अरननि दाइरि 3.03 दाउस्रि फारानिफ्राइ Poem by Ronjoy Brahma

507
मिनिसिरि दैसा सेरावनो
दाउस्रिफारानि बयबो रायजो जादोँ,
मिनिसिरि दैसाया अरायबो बोहैदोँ
बयबो बेसेबा सुखु आरो गोजोन।
508
गामिनि मानसिफोरा मेगन सानायाव
मोनसे समाव मुस्रि आरो बालेँ बुरैया
दाउस्रिफारायाव खारबोना देरा लुबाय
गामिनि बयजोँबो गोरोबनो हमबाय।
509
सिरिया दैसायानो रुम्बांनि बिलोगोबादि
बेयावनो गेले गेये बियो देरबाय,
मोनसे समाव बियो लावख्रि बागानखौ बारना
सिगुण हाजो सेराव दुगैबाय।
510
जेसेबांनि सिख्ला देरनो हमदोँ
बांसिन बियो लाजिगुसु जासिनदोँ,
रावबो नुयै गाथोनावसो बियो
हार्सिँङै खुसियै दुगैग्रा जादोँ।
511
दाउस्रिफारानि गोरा गाहाया बुथब
बिनि फिसाज्लानि मुङा नेरसोन,
मदा-सदा बियो बोलो गोरा
बोलोआव जेना सोलोआव जेना।
512
बियो सिरियाखौ गोसोथोबाय
मुस्रि बोरायाबो बिखौ फसायबाय,
मोनसे समाव मोन्नै नखरनि गेजेराव
जुलिनि रादायखौ थि खालामनायसै।
513
लाजिगुसु सिरिया रुम्बांआबो
बे गोरोबनायाव गोसो दं,
बियो नेरसोनखौ फिसाय सिबिनो
सिरियै गोसो गोरबोआव सानबाय।
514
जुलिनि खालारखौ खालामनाय जाबाय
फैगोन बैसागु बायब्लानो,
बिसोरनि जुलिखौ होनो सानबाय
गामियाव बयबो रंजाखांबाय।
515
सानसेखालि हराव रुम्बांआ सिमां नुबाय
सासे बुरैया बिखौ बुंनायसै-
''फिसा नोँनि जुलिया फेलेँ जागोन
नोँहा बे जोनोमाव खाफाल गैया।
516
नेरसोना नोँखौ मोजां मोनो
नाथाय नोँ बिखौ नेवसिनांगोन,
थादो फिसा बे बाथ्राया सैथो
नेरसोना नोँखौ नागिरगोन।''
517
रुम्बांआ हरखाब सिरि मोनबाय
बियो सान्नो हमबाय,
फुंनि समाव नेरसोन फैनानै
सिरियाखौ लोगो हमफैनायसै।
518
जोबोद खुसिजोँ बियो बुंबाय-
''रुम्बां जोँनि जुलिया जासिगोन,
आं नोँखौ आलो आलो लाखिगोन
जोँ बेसेबा गोजोनै जिउ खुंगोन।
519
सिरिया नोँ बिबारबादि गोथार
थमेन्नाय गुरै आरो लाजिगुसु,
नोँनि मिनिनाय आरो रोजाबनाय
खोलो खोलो बारबादि सुदेम।
520
नोँखौ लानानै आं राजा जागोन
आरो नोँ जागोन रानि,
रायजो फिसाफोरा अन्नाय सिबिनायजोँ
नोँखौ जेब्लाबो गंग्लायगोन।
521
सिरिया दिनैनि बेलासि समाव
अरनाव आं सिखार खालामगोन,
नोँ जोबोद खुसियैनो था
आं मै नङाब्ला अमा लाबोगोन।
522
नै रुम्बां नायनायसाय
आं बोरलाया बेसे समायना,
बे बोरलाया आबौ होलांनाय
आबौआ मुंदांखा सिखारिमोन।''
523
बेबादि बुंनानै नेरसोना
गंसे जिलिदखौ अख्रांआव हगारबाय,
जिलिदा अरखि जोँनानै
गोख्रैनो जोमै सिँखावहैबाय।
524
आरो फालोसे बिरबायनाय
हांसो सिलारिया गाबख्रावनायसै,
थ्लथब मासे हांसो सिलारिया गोग्लैबाय
बियो बाब्राब बाब्राब थैनायसै।
525
नेरसोना बिखा आखायजोँ दैखांना बुंबाय-
''नै रुम्बां आंनि आखाया बेसे गोथोँ,
जोबोद मेजेम गोनां हांसो बियो
नोँनो आं बिखा गथायबाय।''
526
फालोसे हांसो सिलारिया फैनानै
रुम्बांनि सेराव बाफैबाय,
खाराव माराव बिखा फुवारना होबाय
नेरसोना आरोबाव बोरला बोबाय।
527
रुम्बांआ बिखौ गोख्रैनो हमथाना बुंबाय-
''बिसोरखौ दागावसै आरोबाव,
बे अख्रांआ खोमसि जागोन
अख्रांआ समायना गैयै जागोन।
528
गोजोन फैलाव बुहुमाव
दाउसिननि मेथाइ गोमागोन,
खोलो खोलो बाराव मोसानो
बिफां-लाइफांआ गंस्रिगोन।
529
नेरसोन आदा नोङो थांदो
बे गोथै हांसो सिलारिखौ
नोङो बान्था होनाय महरै
आंनो लानानै थांनोसै।''
530
बेबादि बुंनानै रुम्बांआ नआव फैबाय
बियो जोबोद दुखु मोनबाय,
नेरसोना बान्था होनो हानानै
जोबोद खुसि जालांनायसै।
531
बेलासि समाव रुम्बांआ खुसियै
मिनिसिरि दैसायाव दुगैनो फैबाय,
बेबादिनो अरना बिखौ दैसानिफ्राय
बामखांनानै गावजोँ लाबोदोँमोन।
532
सिरिया रुम्बांआ गोसोखांबाय
फिसा मिनिसुलु जानानै लासैयैनो,
बिलाइ गोरानाव गोजोन आरो दुंबुर
गोदो गोदो उन्दुलांबाय।