अरननि दाइरि 4.05 अरननि सिखारि आरो थेख्ल Poem by Ronjoy Brahma

840
गावनि मेनाना गंआ बबेबा बेन्दोँआव नांथाना
मैया गोदोना लोरिलायनाय खारनानै
थेवबो हाजो थिखिनि मोनहैबाय
बिसोर उनथिँ खेबसेबो नायहराखै।
841
मैदेरफोरा बिफांआव सौग्रावै सौग्रावै खारनायाव
उन्दै उन्दै बिफांफोरा बायबाय,
मोख्राफ्रा दालाइ दालाइ बारस्लायनायाव खायसे
दालाइ गोरानाव हमफ्रांना जल्दब गोग्लैबाय।
842
थेवबो बियो हाजोँ हा
लामफैथा जिउखौ लानानै खारथारबाय,
जेरैबो अरनाव जिब-जुनारफोरा
होँगो-दोँगो खारनायजोँ गोमफबदोँ।
843
थेख्लआ जोबोद सोमोनांनाय आरो
राहा गैयै जानानै बियो
मैनि हालोदखौ नायनानैनो
बियो दलरै थानो हमबाय।
844
जिलिद नांजानाय गुफुं मोदोम बह्रा मैया
बाब्राब बाब्राब बिनि मोखांआवनो दुब्ला थैबाय,
दान्दिसे उनावनो हानजासे सिखारिफ्रा
मैनि सोरगिदिँ बेँखन फैबाय।
845
बेसेबा खुसिजोँ बांबुला बांबुला मोसाबाय
बिसोरनि बयनिबो बिखुंआव
सथाफा सथाफा बोरला जिलिद
आरो आखायाव दं गंफा बोरला।
846
दाउगां होनाय गंफा गोफार जिलिदा
बोरला दिरुंआव थियारि,
बिसोरनि बाज्लना जोबोद मोसानायाव
बिखुंनि जिलिदा बाज्लखांनायसै।
847
थेख्लआ बिसोर गुरहं-गुरहां
हांगार नांनाय मोखांखौ नुनानै
थोर थोर मोदोम मावलायनाय
जोबोद बांसिनै गिनो हमबाय।
849
बेबादिनो बियो हरखाबै खारनो हमनायसै
होनबा सिखारिफ्रा बे खारलांनाय फारसे
खेबसेनो गंथाम जिलिद हगारना होबाय
जिलिदा गोख्रैनो होसो लांबाय।
850
गंसे जिलिदा बिनि आदैयाव
गोख्रैनो होसोना खेँ हाब्बाय,
गंनै जिलिदा फांसे बिफांआव हाब्बाय
हरखाब थेख्लआ हायाव जग्रबनायसै।
851
आरोबाव बियो खारनो हायाखिसै
जेसेबां हब्रानो हागौ बियो
गावनि उदै बाबथाबलायनाय बोलोजोँ
हब्रा हब्रा गाबनो हमनायसै।
852
बियो गावनि आदैयाव हाबनाय जिलिदखौ
बखनो नाजाबाय नाथाय हायाखिसै,
सानाय आरो आलौनायजोँ बियो ओलैस्रो जाबाय
आरोबाव बियो गाबनो हायाखिसै थैहाब्बाय।
853
गोथै मैखौ बान्ना लानानै आरो
हानजासे सिखारिया थेख्लनि खाथियाव
मिनि खुसियै बेँखन फैबाय
बिसोर थेख्लखौ नायनानै थाबाय।
854
सासे सिखारिया बिनि आदैयाव हाबनाय
जिलिदखौ थरल' बखना होबाय,
लोगो लोगो थै रुरु गनो हमबाय
दाबोरसे दुब्रिखौ थैया जाहाब होबाय।
855
सिखारिया हाग्रा बिलाइखौ गावनि खुदैजोँ
नानानै थै गनायखौ होबथानायसै,
गावनि जिलिदखौ लानानै मैजोँ लोगोसे
बिसोर थेख्लखौ फाफ्लियाव बान्ना लांनायसै।
856
मोन्नै गोजौ गोजौ हाजोनि गेजेराव
खंसे समायना गोथौ दैया आलो आलो बोहैदोँ,
गावखौ आयनायाव नायनायबादि हाजोआ हाजोखौ
साननि सोरांजोँ मिनिस्लु गोग्गानाय मोखांजोँ नायदोँ।
857
बेसेबा समायना हाजो आरो हाजो सेरनि
मिथिँगानि सावगारिया रोखोमारि गाबनि,
दैया आलो गोजोन बोहैलांनाय मारुंनि
हाजो खंखरावनो सिखारिफोरनि अन्थाइनि न'।
858
बेसेबा गुवार फोथारबादि मोनसे
समायना सिद्लायाव सिखारिफ्रा
मैखौ फाफ्लिनिफ्राय बोख्लायो
सिखारिनि फिसाफ्रा नायनो खारबोयो।
859
गावनि फाफ्लियाव बान्ना लानाय थेख्लखौ
सासे सिखारिया हायाव बोख्लायो,
लोगो लोगो थेख्लआ थैहाबनायनिफ्राय
सिरि मोनो आरो सिखारना नायो।
860
सोरगिदिँ मेगन फिदिँना नायनानै
बियो मिथिँगाखौ गोमोहाबो,
सिखारिफोरनि बिसि आरो मेँख्ल'-मेँख्ला
फिसाफोरा गावखौ बेँखन्ना नायफैनाय नुयो।
861
थेख्लआ गोमोनायजोँ आरो गनाय राहाजोँ
सासे गथखौ नारख्रांना खारो,
बियो बेसेबा गोथौ दैयाव बाज्रुम हैयो
बिखौ बयबो दान्दिसे नायहरो।