अरननि दाइरि 4.06 सिखारिनि फिसाजो दरले Poem by Ronjoy Brahma

862
जोबोद दाहार हाजोनि बाज्रुमनाय दैया
बिखौ गोख्रैनो खोला फारसे फोजावो,
सिखारिफ्रा बिखौ मारुंआव थानानै नायहरो
बिसोर थेख्लखौ नुनो मोनाखिसै।
863
फलान गाहायनि फिसाजो दरलेया
गिनो रोङै जोबोद साहसि सिख्ला,
बियो जेब्लाबो दैयाव हार्सिँनैनो
दैनि ना आरो दाउसिनफोरजोँ गेलेयो।
864
गेले गेले समायनायै देलाइना थायो
बिनि मेगन आरो गासै महर मुस्रियानो
सासे सिख्रिसिख्लानि बादि समायना
जायनो बिखौ नायो गोमोहाबो।
865
गोसोनि सान्नाय आरो बुंनो लानाय
गासै बाथ्राफोरानो आवबा जायो,
गावनि गुरै गुरै आखायजोँ बियो
बिफां-बेन्दोँफोर बिलिरना समायना खालामो।
866
बिफांनि दालाइफोराव गुरैयै बिलिरना
गेवलां-गेवथां बिबार बारहोनो हागौ,
रैसुमै गारांजोँ मेथाइ रोजाबना
सिखिरि दाउसिनफोरखौ थेन्थौहोनो हागौ।
867
बियो दैयाव गोसो खुसियै दुगैना दंमोन
जेब्ला दैयाव बाज्रुमनाय सोदोब खोनायो
अब्ला बियो जोबोद गोमोहाबनायसै
बियो गोख्रैनो नागिरनो हमनायसै।
868
बियो दैयाव थब्ल थब्ल नागिरब्लाबो
नाथाय जेबो नुनो मोनाखिसै,
थेवबो बियो आफां फारसे
गोलेरनि बिखुंआव गाखोना नागिरनो हमबाय।
869
बेसेबा दाहाराव गोख्रैनो थेख्लआ
बेल्थाय बेल्थाय उल्थां-फाल्थां गोजावदोँ
बबेबा मारुंनि बेन्दोँ एबा मुरा-मुरि
आखाय हमथानो बिनियाव सोलो गैलिया।
870
बियो गोजावदोँ आरो गोजावदोँ
दैनि दाहारजोँ बुसोम जालाय नारसोम जालाय,
दरलेआ गोलेरखौ गोख्रैनो दावनो थिनबाय
गोलेरा जेसेबां हागौ गोख्रैनो दावबाय।
871
जेब्ला मोनसे उदां गाथोनखौ मोनफैयो
अब्ला दैया बेसेबा गुवार जाफैयो,
बे समावसो दरलेया गोलेरनि बिखुंआव गसंना नुरहरबाय
सोरनिबा गोसोम खर'आ गोजावना दं।
872
बिनि मोदोमा गासैबो दै सिङाव
खर'आल' दै सायाव गोजावखांदोँ,
गोलेरखौ बि फारसे दावनो खावलायनायाव
गोलेराबो गोख्रैनो दावनानै सफैबाय।
873
दरलेया बिखौ थाब्रुम हमथाना
नारानाथा गोलेरनि बिखुंआव थिखोबाय,
बियो दैनि उदां मारुंआव थेख्लखौ
गोख्रैनो लाबोना बोखो फैबाय।
874
बिखा मावलायनाय थिफुं थिफुं हां लानानै
बियो थैहाबनानै दं गोदो गोदो,
गाव बहा मा जादोँ
जेबो उदिस गैलिया बियो।
875
दरलेया बिनि माय सौनाय बिखाखौ
नायनानै दलरै नायनो हमबाय,
बियो मोखांआव नायबाय थाबाय
थेख्लनि बिखाया गोजौ गाहाय जानायसै।
876
सानसेखालि दरलेया दैयाव दुगैना
बोरियाव गावनि खानाय गिसिखौ
सान्दुंआव फोरानगासिनो दंमोन
बियो रैसुमै मेथाइ रोजाबदोँमोन।
877
बे समाव मासे सख्रा मैया
सेराव फैनानै गावनि गोरलै गंजोँ
दरलेनि बिखुंआव एवथु फैबाय
बिनि उनाव दरलेखौ गोथौ अरनाव लेँलांबाय।
878
मैनि उन उन थांनानै दरलेया
समायना गुफुर बिबारजोँ बुंफबनाय
फांसे बिफांनि दालायाव मासे
बोराय बाथखौ नुनो मोनहैबाय।
879
बोराय बाथआ दरलेनि मोखांआव नायनानै
बोराय गारांजोँ लासैयै बुंनो हमबाय-
''फिसा बावैसो साननि उनावनो
नोङो सासे मानसि लोगो मोनगोन।
880
नोँबादिनो बियो सासे गथ'
नाथाय जोबोद बोलोगोरा जोहोलाव,
बियो ओरैबादि सासे जोहोलावदि
सानसे बिनो अरननि राजा जागोन।
881
बियो ओरैबादि जोहोलावदि
बियो मैदेर हालिसेखौ आखायजोँ
गोसायै सौना होनानै जसो होनो हागौ
बियो जोबोद अनसुला फिसा।
882
बियो मुलुगाव रावजोँबो फेजेन जायै
बेसेबा सोलो गोरोँ जोहोलाव जागोन,
बावैसो साननि उनावनो बियो
नोँजोँ नुजाथिगोन गोसोआव ला।
883
नोँ जोबोद सांग्रां जानाया गाहाम फिसा
बिनि जिउआ नोँनि आखायावनो दं,
जेरैखि जाया नोँ बिखौ
नोँनि सोलोजोँनो रैखा खालामथार नांगोन।''
884
बेबादि बुंनानै बोराय बाथआ
बिरलांना बहाबा गोमालांदोँमोन,
बेखौ दरलेया थेख्लखौ नायै नायै
हरखाब गावनि गोसोआव फैबाय।