थिरिँ बिरिँ 338-382 Poem by Ronjoy Brahma

338
आरोबाव खोलो खोलो बार
दिनैनि गुसु फुंआव,
नागिरो गोसोआव आंनि
- गुदुं सोलेराव।
339
गोसोनि लांगोनायाव बिबारा
समायना मिनिस्लु मिनिस्लु,
रंजाखाङो लामायाव हार्सिङै
रैसुमै अनजालिखौ सानबायै।
340
हनै हाद्रिया बिरबायदोँ बोदोराव
बिसोर गोबादोँ बिफांखौ,
गोसोआव मोदै सान्नायनि
गोरान मिथिँगा मेगनाव।
341
होंगो दोँगो मटर सहराव
गिदिर उन्दै लामायाव,
गुसु एब्रेनाय आंनि सोलेराव
जोँमानि बिलिर बिलिर हास्थायो।
342
मोसायो आंनि मेगनाव मुहिनाय
नायगोमायो आंनि सान्नाय,
उरायै उरायै जोमैया दाखासे
हनै हनै अखोरां बिखायाव।
343
सान्नायनि गुस्लायनाय रावआ
सोलायो बोनाय गारांआव,
गोसोआव गोथार मिजिँजोँ-
हान्थियो जिउआव रंजानाय मोदैजोँ।
344
आयनि अनसुलि मिनिनायखौ
सानबाय ओँथिजोँ नायगोमायो,
आयनि गोदै रावआ-
रंजायो आंनि गोरबोखौ।
345
रैसुमैनि रादाब बुथुमनो
हरखाब फैयो गोसोआव-
रंजायो गोदान रंजालि दिनै मागोआव,
बोदोर गोसो आंनि खुसियाव।
346
फैलाव नारानि दुब्लियाव
जोँब्लाव फैयो मोखांआव जोँमानि,
गले गले नायहरो-
बिरलांनाय दाउसिन मेगनजोँ आंनि।
347
स्राय मोदोमाव गुसु बारा
बिलिरलाङो सुहाबनाय लामायाव, -
मोसायो समायना बिफां बिलाइया
गोसोआव रंजानाय लोगो लोगो आंनि।
348
नायहरो नायहरो आं लामायाव
हाद्रि खुनाय गोरान हान्थिनायाव,
गोसो फोलावना हानहरो मिजिँ-
रंजानाय लाना दाउबायनायखौ।
349
आयनि गोदै गारांआ लामायाव
रिँफैयो अन्नाय राव खोमायाव,
दंफैयो जेब्लाबो मिजिँ गोरबोआव।
350
सोर रोजाबो मेथाइखौ-
गोजोन मोननाय आंनि गोरबोआव,
बबेजोँ बिरबोयो आंनि खोमायाव,
हान्थिनाय गोथार मिजिँ लामायाव।
351
बिरलाङो आंनि रंजानाया
हुरा हुरा मोफ्लामना जोमैयाव,
दान्दिसे गेलेयो जोँनाय हार्थखियाव-
सानबायनाय दाखासे बिखायाव।
352
फ्लाम फ्लाम मोदान फैयो
सुगदावनाय सोरनिबा मोखांआव,
- जोँनाय थर्सनि सोरांआव
थाबायो आं खोमसि लामायाव
साननाय गोसोआव सौहैनो देरायाव।
353
गोसोआव जेरैबादि सानदोँ-
फैयो बिरै बिरै गुसु बिलिरना,
- रंजायो आंनि, गासैबो गोरोबनाया
फैयो फैयो बिसोर लेँहरनायाव।
354
गोसोआ बोदोर रंजानाया
मोसाग्लाङो सोमावना मोदोमखौ,
आय' आंनि रंजानाय मोसानाया-
गोदौखाङो गासैबो खुसियाव।
355
फुवा फुवा खुदोँ हाद्रिया
मोदोम बाफबनाय सोरगिदिँ-
नागारनाय जायाखै मोसानाय गोरबोआ।
356
गोगो दमासि खुगायाव
सोरगिदिँ सिहाब हब्रानाय खुसियाव
रंजायो मोसायो बोदोर गासैबो।
357
रंजानाय जादोँ बोदोर आंहा
गैया मेँनाय बोदोराव गोसोआव-
गोरबो जावरिनाय बाज्ल' बायनाय।
358
बाज्ल' बाज्ल' रंजाबायदोँ जेरैबो
बिफां-बिलाइ मोसाग्लांदोँ,
दाउसिन दाउलाफ्रा गावसिनि रंजानाय दोन्ना
बावहाबदोँ जोँनि बिखा सोमावनाय देँखौखौ।
359
मोसायो मोसायो आं दिनै
बोदोर गोरबोआव,
हमथानाय गैया हमथानाय गैया-
थाथिरा गोसो जिरायना।
356
फैयो बिफांनि बार, सोमावना
