अरननि दाइरि 4.07 जमनि आखायनिफ्राइ Poem by Ronjoy Brahma

885
दरलेनि गोसोआव जेबो सोलो फैयाखिसै
बियो गावनि गारांजोँ मेथाइ रोजाबनो हमबाय,
दैमानि ना आरो जुनार गासैबो
जिउआरिफ्रानो बोरियाव मानखो फैबाय।
886
अरननि गासैबो दाउसिन-दाउलाफोर
बिरबोना सेरावनो बाग्लाय फैबाय,
जिब-जुनारफोरा फालो फालो अरननिफ्राय ओँखारबोना
दैमा सेराव सान्थ्र हायै जाफैबाय।
889
बयबो गाला-गाथायै दरलेनि
मेथाइ रोजाबनायखौ खोनासंना थेन्थौ गोमाबाय,
अख्रांनि बिरबायनाय फुरसब जोमैफोरा
दलरै गोजोन जिरायना थाबाय।
889
उरां मारि मारि ओजोँ-हजोँ बिरबायनाय
हानजा हानजा दाउसिनफोराबो
जिब-जुनारफोरनि बिखुंआव बानानै
गोजोनै गल' खोनासं फैबाय।
890
दैमानिफ्राय ओँखारबाय गोमोथाव मोनसे जायख्लं
आरो सोर्गोआव गाखो हैबाय,
सोर्गोनिफ्राय ओँखारबोबाय जमा
गावनि फाफ्लियाव फोथै लावथि बान्नानै।
891
बियो लासैनो थेख्लनि सेराव गसंफैबाय
आरो बिनि मोदोमखौ दांनो नागिरबाय,
बे समावनो दरलेया जमखौ नुनानै
थेख्लखौ गोख्रैनो बामख्रबना लाबाय।
892
लोगो लोगो जमा सोर्गोआव गाखोफिनबाय
दान्दिसेयावनो जायख्लंआ स्रोब गोमोरलांबाय,
हानजा हानजा दाउसिनफोरा गावसोरनि गांजोँ खेबसे
गोगोम बुज्रावना गोमसार होबाय।
893
जिब-जुनारफोरा खेबसे स्राय
मोनसे गारांजोँ मिनिनानै होबाय,
थेख्लआ गावनि मेगनखौ गेवलां बेखेवबाय
लोगो लोगो बियो दरलेखौ नुबाय।
894
बेसेबा खुसिजोँ दैमानि गासैबो
खासेव आरो साम' लादायमोना
जाय फारा-फारि बाज्रुमफिननो हमबाय
बेसेबा खबामजोँ सोदोब जाखांनायसै।
895
दैमाया जिउआरिफोरनि गोबां खुसिजोँ
बेसेबा समायनायै बाज्लखांबाय,
गांगा थफानि बिबार महर लाबाय
नाफाफोरनि जावरिखांनायजोँ।
896
दरलेया थेख्लखौ मामना लादोँ
बियो समायनायै मिनिस्लुबाय,
गावनि फेन्दायाव फुथुना
बिनि खर'आव बिमाबादि बिलिरना होबाय।
897
थेख्लआ बिनि मेगनाव नायनायसै
बियो गोमोनायजोँ दुबफुं सिखारो,
बिनाव लाजिनाया हरखाब जाखाङो
बियो गावनि मेगनखौ बिलिरो।
898
आखाय फोलाव गासे गोजानाव
थेख्लआ लासैनो दावथ्रोद लाङो,
बिसोर सानैजोँ मोखांजोँ मोखां
दलरै मिज्लौ मिज्लौ नायज्लायो।
899
दलरेया गुरै गारांजोँ बुंनो हमो-
''नोँथांआ दैयाव गोजावना दंमोन,
आं नोँखौ रैखा खालामनो नाजादोँमोन
नोँथांआ रैखा खालाम जाथाव।
900
नोँथांआ जोबोद खाफाल गोनांदि
जमा नोँनि जिउखौ लांनो नाजादोँमोन,
आं नोँखौ गोबाना लादोँमोन
बियो सोर्गोआव गाखोफिनबाय।
901
बेबादि राफोद जाफिन्नायाव
आं नोँथांखौ बाखोनायनो लुबैयो,
मिथिगौ नोङो सासे जोहोलाव
नोँथांआ जोबोद सिबिजाथाव।
902
नोँथांआ सोर जाखो जोहोलाव
नोङो दैमायाव बाज्रुमथारदोँमोन,
आं मिथिनो लुबैयोदि
जोहोलाव नोँथांआ सोर जाखो? ''
903
अब्ला थेख्लआ दरलेखौ बुंबाय-
''नोङो आंखौ रैखा खालामबाय,
बिनि थाखाय आं मा होबावनो?
नोँखौ बाख्नायनानैल' जाया।
904
नै सिख्ला! आं मावरियासो
आंनि सिनायथिया दुखु गोनां,
आं जोबोद खाफाल दाखुरादि
आंहा बिमा आरो बिफा गोमाबाय।
905
आंनि मुंखौ बिसोर थेख्ल दोनदोँमोन
बिसोर बबेबा अरनाव गोमाबाय,
आंनि आंगोखौ नागिरै नागिरै
बे अरनसिम आं सफैबाय।
906
नोँखौ लोगो मोन्नानै दिनै
जोबोद गोजोन्नाय मोनदोँ आं,
बेसेबा गोजौनिफ्राय आं बाज्रुमदोँमोन
नोङो आंखौ रैखा खालामबाय।
907
आंनि जिउखौ जमा लांनोसैमोन
नोङो जमनिफ्राय सेना लाखिबाय,
नोँ जोबोद साहसि सिख्ला
नोँनो आं मा बान्था होबावनो?
908
हे रैखागिरि अनजालि सिख्ला
नै नोँनि मुङा मा जाखो होनबा?
आंनो गोदान जिउ होबाय नोङो
आंगोखौ मोन्नायबादि आं मोनबाय।''
909
अब्ला दरलेया गुरैयै बुंबाय-
''नै जोहोलाव आंनि मुङा दरले,
बे दैमायाव आं गेलेयो
नोङो आंखौ आंगो खालामदो।''