थिरिँ बिरिँ 491-538 Poem by Ronjoy Brahma

491
थिँ थिँ दुंनाय गोसा सान्दुंआव
आला खाला आं मेँग्लियो,
दाउस्रिमोनजोँ बिरफालांना-
स्राय गोगो थरथिँसे अखानि दै लोँनो।
492
आं गाबदोँ- मोदै गैया मेगनाव,
आं मिनिदोँ सोरां गैयै मोखांआव।
493
खोलो खोलो बारआव
आङो गोजोनदोँ,
थिँ थिँ सान्दुंआव आङो
गोजोनै जादोँ;
थेवबो गोरोबदोँ आं मोजां गाज्रि बोथोरजोँ।
494
नारख्लाय जानाय आं बिसोरजोँ,
बिसोरनि बिष गोनां खुगाजोँ।
नाथाय आं बिसोरखौ सोँखारिनो लुबैयो,
बिसोरनि नंखाय गोग्गानायखौ।
495
बेबादिनो बोथोरा जादोँ,
दिनै निजोम गाबोन गोमजोर;
दिनै सुदेम गाबोन दुंहाव।
496
सानजानि जारां साना ओँखारबोदोँ,
आं खुलुमहरदोँ;
सानजानि जारां साना सोनाबहा हाबलांदोँ,
आं बिदाय हरदोँ खुलुमनानै।
497
जिउ, जिउ आंनि बेसे गोजोन,
बेसे दुखु गोनां जिउ,
दं आं अबं गसाइ नोँनि अननायजोँ,
थागोनबो आं नोङो लिँहरनायसिम।
498
जोबोद गोजोनै आं थाबायनो मोजां मोनो,
आंनि थांनांगौ फारलंसे लामायाव,
आंनि उदां उदां समाव।
499
सिमांनि दरजा फांथेना
मोकथांनि दरजा खेँनानै,
फुरसब खुवा, निजोम मिथिँगा
नैबे फुंआव आं नुयो।
500
बुन्थानि उखुन्दै बिरबायनायजोँ
हां मोना मोना अक्सिजेना जेन्नांदोँ।
जिबिनि हां गैयै हग्'नायजोँ
बिफां-लाइफांआ अख्रां नायदावदोँ।
आं बिजिरस'मोना नोरजिया।
501
आङो गोदो गोदो उन्दुलांगोन
सानफामानि मेंग्लिनायनि उनाव
नोङो बिलिरफै सना-
आंनि मेंग्लिनायखौ लाना थांफै;
हे सना! नोँल' सान हर जेब्लाबो।
502
बिखायाव गोबा फैनाय
अनसुलि गोजोनस्रिखौ-
हायाखै आरोबाव बोजबना लानो,
आं जायखौ मोजां मोना
सैया सैया खालामो बियो,
थाखोमानो हायाखै आं-
एब्रेनांदोँ बाल्थिँनि दुसुमाय बिलोआवसो-
खर' सोमब्रनानै।
503
अखा हादोँ, बारजोँ-
बिफांनि बिलाइफोरा मोसादोँ;
इन्जुर खनायाव थाना नायब्लांहरब्ला
खोनादोँ आं-
खासुलि मायनावनि गुजुनाय।
504
सिलिँनि फेना खानाय सोमावदोँ
मोदोम गंसे गोजाङो-
एमनिफ्राय जेब्ला आं सिखारो।
505
नुदोँ आं नायगोमानाय
इन्जुर खनायाव मायनावनि-
आं गोमो हाबो।
506
हाथर्खिफ्रा जोँनानै दंङ,
गोथौ बेसेबा अख्रां;
ख्लाब ख्लिब दैसायाव-
गोजोन्नाय मोनो आं।
507
गुदुं लामा सेमेन्टनि
गोसा दुंनाय सान्दुंनि सानसुआव,
थाबाय फैयो आं कलेजनिफ्राय।
508
थाबायदोँ थाबायगासिनो दं,
आंनि खुसियाव अनजालि-
साया माया मोखांआव।
509
बिबारफोरा आंखौ मिनिदोँ,
बारजोँ मोसा मोसा;
नंगौ, बेयो बैसागुमोन।
510
खोमसि हर-
आं नुहर मोना,
थालिर गांखंआव बादालि।
511
गुगालांदोँ दाउसिननि गां
रोमै रोमै मोखांआव,
बारजोँ मोसादोँ समायना।
512
राय हबल्दारनि सोमस्रि बिल्दीँआव
रुजु रुमु गुफुर दाउथु,
