लिमारिक (33-52) Poem by Ronjoy Brahma

33.
बिजामादै बरायग्रा दुन्दुलिखा
रायज्लाय होनज्लायाव बिखा बुग्राखा
ओँख्रि संनो रोङा फिसाजोआ
बिजामादै जागोन फैयाब्ला गोसो बेँङा
बुंनायालाय फिसाजोखौ ओँख्रि गोथाव संग्राखा।
34.
बियो आंखौ लाजियो
नाथाय मिथिया मानोदि मिनियो
खाथियाव नुब्ला खुगा माथुयो
साल्ला हार्सिँनो सौथुयो
आं हले मिथिया गोसो थोखायो।
35.
बियो सिखोला सहरनि
गान्नाय जोमनाया गुबुननि
ओँख्रि संनाय जागोरा हटेलनि
थाखा फैसाया बयप्रेण्डनि
हाबाब आलासि बियो मोनानि।
36.
महर मुस्रिया समायनाथार
सिङाव गोसोआ हले गाज्रिथार
सब'लिन बर'प्लासखौ जोगारो
पियार लाब्लिखौल' बिलिरो
खेरानिनि सासेल' फिसाजो दुगिथार।
37.
मा मोनजायो बिसोर बाजाराव सानफा?
गैया रां जलंगा बुंजाफा
खुगानि खौरांखौसो सावरायो
बेनो बाथ्राया मुहियो
बेबादिनो जालांबाय गासैबो साफा साफा?
38.
मानसिफ्रा सोबो सिगारेड्
बेनि बेसेनाबो थि रेड्
फब लुन लुन उखुन्दै
मिथि थारलिया गेदेर उन्दै
जालां जोबसिगोन नामासै बिराद।
39.
मोद्ला मोद्लि जाय बेरायगोन
गुबुना हले नोजोर होगोन
दाय गोरोन्थि मावफ्लांगोन
बिगुरा हले बेद्लाबखागोन
मिथिखा सेँग्रा साजा मोनगोन।
40.
मोसौ दामब्राफोर बादि फेख्रायग्रा
फालोसे सेँग्राफोर सानफ्रामबो दुन्दायग्रा
न' गैजायै बादि जेब्लाबो
बुंजायो बेकार बयजोँबो
लोङै जायै सोरखौबा बाथ्राजोँ बखिग्रा।
41.
रिगि रिगां दखना आगरजोँ
गान्नाय जोमनाय बर'निजोँ
हाबाब हाबाब समायथारलिया
नै दिनै मेगनाव नांथारलिया
साजायसै खान्दा सोरलाब सोरलाब जिस्रिजोँ।
42.
साख्रि आवला सेँग्राखौ बासि
नङाब्ला जागोनबो दरसि
जौ फाग्ला सेँग्रा दाला
नङाबा मोनगोन खौखाबा थारला
मिथिखा हले संसारा बोरसि।
43.
लिपष्टिक फुनग्रा सिख्लाया सानो थिक
सेँग्राफ्रा नायब्ला बुंगोन गोसोआव थिक
सेँग्राफ्रा रायदावनोसै बिखौ गोदै
गावबो साजायगोन गारां गोदै
सेँग्राफ्रा सानफ्लांगोन दङ थिक।
44.
साननाय बुंनायनि रुगुं गैया
आखल आखुवाबो थोखोर गैया
देलायनाय मोख्रेबनाय बुंनो नांलिया
हाबा हुखायाबो जेबो रोँलिया
सि सि जागारबायसो मानोबा गुण गैया।
45.
हरना गुणा बियो बेरायग्रा
दाय हमजाब्ला बियो गाबग्रा
नोजोर होग्रा दं बिखौ
थेवबो साना बियो उनखौ
मिथिजाब्लाथाय थैनो नागिरग्रा।
46.
गुरब्लां माहाजोननि उदैया लरग'
खोथा बाथ्रायाव गासैबो थरख'
जानाय बेदरा ना खर'
एज्रां एज्रां रायदावनाया बिनि सर'
हालाम मानि सानो गावखौनो खर'।
47.
सावख्लाया बिहामजो नागिरदोँ
ओजोँ बिहामजो रानिजोँसो सौग्रावदोँ
जानला-मोनलाखौ फसायखाया
रोँखा राखा सिख्लाखौबो हास्थाया
हनै फिसाज्ला मेँख्ल'आ जुवायाव गब'दोँ।
48.
सिखोला नोँ महर गोसा
गाननाय जोमनायाबो दाम गोसा
आखायनि फावा हाइ हाइ
सेँग्राफ्राबो फैगोन थाइ थाइ
गुबुनफ्रा नाथाय मेगन गोसा।
49.
नुहरनाय सिख्लाया खानाय खाखो
नायथिँ हरनायाबो सोखो मोखो
खावलाय जारौ जारौ भुटान्नि
सि सि मादि सुनि बानि
गान्नाया लाजाथारा बोखो बोखो।
50.
हाजि फिसाइया थेला नारो
गावहा दुगिथार गुनजेर अरो
गान्नाय जोमनाया दाम गोसानि
जानाय लोँनाय समाबो घन्टा मोनफानि
थेला आवला फिसाइनि सायावनो सोनारो।
51.
बिरबोलायबाय सिख्लाफोर हानजासे
दङ नेनानै सेँग्राफोरबो माखासे
बिसोरो साजायदों महरखौ साफा
दंखायो सेँग्राफोरा गाड़ि गंफा गंफा
माब्ला सौफैगोन हाथारला नेनो दसे।
52.
जोँ गामिनि सासेल' ग्रेजुयेट्
बयनिबो बियो खर' गेदेत्
सावरि बादालि बाहाग बिनि
उन नङा जानाय-लोँनाय रावनि
बुंना लानाया गावखौ थेलेनटेट्।