अरननि दाइरि 3.10 थेख्ल आरो मौफौ Poem by Ronjoy Brahma

672
आंखालखौ सुफुंनो एबा
दाहाखौ एंगारनो थाखायनो
खेबसेब्लाबो जिउजोँ गेलेनांगौ जायो
हरखाब गावखौनो नागारनांगौ जायो।
673
लावथनि सानफ्रामबोनि आंखाला जादोँ
ओँखाम संनो थाखाय
बजासे हाग्रानि गोरान बन
बियो जेब्लाबो बेखौनो बुथुमनांगौ।
674
जेब्लाबो अरननिफ्राय बजासे बनखौ
बियो नसिम लानानै खुसियै फैयोमोन,
नाथाय सानसेखालि बियो नसिम सफैयाखिसै
बनखौ लानानै गिदिँ फिनाखिसै।
675
अब्ला थेख्लआबो थिफुद्लाला
जानजियाव गामसा फान्नानै
गंसे रुवाखौ थिखोना लानो हानाय
बोलो जाहांनाय गथ' जाबायमोन।
676
नाथाय फिसाज्लाखौ नआवनो थानो थिन्नानै
अखानायै खाबोथिवा हार्सिँङैनो
फिसाय लावथखौ नागिरनो थांबाय
थेख्लआ जोबोद जिँगा सिबाय।
677
सानब्रैनि उनावबो बियो खुसियै
गोसोआव मिनिनाय लानानै
गेवलां मोखांङै नसिम सफैफिनाखिसै
फिसाया जेराव गोबाबाय बिबो बेवनो।
678
जोबोद दुखु आरो हार्सिँङै
गोबां हांमा सुरनानै थेख्लआ अब्ला
गंसे सिखा खंखाय लानानै
अरन फारसे थांनो हमनायसै।
679
रिनदाव रिनदाव दाउसिन गाबदोँ
दाहा गोनां मेथाइ रोजाब रोजाब
दाउसिनफोरा थेख्लखौ मोनसे गेजेर
गुदु अरनसिम लानानै फैबाय।
680
जेब्ला बिलो सेरनि फांसे
गिदिर बंफां मोनो अब्ला
दाउसिनफ्रा सिरि थानायसै
थेख्लआ गोमोहाबनो हमनायसै।
681
मासे बेसेबा गिदिर मौफौआ
बिनि सेराव सालाइ फिलन फिलन
गाहाय फारसे ओँखाम बोबाय
बियो दलरै थेख्लखौ नायबाय।
682
बिखौ नुनाय लोगो लोगो थेख्लआ
ओरैबादि रागा जोँनायसैदि
बियो मौफौखौ दाननो होसोबाय
मौफौआ अब्ला गुरलुब मोनखांबाय।
683
हरखाब बियो गिनानै
बंफांआव गोख्रैनो गाखोनो हमनायसै,
बिनि लानजायाव थेख्लआ
नोजोर होनानै होसोबाय।
684
बियो लानजायाव गोसा दान्ना होनायाव
नाङालासेनो सिखाया बंफांआवसो
खो गोथौयै बौदोना थाबाय
बिखौ बखनो बिनि बोलोआ थोआखिसै।
685
नाथाय बियो मौफौनि लानजायाव
गोख्रैनो हमथानो हमबाय,
गावहा जेसेबां बोलो दं
मौफौखा थेख्लखौ बोखोनो हमबाय।
686
गाहायथिँ नायहरना बियो
जोबोद गाबनो हमनायसै,
आरो गावनि आखायखौ थिथि
गोरासिन हमनो हमनायसै।
687
हरनि समाव मौफौआ
लासै लासै फावसायना गाहायाव फैबाय,
बियो आरो दलरै थाबाय
थेख्लआ बेसेबा थेन्थौनो हमनायसै।
688
जेब्ला खेबसे दाउमासार गेसेरो
अब्ला थेख्लआ आखाय नागोबोरफ्लांना
बिलोआव जाबफाव गोग्लैबाय
अब्लासो बियो सुथि मोनखांबाय।
689
थेख्लखौ थोरोबनो एबा गावनि बिखायाव
बोसनना लानो हानाय बिलोआ गोथौ,
बंफांनिफ्राय गोग्लैना बियो बिलोआव
खेबसे थोरोबना गोजावखां फिनबाय।
690
अब्लासो बियो उदिस मोन्नायसै
आरो बोरि नागिरबायनो हमनायसै,
नागिर नागिर मोनसे बोरि मोन्नायबादि मोन्नानै
बियो थोर थोर गोजांनानै बेवनो थाबाय।
691
एसे उनाव बियो गावनि हान्थुखौ
फायख्रबनानै बेयावनो उन्दुलांबाय,
हरा थाङो आरो फिन फैयो
हरा थांगोन साना फैलायगोन।
692
सोरांनायनि रादाब फोसावनो
अरननि दाउमासारफ्रा जेसेबां दं
गारमा फुवारना खिबु फिथेँ फिथेँ
गगेरेग' होन्ना जेरैबो रिँहोबाय।
693
सोरगिदिँ जेरैबो दाउसिन गाबस्रावबाय
सानजानि फैसालियाव आलायारननि
गाब गानानै साना लासै लासै नुजाबोगौ
साननि सोरांआ बुहुमाव सफैगौ।
694
मिथिँगानि बिफां-लाइफांआ सिरि मोनबाय
दालायाव बारनो बिबारा थियारि,
स्राय स्राय बार बारनायसै
जिब-जुनारफोरा सिरि मोनबाय।
695
जेरैबो सोरांनायनि रैसुमै खौरां
दाउसिन-दाउलानि मेथायाव,
सानजानि साना बिलिरनो फैबाय
बुहुमनि गासै बिखायाव।