अरननि दाइरि 3.02 सिरिया गाथोननिफ्राइ Poem by Ronjoy Brahma

484
नै बोसोर फिसाय सुखारुआ
बिखौ नागिर नागिर फाग्ला जाबायमोन,
गावनि दुखु आरो दाहाजोँ बियो
जेब्लाबो सुफिन सुनो हमो।
485
जेब्ला बियो बिसि रिँखिखौ नुयो
अब्ला जोबोद गोमो हाब्बाय,
बियो जोबोद खुसि जाबाय
आरो गोख्रैनो दिङायाव दिखांबाय।
486
जेब्ला दिङाया दैमा गेजेराव सफैयो
अब्ला आयुमाया गाथोनाव सफैबाय,
बियो गथ'खौ बामना लाबोदोँमोन
आरो लोगोसे हाग्रानि फिथाइ गोमोन।
487
बिनि मेगनाव मोदै रुरु गनायसै
बियो रागा जोँनानै खेबसे होख्रावनायसै,
रागाजोँनो बियो गथ'खौ दैयाव फिउ गारहरबाय
मानै बारलिया गथ'खौ साबखां फैबाय।
488
आरोबाव आयुमाया दैमायाव बाज्रुमनायसै
बियो दिङाखौ होसोनो हमबाय,
नाथाय दैमाया बिखौ फोजावबाय
बियो द्रोद द्रोद गोजावलांनायसै।
489
गावनि ब्लां ब्लां खुगायाव लानानै
बारलिया दावनो हमबाय,
बारलि जोआबो उन उन दावबाय
मोनसे समाव बिसोर सिरि गाथोन मोनफैनायसै।
490
मारुंआव बिसोर मानखोनो हमबाय
हालिसे बारलिया बोरियाव गाखोना
गथ'खौ बालायाव दलरै दोनबाय
बिसोर आरोबाव नायबाय थानायसै।
491
गथ'आ आथिँ जोब्राबो आरो
बेसेबा हब्रा हब्रा गाबनो हमो,
बेलारोम समाव मुस्रि बोराया
सिरिया गाथोनाव दुगैनो फैयो।
492
बियो गोजाननिफ्रायनो गथ'नि गाबनाय खोनायो
आरो गोख्रै गोख्रै खारबोयो,
अब्ला बियो दैमा गाथोनाव
मानै बारलिखौ नुना गोमोहाबो।
493
जुलिसे बारलिया देग' नायहरो
बिनि उनाव दैमायाव थ्रोब हाबो,
बेसेबा गुथाल जालायनाय बिसोर
सानस्रिना दैमा गेजेरजोँ दावलाङो।
494
लासै लासै फैनानै बोराया
गथ'नि गाबख्रावनायखौ नुफैयो,
बियो सानखौ नायहरना खुलुमो
दैमाखौबो बियो खुलुमो।
495
बारलि जुलिसेनि दावलांनायखौ नायहरो
बेसेबा गोजानाव गोमाहैयो,
मुस्रि बोराया दैमानियाव सोङो
बियो आखाय खबजबनानै बुङो।
496
''हे आय दैमा
मा मैया मैया जाखो बेलाइ!
बे गथ'खौ आंनो गथायबाय नोँ
आंनि सासेबो फिसा गैयैखौ नुनानै।
497
हे मानै बारलि मोदाय
सोरनि फिसामोन जाखो?
थारैनो नोँसोर आंनो होफैबाय
नोँसोरखौ साबायखर मोदाय! ''
498
बेबादि बुंनानै मुस्रि बोराया
जोबोद गोजोनै मिनिस्लुबाय,
बिनि उनाव बियो गथ'खौ
गावनि आखायजोँ बामखां गारबाय।
499
बेसेबा बोसोरनि उनावबो बियो
गथ' बामनो मोनैयाव
बिनि आखाया थोर थोर मावबाय
बामखांना बियो गोजोन्नाय मोनबाय।
500
दान्दिसेयावनो बोराया बेसेबा खुसियै
गोर गोर खारना नआव सफैबाय,
बालेँ बुरैया बोरायनि आगान खोनानानै
न' सिंनिफ्राय ओँखारना नायबाय।
501
बुरैया बोरायखौ ओरैबादि नुनायसैदि
बोरायनि मोखांआ बेसेबा सोरां,
बिनि खाफालाव दिनै सान ओँखारदोँ
बिनि मेगनफोरा बेसेबा गोजोँ।
502
बुरैया नुबावबाय गावनि मेगनजोँ
बारसे गेवलां बिबारखौ
बोराया गावनि आखायाव लादोँ
बुरैनि मोखांआव रंजानाय जाखांबाय।
503
बियो बोरायखौ नायगोमोबाय
दान्दिसेयावनो बोराया खाथियाव सफैबाय,
बियो बुरैनो दिन्थिना बुंनायसै-
''नैबे आय दैमानि फिसा।
504
आय दैमाया आंनो गथायबाय
बेसेबा बोसोर आर'ज गाबनायनि उनाव।''
बुरैया खुसिजोँ रंजाखांबाय
आरो गथ'खौ बियो खामनायसै।
505
सांग्रेमा बुरैया बिखौ बामनानै
गावनि बिखायाव बोजब्बाय,
बियो गोसोखौ स्रां मोनबाय
बियो सोर्गोबादि मोनबाय मुलुगखौ।
506
बिसोर गथ'नि मुंखौ दोन्नो सान्नायसै
बोराया बुंबाय सिरिया,
आरो जेब्ला बियो रुम्बां महर मोनो
बुरैया बुंबाय रुम्बां होन्नानै।