अरननि दाइरि 3.09 खाबोथिव आरो लामाखान्दाय Poem by Ronjoy Brahma

649
खाबोथिवखौ जानो लानजाइ सिबलायनानै
खोमसि नुहरलायनाय बियो खुगा सिनानै होसोबाय,
खाबोथिवा दोम गसंना बोलो होनानै
बिनि खुगायाव सिखा दान्ना होबाय।
650
लामाखान्दाया थै लिलि-लाला गनायसै
अब्लाबो बियो गोफार गोफार,
गावनि हाथाइखौ दिन्थिना होसोबावनायसै
खाबोथिवा गोख्रैनो खारबाय।
651
बियो नाथाय गोख्रै खारनो हमदोँब्लाबो
बियो मोनसे बन्थआव सौथुनानै
लुथुर-फुथुर गांलाब गोग्लैगारबाय
लोगो लोगो लामाखान्दाया बिखौ बाग्रायबाय।
652
नारानाथा खाबोथिवा बिनि गोदोनाखौ
गावनि बोलोजोँ सेरथेनो हमबाय,
उनाव हरखाब बोरैबा फानलुखौ फुन्नानै
बिनि गारायाव फुन्ना होबाय।
653
अब्लासो लामाखान्दाया बाब्राबै गाबख्रावना
मोनसे बिलोआव ज्रुम बाज्रुमनायसै,
सानफ्रोमबो खाबोथिवा हाग्रानिमुलि लानानै
फिसायखौ गोख्रोँ खालामफिन्नायसै।
654
दानिया लामाखान्दाया रागाजोँ
मोखां गोजा गोजा जालायनाय लामायाव
खाबोथिवखौ जमनानै थाग्रा जाबाय
बियो बारसिन्नो थाखाय थियारिसै।
655
लावथआ गोख्रोँ जानायनि उनाव
सानसेखालि ना सारगासिनो दंमोन,
खेबसे ज्राव सारनानै बोखांबानो
नाफोरा रिदि-रिदां बखथ्रनो हालायाखिसै।
656
खेबथामसो बियो सारना बोखांबानो
बिनि खबाया गोदोना मोनहैबाय,
नाथाय मैयामैया मोनबाय बियो
सानबाय माबोरै बेबादि जाखो?
657
थेवबो बियो खुसिजोँ सानबावबाय-
गंसे खबाय मोनबावबा हामथारगौमोन,
बेबादि ओजोँ-हजोँ नायहरायाव बियो
सासे सिख्लाखौ ना गुरनाय नुहरबाय।
658
लोगो लोगो लावथआ बिखौ लेँहरनायसै
बेसेबा समायना सिख्लाया
लासै लासै लाजिगुसुयै खाथियाव फैबाय
बियो लाजिगुसु नायगंना थाबाय।
659
लावथआ गावनि खुसिजोँ सोँबाय-
''नै जारौ नोँ बेसे बुरजा मोनखो?
आंना नै खबायसे जाबाय
गावनि खबायखौ दिन्थिनायसै।
660
बिनानाव अन्नानै नोँनि खबायखौ
आंनो हरदो उनाव रान्नोसै,
दिनै आं जोबोद ना मोनसोगारदोँ
आंनि खबायखौ नोङो लाथदो।''
661
बियो जानजियाव खानानै लानाय खबायखौ
समायना सिख्लानो होबाय,
मासेबो नागैयै सिख्लानि खबायखौ
गावनि जानजियाव खानानै लाबाय।
662
लावथआ जोबोद गोजोन आरो
बेसेबा गेवलां मोखांआव खुसिजोँ
सिख्लानि मोखांआव नायबाय
बियो दैसाखौ नायबाय।
663
''जारौ नोँ बेयावनो थाथदो
आं खेबथामसो सारब्लानो नाय,
नोँनि खबाया बुंथारगोन जारौ
नोँनो आं थोजासे ना हरगोन।''
664
बेबादि बुंनानै लावथआ
आस्रा जेजोँ ना सारनो हमबाय,
ना बुंजासे खबायखौ जेब्ला मोनो
सिख्लाया स्रोब गोमोरलांबाय।
665
नाखौ गोबाव सम सारब्लाबो
आरोबाव लावथआ मासेबो मोनाखिसै,
बियो आरोबाव गोसो होना सारबाय
बियो जेरैबो नायहरनो बावलांनायसै।
666
उनाव बियो दुखुजोँ उनथिँ नायहरना नुबाय
आरोबाव सिख्लाया गैलिया,
बियो सोरगिदिँ नायहरनो हमबाय
नाथाय जेरैबो जेबो नुवाखिसै।
667
बियो जोबोद सोमोनांबाय
आरो आरो गोसोआव गिनाय फैबाय,
आस्रा जे गासैखौबो गारनानै
लावथआ नसिम खारनानै सफैनायसै।
668
गासै जाथायफोरखौ बियो
बिसि खाबोथिवनो खिन्था फैबाय,
खाबोथिवा जोबोद गोमोबाय
बियो आरोबाव दैसायाव ना हमनो बादा होबाय।
669
थेख्लआ ओरैबादि सोलो गोरोँदि
बियो बे समावनो लामाखान्दायखौ
गावनि आखायजोँ बुथारना लाबोबाय
बियो गासैखौबो बिमानो खिन्थाबाय।
670
जेब्ला दाउसिनफोरा गाबस्रावो
अब्ला थांनानै बियो नुहैदोँमोन
बेसेबा गेदेर लामाखान्दायखौ
बियो थेख्लखौ होसो बोदोँमोन।
671
थेख्लआ बिजोँ ओरैबादि खमलायनायसैदि
बियो लामाखान्दायनि खुगाखौ
गावनि बोलोजोँ जसिन्नानै
थारला बोखाव गारबाय।