अरननि दाइरि 4.01 थेख्ल आरो खुसुं Poem by Ronjoy Brahma

697
बिलोआव गोजोमना थानाय
बोराय खुसुंआ सिरि मोन्नायसै,
बियो बिखुंआव गोबाना थानाय
थेख्लखौ गोदोना फोलावना नायबाय।
698
गावनि बिखुंआव लानानै बियो
उन्दुना थानाय थेख्लखौ
मोनसे बालाबारियाव लानानै
लासैयैनो अरननिफ्राय ओँखार फैबाय।
699
बेसेबा गुवार उदां बालाबारि
सानजा फैसालियाव ओँखारजेन्नाय
साना सोनाबनि फैसालियाव
एब्रे हैनायसिम बेयाव सान्दुं नाङो।
700
खुसुंआ लासैयै थेख्लखौ एंख्लायना
दान्दिसे दुखुथिया मोखांजोँ नायनो हमबाय,
बिनि उनाव सोरगिदिँ मेगन फिदिँना
बियो बिलोआव थांफिनबाय।
701
साननि दुंबुर दुंनाया लासैयैनो
बारा बारा जाबोनायाव
थेख्लआ लासैयैनो सिरि मोनबाय
साना बिखौ नायहरबाय थाबाय।
702
गावखौनो गोमोनायजोँ बियो
मेगन बिलिरना सोरगिदिँ नायहरनो हमबाय,
गेजेराव बेसेबा गुवार बालाबारि
बिनि सोरगिदिँ जेरैबो अरन।
703
हाजो सेरनि मिथिँगा जोबोद समायना
सोरगिदिँ जेरैबो नायनो मुहिनां,
साननि जोँथि गोजोँ मिनिनाया
गुदु अरनाव उरसिबोबाय।
704
गोमजोर गंस्रोना थानाय
बंफांफोरा साननि बिलिरनायजोँ गासैबो
खुसियै आज्लंना बिखौ नायहरदोँ
बिफां बिलाया स्राय मोसादोँ।
705
सोरगिदिँ सन्दे-बन्दे बायदि देँखो
मिलौहाब गोदै बायदि दाउसिनफोरनि,
बिसोर अख्रांआव उरां मारि मारि
बिरग्लांना अरनाव एरसो फिनदोँ।
706
साननि दुंनायजोँ थेख्लआ
दै गांनो हमबाय आरो
जोबोद ओँखाम उखैबाय
बहा दै मोनलोँगोन सानबाय।
707
जेरैबो दिग हमनो हायैआव
बियो साफारसे दै नागिरनो हमनायसै,
समायना मोनसे हाजोनिफ्राय बाज्रुमनाय
दै दुहरब्ला बियो खाथियाव दावगाबाय।
708
बे समावनो हरखाब बिनि बिखायाव
बेसेबा गिदिर थरसे अन्थाया
गोख्रै फेना दुब नांफैबाय
जायगायावनो बियो खांग्रांना थैहाब्बाय।
709
गावनि उन्दुनायखौ खहा खालामनायनि
जोबोद रागा जोँनानै बियो
बेसेबा बोलो होनानै
खुसेंग्राया सिलौराखौ जोदोँमोन।
710
खुसेंग्राया अन्थाइखौ ओरैबादि जोदोँमोनदि
सिलौराया एरायना होनायाव
गोख्रैनो फैनानै अन्थाया
थेख्लनि बिखायाव सौदाना थैहाब होबाय।
711
बेसेबा गिदिर बोलो गोरा खुसेँग्रा
आरो मासे सिलौरानि गेजेराव
गिलुबालु दावहा जाबाय
बाला सेरेपफोरा खुवानि महर लाबाय।
712
बालाबारिनि अन्थाइफोरा बायस्रानाय
आरो गुब्रुनायाव सोदोब जानायजोँ
थेख्लआ सोलेराव हुस फैफिनबाय
बियो लासैनो सिखारगारबाय।
713
बेबो जेना बिबो जेन्नो राजि नङा
बिसोरनि बुलायनायखौ नायनो हमबाय,
खुसेँग्राया उनाव ओरैबादि आदब बाहायनायसैदि
बियो जोबोद बोलो होबाय।
714
बियो सिलौरानि गालखाब आरो अहेबाव
जोयै जोयै खुन्थेँलायनाय होसोबाय,
लोरला लोरथा मेँनायजोँ
सिलौराया खुन्थेँना खारलांबाय।
715
मेँनायजोँ गोगो दैखौ लोँनानै
दलरै जिरायना थानायसै खुसेँग्राया,
थेख्लआ बिखौ नायगोमोनानै
दान्दिसे गावखौनो बावनायसै।
716
बियो बेसेबा दै गांहाबनायजोँ
गावनि आखाय फारनैजोँ लोँनो हमबाय,
एले एले जानायाव बियो हान्थु खरायना
खुगा सोमब्रना जुनारबादि लोँबाय।
717
सेरावनो जिरायना थानाय खुसेँग्राया
बिखौ नायनानै गोमोहाबनायसै,
उखैनायाव जेबो जायालासेनो
बांद्राय दै लोङोब्ला फेयो।
718
बोरैबा हांआ बन्द जायो
हां खनसेनो गुगु लोँनायाव
थेख्लआ गांलाब खांग्रांबाय
गावखौनो जेबो उदिस मोनाखिसै।
719
खुसेँग्राया बिखौ नुनानै आरोबाव
बांसिनै बियो सोमो नांहाब्बाय,
बियो थेख्लखौ खायदा खालामनानै
गावनि बिखुंआव लासैयै थिखोबाय।
720
बिनि उनाव लासैयै थाबायनानै
बियो थेख्लखौ एंख्लाय फैनायसै
मोनसे फिथाइजोँ बुंफबनाय जायगायाव
जोबोद सुदेम मोनसे थावनियाव।