अरननि दाइरि 3.06 अरना राव रोँबाय Poem by Ronjoy Brahma

581
दान्दिसे उनाव अरना सिखारफिनबाय
अब्ला रुम्बांआ रंजाखांबाय,
समायना आरो गुफुं मोदोम
अरनखौ बियो नायनो हमबाय।
582
जेब्ला अरना राव होयो
अब्ला सिरिया गोसोजोँ सानबाय,
गुफुर फिथाइखौ जानानै
अरना राव रायनो रोँबाय।
583
दैनिफ्राय सिखारना अरना
रुम्बांनि सेराव अरना जिरायबाय,
अब्ला रुम्बांआ बुंबाय-
''नोँ राव रायनो रोँबाय नामा? ''
358
जोबोद गोजोन्नायजोँ बियो बुंबाय-
''रुम्बां नोँ आंखौ नागारना दाथां,
आं नोँखौ बेसेबा मोजां मोनो
बेसेबा गोबाव आं नोँजोँनो दं।''
458
रुम्बांआ रंजाखांनायजोँ अब्ला बुंबाय-
''नोँखौ आं नागारना थाङा,
नोँनि रावआ बेसेबा गोदै
आं दिनैसो गोजोन्नाय मोनबाय।
558
दानिया आं नोँनाव सोँनो हासिगोन
बे नोँनि जिउनि गासै सल'खौ,
अरन नोँनि मुंखौ आंनो खिन्था
नोँनि जिउनि सल'खौ खिन्था।
658
आं मिथिबायदि नोङो जोहोलाव
नोँ सासे सोलो गोरोँ गेदेमा,
आं नोँखौ मोजां मोनो रजे
नोँनो आंनि अरायनि मोदाय।
758
फै जोँ सानखौ खुलुमहरनि
बेनि गुण आरो सोरांखौ
गावनि गोरबोजोँ बाखोनायनि
बेबादिनो बियो सोरां हरथोँ।
858
नोँनि खुगानि गोमानाय गारांखौ
बे सान मोदायानो हरबाय,
आं बिखौ खाराव माराव
बेसेबांबा आर'ज गाबखांबाय।
590
रजे दिनैसो आं खोनाबाय
नोँनि गोरबोनिफ्राय ओँखारबोनाय
खोनासंबाय थाथाव गोदै गारां
नोँनि रंगिना जिउनि हां।''
591
सोरगिदिँ समायना अख्रांआव
दाउसिनफ्रा उदाङै बिरग्लाङो,
बयनिबो खुगायाव राव ओँखारो
बिसोर आबुं ओँथियाव रोजाबो।
592
जोबोद गोजोन्नायजोँ सिरिया
सोरगिदिँ नायहरो मिनिसुलु,
जेरैबो बिबारनि महर मिथिँगाया
खोलो खोलो बाराव मोसादोँ।
593
रुम्बांआ अरननि आखाय हमो
बियो गुरैयैनो सोँनो हमो-
अरन नोँनि मुङा मा?
आं नोँनि मुंखौ अरन बुंगोन।
594
बे एसेबां गिदिर आरो गुवार अरनाव
नोँ मानो हार्सिँङै दंमोन?
नोँहा आरो रावबो गैलिया
नोँनि रावबो आंगो गैयामोन नामा?
595
बेसेबा समायना रमायना गोजोन
बेसेबा रंजानाय आरो सुदेम,
बे अरननि गासैबो आंगो
नाथाय मानो बबा जालांदोँमोन?
596
अरन नोँनि सल'खौ खिन्था
नोँनि जिउनि सल' गासैखौबो,
आं खोनासंनो लुबैयो अरन
नोँनि बिखानि ओँखारबोनाय राव।
597
बेसेबा गोदो गोदो गोमानानै थानाय
नोँनि जोनोमनि मुंखौ रजे,
नोँनि गारांजोँ दिनै खिन्थादो
गासैबो गोदै जालांगोन रजे।
598
मिथिँगाया देलाइदोँ बयनिबो खुसिजोँ
बिफां-लाइफांआ मोसादोँ,
दाउसिन-दाउलानि मेथायाव
जिब-जुनारा मिनिस्लुदोँ।
599
नायहर आंनि रजे अरनखौ
रजे नैबे दैसाखौ नाय,
बेसेबा खुसि गावनि गोरबोआव
फोरमायख' हायै बाथ्रा लानानै।
600
दिनै नोँनि गारांजोँ गासैखौबो खोनासंगोन
आंनि गोसोनि सोंलुजोँ
नोँनि जारिमिनखौ खोनासंगोन
अरन नोँ गासैखौबो आंनो खिन्था।
601
हनै बियो दाउब'आ बुंहरदोँ-
फोरमायना हो जोहोलाव होन्नानै,
दैसानि नाया नुजाना बुंहरबाय
खिन्थादो जोहोलाव होन्नानै।''
602
जोबोद हांखुर जानानै सिरिया
अरननि बाथ्राखौ नेनानै थायो,
बिनि सोलेराव उखैनाय फैयो
उनाव बिसोर अरनाव हाबहैयो।
603
बिफांनि फिथाइखौ बिसोर उदै बुंजासे जायो
बिनि उनाव मोनसे सायायाव जिरायो,
जोबोद खुसिजोँ अब्लासो
गावनि सल'खौ बियो बुंनो हमो।