होनना बुंनाङो,
सोरजिगिरिनिनो गासैबो गेलेहोनाय।
आं बुंनो सानो आरो फोथायोबो
आंनि बरादआबो सोरजिगिरिनि मोनसे।
खोनासं आगै बिदिब्ला-
जेब्ला आं गोजौ फरायसालियाव फरायो
आं अब्ला बंङाइगाव कलेजखौ गोसो जायोमोन।
गोजौसिन गेजेरारिनि पि.इउ आनजाद उथ्रिना
आं गोसो खालामनाय कलेज,
बंङाइ कलेजआव मुं थिसन फैयो।
लासै लासै खेबसेयै
नोंदाजोँ आं लोगो मोनलायो।
लासै लासै बिदिनो जोँनि गोसोनि खोथाफ्रा
गासैबो बेरखांजोबनानै खेबसे
गोसो गोर्बो गोरोबलायो।
जोँ सानैजोँ गोसो गोथारै
मिनि खुसियैनो मोजां मोनलायो।
नाथाय फरायनाय समाव हेँथाया फैयो
गोरिब हावरियाफोरनि न'खराव,
आंबो नाथाय बे जेँनानिफ्राय बारग'नो हायाखै,
बे जेँनाया एसेल' नङामोन होनना बुंनो नांगोन।
जायनि थाखाय आं फरायनायखौ खेबसे
नागारनो गोनां जाथारबाय।
आंनि दुखुआ एसेल' नङा,
नाथाय बियो अनजालुखौ मोजां मोन्नाय,
जुलिनि रादाय फेलेँ जाजानो गिनाय,
नेवसि जानो गिनाय नङा।
आंहा दिनैबो जोनोमनि थं गैया,
आय आरो आफानि जेबो मिथिया,
आं सासे मावरियासो
खांजानाय सोरनिबा आखायनि फिसासो।
आंहा दुखुनि रुगुं गैया
गोसोनि मोदैया जिराय गैया,
दाबो जिरि जिरि बोहैयो मिथिँगा!
बैसोआबो जाबायमोन एसे
जुलि जानो जिउआव खेबसे,
खांनाय अनख' आयफाया आंखौ
बिदिनो हरबाय सानसे,
नोँदा सोमखोरनि आखायाव गथायना! '
मोदै ज्राम ज्राम मेगनाव
दुखुखौ बाहागो मोनफादोँ बिबो,
मिथिँगाया लासैयैनो बुङो-
'अ' बिदिसो जादोँ बाजै! '
'औ आगै! '
मिथिँगाया एसे जंखायना बुङो-
'सल'खौनो दोँसे लिरगौमोन बियो,
खोनानाय मोनब्ला नीलकमल ब्रह्मआ।'
'औ हाय आगै हि: हि: '
मिनियो बियो गोजोँ हाथाय खिथिनानै,
जिथिनायाबो बिदिनो मिनिफायो।
'दे बाजै बेयो आंनिनो
जोबोद गोमोथाव आरो
गोजोँ खाफालथार जानांगौ'
'सानजौबाय हाय आगै,
ओँखाम संनो नांसिगोन।
दा नङाब्ला नोँदाया
उखैख्लाबना बेर्ला-बेर्था जाफैलायगोन,
गाव उखैनाय समाव मोनजायाबा
रागा जोँनाय मोनसे
गिलुबालु बेराम दं बिनियाव।'
मिथिँगाया खैखायैनो जंखायना बुङो-
'बेबादि बेरामा आंनावबो दंलै बाजै,
गोख्रै संदोसो माबार।'
जंखायनाय रावै
जिथिनाखौबो नायनानै बुङो बियो-
'थांदो नोँबो लोगो लाफादो'
'बिदा फंबाय बिमा सासेनि फिसाखायनो
बिदिनो एखेथार बिसोरो'
बाथ्राखौ मिनिसुलु फोजोबनानैनो
ओँखाम संग्रा न'फारसे लासैयै
हाबलाङो निनिमाया।
जिथिनायाबो लोगो लोगो थांफायो-
मिथिँगाया मिनिसुलु नायहरो।
-
सानजौफुनि जाखां-लोँखां जयैनो
बिसोरो नारेँ जुमब्रा सायायाव
मिनि खुसि जिरायदोँ।
निनिमाया खुसियैनो सिरि सिरि
'सिनायथि' लाइसिखौ लानानै
सोरनिबा खन्थाइ, रायथाय
सुंद' सल'फोरखौ फरायग्लांदोँ।
फरायै फरायै गेजेर खलबाव
सुखुराम ब्रह्म लिरनाय
'जमगावनि जारिमिना दुखु गोनां'
मुंथियै गिदिर गिदिर हांखोजोँ लिरनाय मोनो।
जोबोद गोसो होनानै सिरि सिरि
फारि फारियै फरायलाङो।
आयदानि जागायजेन्नायाव लिरगिरिया बुंदोँ-
'जोबोद दुखु गोनांदि
जमगावनि गुबै मुङा 'जोथोनफुरिमोन'
नाथाय दा जमगाव जाबाय।
जमगाव मुङा बर'नि दोन्नाय मुं नङा,
बियो गुबुन हारिनि राव
आरो गुबुननि सोदोब।
बेबादि सोलायलांदोँ गोबांनो
बेबादि बर'नि नंगुबै मुङा गोमानानै
गोबां गुबुन रावआव सोलायनायखौ
जोँ गोबां बिदिन्थि मोनो।
जेरै-
बाङाइ गामिया बंङाइगाव जानाय,
बासुगामिया बासुगाव जानाय,
दालिगामिया दालिगाव जानाय,
गोदोनि बर'नि जिल्ला ओनसोलफोरा
गुबुन हारिनि रावजोँ मुं जाजोब्बाय।
बर'नि थि मुङा गोमालांनो नागिरबाय।
जेखियानो जाया बेयावहाय
माबोरै जोथोनफुरिया जमगाव जाखो
बिनि गुदि जारिमिन संनो नाजादोँ।

Topic(s) of this poem: poem


Comments about निनिमा (26) : जेरैबो सिरि जाहाब्बाय by Ronjoy Brahma

There is no comment submitted by members..



Read this poem in other languages

This poem has not been translated into any other language yet.

I would like to translate this poem »

word flags


Poem Submitted: Thursday, September 24, 2015

Poem Edited: Friday, September 25, 2015


[Report Error]