अरननि दाइरि 5.10 बांबुला आरो गयस्रि Poem by Ronjoy Brahma

1206
सोमखोर मोनसे अरननि गेजेराव
बेसेबा समायना सालबारि दं,
बे सालबारिनि मदद जांगिला बांबुला जोहोलावआ
बोथोरजोँ गोरोबनानै आबाद खालामो फोथाराव।
1207
बियो गोसो जायो बोरला जिलिद लानानै
गोथौ गिदिर अरनाव सिखार खालामो,
लावदुमनि फिसाजो समायना गयस्रिया
जोबोद रंजालि बिखौ गोसो थोनानै।
1208
लावख्रि अरननि सिख्रि सिख्लाया
बांबुला जोहोलावखौ जोबोद गोसोथोयो,
खेबसे अरनाव बांबुलाखौ नुनानै
बियो फिसाय जनो हास्थायबाय।
1209
बियो बांबुलाखौ मोन्नो हास्थायो
गावनि मेगनजोँ नायनो लुबैयो,
मेगन सेराव नागिरना मोदाय सिख्लाया
सानसेखालि बांबुलानि देरायाव सफैबाय।
1210
मोदाय सिख्लाया रावबो खोनायै बादियै
लासै लासै बांबुलाखौ फोजाबाय,
बांबुलाया सिखारबा बियो लेँलांनायसै
बेसेबा समायना गावनि लामाजोँ।
1211
गोमोथाव लामायाव सारियै बिबार
बाहां-बिरहां सनानि सिखिरि,
जेरैबो थमेनहां-गेवलां देरा सेर सेर
बांबुलाया गासैखौबो गावनि मेगनजोँ नुबाय।
1212
सिख्लाया बांबुलाखौ जिरायनो होबाय
बियो गावखौनो राजाबादि मोनबाय,
बिनि मोदोमाव खोलो खोलो बार
मेगननि सोरगिदिँ बायदि बिबार।
1213
दाउ खौऔआ रोजाबनानै होबाय मेथाइ
बिनि गोसोआव रंजानायजोँ बुंफब्बाय,
सिख्लाया बिनो जाहोनायसै गय-फाथै
आरोबाव बांबुलाया रंजाखांनायसै।
1214
सिख्लाया बिखौ आरोबाव खुसिजोँ
लेँनानै लाबोबाय बिबार बारियाव,
बियो बांबुलानि खर'आव बिलिरनायसै
बांबुलाया उन्दुबाय बिनि फेन्दायाव।
1215
ओजोँ बांबुलाया नआव गैलिया होन्नानै
बांबुला बिमा सिरिदा होख्रावनो हमबाय,
रायजोफोरा बयबो सिरि मोनखांबाय
बिसोर बयबो बांबुलाखौ नागिरनायसै।
1216
बिसोर बनजार लानानै नागिरबाय
जेरैबो मानसिनि राव खोनानानै अब्लासो,
सिख्रि सिख्लाया स्रोब गोमोर लांबाय
बांबुला जोहोलाव अब्ला आन्दायनायसै।
1217
बेसेबा नुयै खोमसिनि गेजेराव
जोबोद गिदिर गोथौ अरननि गेजेराव,
सिरिद आरो फिसाय सांग्रांजोँ
बांबुलाखौ बनजारनि सोरांजोँ नुबाय।
1218
बे खौरांखौ मोन्नानै गयस्रिया जोँखांबाय
बियो जोबोद दुखु जानोबो हमबाय,
बियो मोदाय सिख्ला होन्ना मिथिनायसै
नाथाय बिनि गोसोआव गिनाय फैनायसै।
1219
सानसेखालि बियो बांबुलाखौ बुंबाय-
जोहोलाव बियो आंनि सुथुर,
आं बिखौ सिमांआव नुदोँमोनदि
बिथांआ आंनि ओँखामखौ सेखबाय।
1220
बिथांखौ आं नागारनाय नङा
बिखौ आं जमनो गथायगोन,
नोँनि अन्नाया जेरैबाबो आद्रि दाजाथोँ
नोँखौ जिउजोँ मोजां मोनोल' नङा।
1221
नोँखौ आं अरायसम फुजिगोन
नोँनो आंनि गिरि रावबो नङा,
साना बुहुमखौ जेसेबांसिम सोरां होयो
आंबो नोँखौ बेबादिनो खुसि खुसि खालामगोन।
1221
रजे नोँनो आंनि जोनोम
जिउ नोँनि गोरबोआवनो आं,
आंखौ नोङो नंखाय दासान
बेबादि बुंनानै गयस्रिया खुलुमो।
1222
अब्ला गयस्रिखौ बोखांना
बांबुला जोहोलावआ बुजायना होनायसै,
दरबि नोङो जिँगा दासि सना
नोँनि सिबिनायखौ आं आजावगोन।
1223
बेसेबा गोसो खुसियै जोङो
बे जोनोमाव संसार जालांगोन,
नोँनि मोदैखौ गावनि मोदोमाव बिलिरगोन
नोँनि गोजोन्नायखौ जेब्लाबो होगोन।
1224
आं मिथिगौ नै अनजालि
नोङो गाबो आरो जेबो रंजायोबो,
नोङो मिथिँगा सिख्ला रजे
बुहुमा जोँनि साखि जानानै थागोन।
1225
गयस्रि बिफाया सासे फलान
बिथांआ मैहुर खालामनो गोरोँ,
बियो बिसि सनाथि आरो
सासेल' फिसाजोखौ अन्नाया खम नङा।
1226
लावदुम फलाना बांबुलाखौ बाखोनायो
बिथांखौ बांबुलाया खेबनै रैखा खालामबाय,
लावदुमा फिसाजोखौ बिनोनो गथायनो थियारि
बिथांनि बिसियाबो जोबोद मददगिरि।
1227
बिथांआ आलासि सिबिनो गोरोँ
सनाथिया जेरावबो आखा-फाखा,
बियो फिसायखौ जेरैबाबो नागारा
लावदुमा दाहायाव माब्लाबाबो गोदोआ।
1228
बिथांनि फिसाजो गयस्रिया नाथाय
जोबोद एसेयाव दुखु जायो,
लावदुमा बेबादिखौ सहायनो हाया
बिथांआ फिसाखौ खुसियाव लाखियो।