अरननि दाइरि 5.08 मिनिस्रिनि जिउ सल' Poem by Ronjoy Brahma

1152
रायखसा खानानै गालांनाय
सथासे गोदोनानि खानायखौ
गावनि गोजोँ मिहि हाथाइजोँ
दोँफा दोँफा अरसयो खुसिया।
1153
नाथाय दोँसे अरसयो दोँसेया खायो
बान होनानै गालांदोँ रायखसा,
बिनिखायनो मेंग्लिहाबो खुसिया जोहोलावआ
राहा गोमाना दलरै जिरायना थायो।
1154
बिनि गोरबोआव बैदासि सारिबाय
बियो होख्रावना बिफांखौ सोमावबाय,
बेबादिखौ खोनाहैनानै ओँखारबोबाय
रायखसनि फिसाजो मिनिस्रि सिख्लाया।
1155
सिगां समाव बियो सोर्गोनि अपस्रामोन
सानसेखालि जेब्ला दांखो सादुआ
दाउराइ जाहाराव घ्यान खालामनो थाङो
अब्ला बियो सादुजोँ नुजाथिबाय।
1156
बिखौ नुनानै सादुआ लुबैखांबाय
बियो सादुनि खाथियाव साफियोब्ला
सादुआ रागा जोँनानै साव होबाय
नोङो रायखसनि फिसाजो जानांगौ होन्नानै।
1157
बेबादिनो मिनिस्रिया अरनाव आन्दायना
सानसे समाव जाम्बा रायखसा बिखौ
गावनि फिसाजो खालामना लागारबाय
ओजोँ लुबैसुलि रायखस बुरैया थैलांबाय।
1158
मिनिस्रिखौ नुनानै सानबाय खुसिया
बिनो जाथारगोन सिरिथा सिख्लाया,
जायखौ आं सिमांआव नुदोँमोन
आंनि जिलिदखौ बिनो लाबोदोँ।
1159
मिनिस्लु मिनिस्रि सिख्लाया फैब्ला
मेंग्लिनाय जोहोलावआ लासैनो सिखारबाय,
समायना-रमायना महर मुस्रि
थै जारौ देहा गोलाव खानाय।
1160
रुम्बां हायलो जानजिया बालेँ
हाजो दन्दरनिफ्राय ओँखारबोदोँ,
गेवलां मोखां लाजिगुसु गन्थं
बियो लासै लासै थाबायबोदोँ।
1161
हाद्रि नांनाय दखनाखौ बुस्रियो
बियो गुफुं सोलेरजोँ खाथियाव फैबाय,
जेरैबो सोरां बिनि फैनायाव
सेरसेर बिबारफोरा गेवलांबाय।
1162
गल' नायनाय खुसिया जोहोलावआ
बोदोर आरो हांखुरै सोँबाय-
हायना फोनांग्रा हाजोनि सिख्ला
नोँनि मुङा मा जाखो होनबा?
1163
मिनिस्रिया अब्ला गुरैयै बुंनायसै-
आंनि मुङा मिनिस्रि सिख्ला,
आङो उदाङै मिनिनो मोजां मोनो
आंबादिनो बारजोँ रंजायो बिफां-लाइफां।
1164
नै जोहोलाव नोङो सोर जाखो
बबे रायजोनिफ्राय नोङो सफैखो?
खुसिया जोहोलावआ गोख्रैनो बुंबाय-
आन्दायबाय आं जेरैबो अरनाव।
1165
आं सासे अरननि मैहुर खालामग्रा
आंनि जिलिदखौ सिरिथाया लांबाय,
आं जेब्ला हांमा सुरो
रायखसा उदैयाव लानानै फैबाय।
1166
बेसेबा गोजोन आरो सुखु
सोर्गोनिफ्राय सफैबाय आं फाथालाव,
आंहा दाहा खालि उखैनाय
बे रायजोआव दावहा थांना थानायनि।
1167
मिनिस्रि सिख्लाया मिनिस्लुयै बुंबाय-
जोहोलाव बेनोथ' आंनि सोर्गो,
बेयावनो आं जोबोद रंजायो
आलो गोजोन बाराव बिरबायो।
1168
खुसिया जोहोलावआ लासैयै बुंबाय-
नै हाजोनि सिख्ला मिनिस्रि,
आंनि गोदोनायाव खानानै गालांनाय खानाय
आखायाव खानाय दिरुंखौ खेँना हो।
1169
रायखसनिफ्राय नोङो रैखा मोनगोन
रायखसा आंखौ नेनानै दं,
नै सिख्ला आंखौ रैखा खालाम
आं नोँखौ रैखा खालामगोन।
1170
लासैयै मिनिस्रिया खेँनानै होबाय
अब्लासो बियो उदां मोनबाय,
गावनि साव सारजानाय समखौ
मिनिस्रिया दिनैसो जोबनाय मोनबाय।
1172
बेसेबा खुसि आरो रंजाखांनायजोँ
बियो बुंनो हमबाय गुरैयै-
देलाइयै-बेरायै जेरैबो आं गोजोनो
बेनोथ' अराय सिख्लानि सोर्गो।
1173
गावखौ उदां जानाय मोन्नानै
खुसिया जोहोलावआ बुंबाय-
नंगौ हायनारि हाजोनि सिख्ला
नोँखौ लोगो मोन्नायाव गोजोन्नाय दं।
1174
नोँखौ नुनाय आरो लोगो मोन्नाय
नोँनि मिनिनायाव गोजोन्नाय दं,
नोँनि खुसियै रंजानायाव सोर्गो दं
बेबादि गोजोन्नाय सिगांआव मोनाखै।
1175
नै मोदाय सिख्ला आं बुजिबाय
लोगो मोनलायनायाव दं सोर्गो,
रंजानाय आरो गेलेनायाव सोर्गो
मोजां मोनलायनायाव गोजोन दं।
1176
जिउनि असे गोजोन्नायानो गुबै सोर्गो
नुनाय मिनिनाया आसोल सोर्गो,
गोथार समायना आरो गोरोबनाय
जेराव गैया दान्दिसे दुखु-हांमा।
1177
मोदाय सिख्ला मिनिस्रिया बुंनायसै-
दाहार गैयै लैथोआव गोजोन दं,
जोबोद गुदुं बोथोरनि हावासियाव
आलो आलो उन्दुलांनायाव सोर्गो दं।
1178
नाथाय दान्दिसेयावनो खुसिया जोहोलावआ
मेँग्लिनायजोँ दै गांनो हमबाय,
बियो मिनिस्रिनि मेगनाव नायना बुंबाय-
दै लाबो रजे गांगाजासे लोँनि।
1179
बे बुहुमनि गासै समायनाखौ
दिनै जोँ सानैजोँ अहाया नायनि,
सानैजोँ फोरमायलायगोन गोरबोनि बाथ्रा
नोँ आंनो दै लाबो मिनिस्रि।
1180
अपस्रा मिनिस्रिया लासैयै बुङो-
नोँनि गांनायाव जोबोद रागा दं,
बे रागाखौ आं जिमाय होनि
नोङो जिराय आं लाना फैनि।
1181
बेबादि बुंनानै मिनिस्रिया थाङो
बिनि थांनाय फारसे खुसिया नायहरो,
बेयाव बेसेबा गोमोनाय दं
बेयाव फोजोबनो हायै हाबिला दं।
1182
लासै लासै दान्दिसेयावनो मिनिस्रिया
स्रोब बहाबा गोमोर लांबाय,
बे समाव खुसिया मेगन मेसेबदोँमोन
मेगन बेखेवना आन्दायनो हमबाय।