गोरान बिलाइ फिस्रि फिस्रि-
रंजानाय गोरबो आंनि दिनै-
रंजानाय गोसो आंनि।
357
मेगन मेँग्लिनाय आंनि
ज्राव ज्राव सिरिनाय दुखुआव-
गोरान बिफांनि बिलाइयाव।
358
नै गोसोआ बुरखाय जाया दिनै
हमथाया मानोबा खुसियाव,
बाज्ल'बाय जेब्लाबो खुसियाव।
359
दिनै गोसोआव मानोबा हुरागासे
फिर फिर बारजोँ बिलिरजानाय,
आं रंजायो, आं रंजायो।
360
गोमो गोथां गुफुर गाब
सिन्दुर फोथा सान सिख्ला,
बिरलांदोँ दाउसिन फालोसे
साना दिन्दां दोबैबाय।
361
आं सोलिदोँ मिथिँगायाव
सानस्रियो गोगो लामायाव,
आं रंजादोँ बोदोराव
मिनि रंजानाय बिफां-लाइफांजोँ।
362
जेब्ला नोँ आनज्राय लाङो
आं बिदाय हरो खुलुमनानै,
फैगोन आरोबाव मिनिस्लुनाय
जोँमा सोरां सानजा फुंआव।
363
नोँनि मिनिस्लु रिफिनाय मोखां
फैयो जिउ आंनि गोरबोआव,
आंनि सुजुनाय मेथाइ मालायाव
खबाम बिखा गोरोबनायजोँ।
364
आं सिमां नुदोँमोन
गोसोम खोमसि हर गेजेराव,
आलो आलो जावबायदोँ लैथो-
बारलांना मोनहैयो हाजो थिखिनि।
365
हरा जोबोद खोमसि दिनै
थाबायदोँ आं लामायाव-
आं गिदोँमोन, गोसोआव
सफैयो रुगुंआव जेराव सोरां।
366
हरा गोमालांबाय
सोरां जाबाय,
आं सिखारबाय एमनिफ्राय-
हर खोमसि सिमांङा गोमालांबाय।
367
बेयो नुलाय जेन्नाय दिनै
नोँजोँ आंजोँ-
जोबोद खुसि नोँनि मिनिनायाव
आं लाजिस्लुदोँ मैखि लानानै।
368
जिरायबाय आं हार्सिँङै
मेथाइ खोनासंना गोदै-
नायहरो मोसानाय बिफां बिलाइ
उल्टा गिदिँफिनो मेगन जोँमानाव।
369
अखाफोरनाव सोँहरो आं-
मानो नायहरो मिनिस्लु सोरांस्रि?
नोँनि मोजां मोन्नाय बेनो,
आंनि गासैबो मोजां मोनो नोँ।
370
समायना नायहरो नोँनो
नोँनि जारौ महर जोँमा,
जारोम जारोम माय दुब्लियाव थं
- हार्सिँ आं गसंनानै।
371
अ' सोरजिगिरि,
आंखौ फोरोँबाय नोँ-
रंजानो गाबनो अरायबो।
372
आं रंजायो मिनियो
गोदो गोदो खुसियाव।
373
नोँ मिथिगौ मिथिगिरि
जोँमानि खावलायाव नायनानै-
बेखौनो सान्दोँ आन्दोआव।
374
हार्थखि जोँनाय अखोरांआव
गोजोन नायहरना सानो-
मोसादोँ जोमैफोरा खोमसि खोमसि।
375
स्रिद स्रिद दाउसिन गाबनाय समाव
सिरि मोनखाङो बिखाया,
नायहरो आं साननि मोदान्नाय फांथेनानै।
376
गुफुर जोमै, सोमब्रोम साया
- थाबायो लामायाव आं मेँग्लियै
बिरलांनाय दाउनि सायखं लामायाव।
377
बोदोर जायो, गोसो बिखायाव
नायहरो मिजिँ लामायाव;
- हां बोनाय फैसालियाव।
378
फोर फोर गिदिँनाय सानस्रिनि
- गोसो हमथायो हान्थिनाय,
गुफुर सिमां, दै महर लामा।
379
मेगन मोदै, थेनथ'नाय
आला-माला लामायाव,
थाबायो लोरबां देहा लामायाव।
380
हाद्रिनि बिरनाय खुवा लामायाव
- थाबायदोँ, फालि खुगा माथेना,
गोसो सान्नायाव आवबा
- बोदोर बिरो सानस्रिया।
381
गोमोन जाहाब बैग्रि बिफांआव
फिथाइ खेबख्लाबदोँ दाउलुर दाउसिना,
मोसा मोसा दालाय सोमावदोँ फालो
गोमो हाबो आं दान्दिसे मेगनाव।
382
सनाथि मायथाइ मेला
होंगो दोँगो फोथाराव,
रंजाखाङो मेगनाव साजायनाय-
समायना रमायना जौसांआव।