अरननि दाइरि 5.05 गोलोन्दां सादुनि जोबस्रांनाय Poem by Ronjoy Brahma

1074
गावनि बिसि फिसा गासैबो
मोनसे समाव बांग्रिँआव गोदोलांनानै,
गोलोन्दांआ जोबोद दुखु जाबाय
बेबादि बियो सानसे हाजोआव थांबाय।
1075
रोजासे साननि सिगांनिफ्रायनो फाग्लाथिया हाजोआव
बियो सादु महरै आर'ज गाबदोँमोन,
बिनि घ्यान-आर'जआ थेर-बेथेर जाबाय
हाजो गिसिखानायाव बियो दैयाव गोजावबाय।
1076
मोनसे समाव बियो थैहां थैहां जानानै
रायखसनि आथिँआव हमथानो मोन्नायसै,
होनबा रायखसा बिखा आखायजोँ खन्नानै
गोजोँ मिनिनायसै आरो लासैयैनो बुंनायसै।
1077
उखैनायजोँ थैहां थैहां जाथारबायमोन आं
नै एबारसो उदैया गिलिर जासिगोन,
बेबादि बुंनानै रायखसा बिखौ
बेसेबा गोजौ गारदाव गारबाय।
1078
गावहा जेसेबां हागौ एसेबांनो
बियो खुगाखौ फुवारना नायदावनायसै,
बेसेबा गोजौ दावखो लांनानै
गोलोन्दां सादुआ आर'ज खालामबाय।
1079
फिन गोग्लैफिन्नायाव गोलोन्दां सादुआ
होनबा गसाइनि मोनसे बोर मोनबाय,
बियो अब्ला मासे गिलुबालु
गिदिर गोलाव गोलेरनि महर लाबाय।
1080
रायखसा होनबा जोबोद सोमो नांबाय
बिखौ मननो हागोनबादि बियो सानाखिसै,
गोलेरा गोग्लैबोनायखौ नुनानै रायखसा
गोख्रैनो एरायना होनायसै।
1081
गोलेरा दैयाव जाफाव गोग्लैबाय
सिखारना बियो रायखसखौ होसोनायसै,
रायखसा हान्थुसे दैयाव गोख्रैनो
बेरला-बेरथा मेगन मेसेबना खारबाय।
1082
बियो जेसेबांनो गोख्रै खारदोँ
बिखौ लानजाइ सोमावना होसोनायसै,
मोनसे समाव हाजोनि दुद्रुबोनाय देरसिन अन्थायाव
थर सौदावनायसै आरो बागदाव खांनायसै।
1083
रायखसा गांलाब खांग्रांना गोग्लैबाय
फिन बियो गोख्रैनो सिखारना
गावनिफ्राय देरसिन अन्थाइखौ थिखोना
गोलेरखौ खुबैनो सानगारनायसै।
1084
नाथाय अन्थाया गावनि देरसिन जानायलाय
बियो नाजाब्लाबो थिखोनो हायाखिसै,
बे समावनो गोलेरा बिनि खिबुआव
खेबसे गन्थंजोँ नारना खुन्थेँ होनायसै।
1085
आरोबाव बियो गोख्रैनो बाज्लना
रायखसखौ दैयाव बाग्रायना लानायसै,
गोलेरा बिखौ थैबाय सान्नानै हगारनायसै
आरो जोबोद खुसि जानायसै बियो।
1086
दान्दिसे उनाव रायखसा दुबफुं सिखार फिन्नायसै
बियो गोलेरखौ गन्थंआव सौनानै जसो होनायसै,
आरोबाव रायखसा बिखौ गोख्रैनो
बिखुंआव जोनानै खांग्रां होबावबाय।
1087
गोलेराबो रागाखौ थिखिनियाव लानानै
रायखसखौ लानजाइजोँ खावलायाव सोबाबाय,
रायखसा दान्दिसे सोर सोर गिदिँगारबाय
बिनि उनाव रायखसा बांसिन जोँखांबाय।
1088
बिसोर हरसे आरोबाव दैयावनो
खोमसि खोमसि होसोलायबाय थानायसै,
उनाव बिसोर आन्दाय लायनानै
गिदिर गिदिर अन्थायाव जना थानायसै।
1089
अखानायै बिसोर आरोबाव लोगो मोनलायना
गिलुबालु सानैजोँ बुलायबावनायसै,
दानिया ओरैबादि बाग्रायनायसैदि
दैमानि अन्थाइफोरा खायसे गेब्रुगारबाय।
1090
उनाव गोलेरा बोरैबा रायखसखौ
अरना होनानै नागार होनायसै,
बिनि उनाव आरोबाव रायखसा गोलेरखौ
बोलो होना गोदोना सेरथेनायसै।
1091
बेबादिनो मेंनायजोँ गोलेरनि बोलोआ थोआखिसै
अब्ला बियो गोलोन्दां जाफिनबाय,
बियो अब्ला थल्थब गनानै
गोख्रैनो गोसो होना खारनायसै।
1092
नाथाय बेसेबा गिदिर रायखसा बिखौ
आगाननै फोलावनानै हमनो मोनबाय,
बियो बिनि खुसियैनो
गावनि खुगा सिखार गारसन हरबाय।
1093
बेबादिनो रायखसा गासैखौबो फेजेन्नानै
बिनि बोलोआ आरोबाव बांबावबाय,
बिफांफोरखौ ब्रुदब्रुद फुनो हानाय जाबाय
गिदिर गिदिर अन्थाइखौ गाख्रुबनो हासै।
1094
बेसेबा गिदिर दैमा लैथोमाखौ सानस्रिना
सानसे बियो सा हालुराव सफैबाय,
गोजोन सुदेम अरनजोँ बुंफबनाय हालुर
सोमखोर गोथां अरनाव बियो गिदिँबाय।
1095
सानसे जानानै बियो हरफा उन्दुयो
बेबादिनो आदारनि थाखाय आंखाल गैया,
सानसे समाव बियो बांद्राय जानानै
गोबाव सम उन्दुना थानांगौ जाबाय।
1096
दाउसिन दाउलाफोरा सेराव गाबफैब्लाबो
बेन्दोँफोरा बिनि मोदोमाव मानफबब्लाबो
बियो एसेबो उदिस मोनै जाबाय
बियो गोदो गोदो उन्दुलांबाय।