अरननि दाइरि 3.07 थेख्ल बिफानि सल' Poem by Ronjoy Brahma

604
सान ओँखारस्लाब मोन अखा नायब्लानो
लावथ'आ लावख्रिबारियाव रुवा लानानै
बन दाननो थाङो आरो लाबोयो
लेरलेर गावनि फाफ्लियाव बान्नानै।
605
बिसि खाबोथिवा नआवनो थालाङो
माब्ला फिसाया बनखौ लानानै फैयो
बेखौनो बियो नेनानै थायो
नानि खामानिखौ मावनानै समखौ थांहोयो।
606
नै बोसोरनि फिसाज्ला थेख्ल'आ
सिलायावनो मानबायना थायो,
जुहुद्रुद जुहुद्रुद बियो हार्सिँङैनो गेलेयो
समाव थं गसंना दामफेर जासोफिनो।
607
आबुं बुजिनो हानाय बियो राव रोँथवाखै
लल-लाला गावनि गोसोबादि रायज्लायो,
गाव गोसो जायोब्ला गाबो
बिमाया बामखांफेब्ला सिरि थायो।
608
सानसेखालि खेबसे दाउज्ला गेसेरबानो
लावथआ बन दाननो थांबाय,
जेराव सानफ्रामबो बन दानहैयो बेयावनो
मासे दादागिरि मुफुरखौ जिरायना नाथाय नुबाय।
609
बिनि खानाया जायलाला आरो नायनो गिथाव
गावनि खानायजोँ खोबसिननाय मोखांखौ,
बिनि थाखायनो बियो थाबायब्ला
सिगांजोँ नुवा उनथिँसो नुहरो।
610
मुफुरखौ बेबादि दादागिरि जिरायना थानायखौ नुनानै
लावथआ होखार हरनो थाखाय
गावनि रुवाखौ खेबसे थांखाव बंफांआव देना होनानै
गुरलुब माबोरैबा बागदाव होबाय।
611
लोगो लोगो बागदावनायजोँ मुफुरा
खेबसे खेबनै आरो खेबथामसो बारगासिनो
हाजो थिखिनि मोनहैबाय
लावथआ बनखौ लानानै खुसियै नआव सफैबाय।
612
अखानायैबो लावथआ मुफुरखौ गोग्लैना थानाय
बंफां गोरानाव जिरायना थानाय नुबाय,
मुफुरा दिनै ओरैनो सिरि थेन्थौना थानायबादि
एबा दलरै सानहाबना थायाखै।
613
बियो सुब-साब उ-आहा
खौगा गन्थंजोँ सोदोब होदोँ,
लावथआ एसे सानहाबनायजोँ बंफांआव थाखोमाबाय
मोजाङै नायहरबा बियो सिनायनो हाबाय।
614
गुरसे बेरे मोदैखौ गावनि आखायाव लानानै
बिदै गफ्रुलायनाय मुफुरा सोलागासिनो दं,
खुगानिफ्राय गोदोना आरो बिखाजोँ
बेरे मोदैया आद्रियै बोहैना दं।
615
बेखौ नुनानै लावथआ लुबैनानै
खुगानिफ्राय खुदै रय गनायसै,
गावनि खुदैखौनो मनयै मनयै
दान्दिसे बियो सानहाबनायसै।
616
हरखाब बे समावनो गोसोआव
मोनसे सोलो फैनायसै लावथनाव,
बियो बान्ना लानाय रुवाखौ
अन्थायाव थांखाव देनानै होबाय।
617
बागदावनाय आरो गावनि हाथाइ मोग्रेमनायजोँ
गावनि बिखाखौ लानानै बियो
लामफोथा बारै बारै खारलांनायसै
खेबफा बियो बंफांआव थर सौदावनायसै।
618
लावथआ मुफुर गालांनाय बेरे मोदैखौ
हाखु-दाखु आखायाव लानानै सोलाबाय,
दैहाबनाय मिलौनायजोँ बावगोमा लायबाय
अहाजासे बियो जानायसै।
619
सानजानि साना खर' थिखिनियाव सफैयोब्ला
लावथआ बनजोँ लोगोसे
जासे जानानै आग्लायनाय बेरे मोदैखौ
गावनि जलंगायाव लानानै सफैबाय।
620
बेरे मोदैखौ मोनजानानै खाबोथिवा
फिसाज्ला थेख्लआ जोबोद खुसि जाबाय,
सानसु आरो हरनि बोथिसे ओँखाम जानानै
हराव बिसोर गोदो गोदो उन्दुलांबाय।
621
बारलांबाय सान आरो हर
गोजोन बेसेबा सोरां मुलुगाव,
हराव नुजाबाय समायना हाथर्खि
बेसेबा गोजोन अख्रांआव।
622
हायना नांफबनाय मिथिँगानि महर
बेसेबा खुसि लावथनि नखर,
बिबार बारि मुलुगाव जेरैबो
अरनाव बार गोजोन जेब्लाबो।
623
देरा खायलाबनि सिलायाव
थेख्लआ मानबाय मानबाय गेलेयो,
बिफांनि दालायाव दाउसिना रायदाव फैयो
जिब-जुनारफोरा मुसुरहरो।
624
बेसेबा समायना मिनिदेरहरो बियो
गावनि आखायखौ सुंनानै,
बिमाया नुब्ला बिखौ गिनानै
नआव थ्रोब सोना दोनो।
625
बेसेबा समायना मिथिँगानि गोरबो
साना बिलिर फैयो सोलेर,
हाथर्खि अखाफोरा गोजोन खालामो
बिदिन्थाया बारायो बैसोखौ।