आंनि मेगनाव मोसायो।
513
बियो गोग्लैबोदोँ, खुसियै-
मोसा मोसा,
समायना आं रंजायो।
514
आंनि गोरबोआ सुदेम
नोँनि गारां नैबे फुंआव,
साना खुदुम फैयो।
515
दा बेरे सिखिरि-
बिबार,
मोसादोँ बारजोँ नैबाव।
516
उन्दुदोँ मेँग्लिहाबनाय बाराव,
हरा जोबोद खोमसि
हंख्रददोँ बिसोरो।
517
थरथिँसे दै आखायाव
फुंनि निहोर जेरै-
जोबोद खुसि।
518
बिबार बादि मोदोमदोँ
गोजोन मोन्दांथि,
बेयाव दं मोजां मोन्नाय।
519
सिरिद सिरिद गोमोथिँ सांग्रेमा गाबदोँ
हरा जोबोद खोमसि,
गुसु बारनाय बारखौ
सोलेराव आं गोबादोँमोन।
520
खोलो खोलो बार बारदोँ
लोगोआव गोगो अखा,
मोसा फैदोँ बाज्ल' बाज्ल'
आंनि थिँ उखुमाव,
आं गोजोन्नाय मोन्दोँ।
521
सिलिँनि फेना आंखौ बुरखायदोँ
उन्दुदो (रजे) समा जाबाय
बिलिर बिलिर खर'आव।
नाथाय दाबो बुङाखै मायनावआ
सम जानायनि रादाब
थिक थिक थिक।
522
सान्दुंजोँ लोरला जानाय
गुफुर दाउदै बिबारा
गोगो हानाय अखाजोँ मिनिसुलुदोँ;
सिखिरि बहाबा सिखिरिया थाखोमादोँ।
523
सानसुनि दुंनाय सान्दुंजोँ
गय बिफांफोरा मेँग्लिदोँमोन,
गुसु हानाय अखाजोँ लोगोसे
गुसु बारा बिलिरफैयो;
स्राय स्राय मोसायो खुसियाव।
524
सानसुनि गोसा सान्दुंआव
आं जुमब्रानि बिफां सिङावमोन
जोबोद गोथांङै रैसुमैखौ गोसो खांदोँ
बाग्दावदोँ आं दाउथेबनि रायदावनायखौ;
गल' गल' नायदोँ आंखौ
जुमब्रानि दिन्दां फिथाइफोरा
खेबसे आङो मिनिफ्लांदोँ खुसियाव।
525
बिखायाव दा सौफैयो
बहानिबा गोदान बारआ,
हां थोनो थोनो मोनो आं।
526
सिउ सिउ फैनाय बारआ
आंनि बिखायाव गोबाफैदोँ,
आं गोबा गोबा गोजोनो।
527
दलर सिरियै गसंना दंमोन
थालिर बिफांनि सायायाव,
थरथिँसे मोदै गसरबोयो-
गुसुआव बाग्दावो बियो।
528
आंनि मोब्लिबगासे सिमांआ गोमायो-
फुंनि जारां सानजोँ।
529
अनसुलि थालिर बिलाइनिफ्राय
थरथिँ थरथिँ थरथिँ....
दुब्रिनि सोलेराव सुदेम।
530
गोजाम खोमसि हराव
अखाफोरा थैहाबदोँ,
नैबे खोमसि बिखायाव।
531
बिजिरनो गोसोनि गियानजोँ
जिउनि दैलो खबाम,
गुफुर सोदोबनि सिखिरि।
532
गसंहाबदोँ गोलाव लामायाव
जायखौ रलारा गाग्लिलांबाय,
गोग्लैसोनाय सान्दुं अखा;
आफाखि सोलानाय बयनिबो।
533
बिसोर थांबाय....
आखायाव साथा हमनानै
जोबोद फोथारनि सान्दुंजोँ।
534
गसंहाबनाय दिदोम दरजाखौ
नारब्लांहरो आं-
अखाफोराव जोमै साग्लोबदोँ अख्रांआव।
535
सिरिथाहाबनाय निजोम फुंआव
सिनायमोनै सोरनिबा फन रिङो
आं बावगारहाबो घ्यान।
536
हार्सानि आर'ज मेथाइ
खोमायाव रिँदोँ
अखा हानाय नैबे फुंआव।
537
जोमैखौ नुहरदोँमोन
लाथिख'नि सोमखोर गोरबोआव,
अनथाव बाथाव फुरसबसब।
538
सिमां, सिमां नुदोँमोन आं
मिथिँगानि सोमखोर गोरबोआव,
दान्दिसे नंगौ रंजानाय।