अरननि दाइरि 6.01 सनाथिनि जिउनि सिनायथि Poem by Ronjoy Brahma

1229
सनाथिया सनाबादि सिख्लायाव समायनामोन
बियो दिनै द्लाम बुरैनो हमबाय,
बिथांआ गयस्रिखौनो गावनि जिउ सानो
बियो बिमा दैखौ जेब्लाबो गोसोखाङो।
1230
सनाथिखौ मोनसे समाव हुदुरा
बिमा दैसा सेराव मोनबोदोँमोन,
बिसि थैजानाय हुदुरा बिखौ
जोबोद आदरै खांदोँ फेदेरदोँमोन।
1231
बिथांआ फिसाज्ला लावदुमजोँ जुलि होदोँमोन
बियो फिसाज्लाखौ फलान खालामनानै
गावनि सिमां जाफुंहोदोँमोन
मोनसे समाव बियो हरखाब थैलांबाय।
1232
फिसाजो गयस्रिखौ बांबुलानो गथायनो
लावदुम फलाना सांग्रांजोँ सावरायबाय,
सांग्रां आरो बिथांनि बिसि सिरिदा
बिथांनि रादायखौ गनायनानै लाबाय।
1233
सांग्रां आरो लावदुमा जोबोद लोगोमोन
बिसोर मोनसे समाव अरन गिदिँदोँमोन,
उन्दै समखौ बिसोर गोजोनै बारहोबाय
दा बिथांमोना बोरायनो हमबाय।
1234
बिसोर फिसानि जुलिखौ होनो थाखाय
जखायसे बोसोर सम होनाय जाबाय,
बे खौरांखौ मोन्नानै गयस्रिया
बेसेबा रंजाखांनो हमनायसै।
1235
बांबुला बिफाया बांसिन बोरायबाय
बिथांआ गोबां आबाद खालामदोँमोन,
बिथांआ सालबारिनि राजाबादिमोन
बिनियाव दा बे बोलोआ गैलिया।
1236
बियो जोबोद अनसुला मानसि
बिथांआ गासै घोनखौ फिसानो गथाय होनो
बेसेबा हांखुर जानानै थाबाय
सांग्रांनि मोखां दासानदि खुसि।
1237
जखायसे बोसोर सानखौ नेनानै थाबाय
बिथांनि रुवाथिफोरा बिनो जाहोबाय,
सांग्रांनि दाहोनाया बिखौ इसोर सानो
बिथांआ जोबोद साहसि मानसि।
1238
बिनि बिमा बिफाया दुखुथियामोन
बिसोर थैनाय समसिम अरनाव दंमोन,
मै अमानि बेदरखौ बिसोर सावना जादोँमोन
बिसोर हाग्रा बिलाइ गानदोँमोन।
1239
बेबादि बोराय दाउब' खिन्थाबाय
अखानायै थब्ल बिलोखौ नागारनानै,
आखिबारि अरनाव बिसोर सफैबाय
आरोबाव बोराय दाउब'आ बुंबाय।
1240
सांग्रां बोरायनि बान्दिफोरा जोबोद मावथिमोन
बिथांनि रुवाथिफोरा सानैमोन,
बिसोरनि मुङा हाम्फे आरो दुम्फे
बिथांनि दाहोनानि मुङा गल'।
1241
सानसेखालि दाउज्ला खेबसे गेसेरनायनि उनाव
हाम्फे आरो दुम्फेया सिखारबाय,
गायहेन लानानै बिसोर उवालाव माय सौबाय
सोरगिदिँ जेरैबो बिनिनो सोदोब।
1242
गल' दाहोनाया गलिनिफ्राय सिखारनानै
जुंगाल जुरिनानै दुब्लियाव होलांबाय,
अब्ला खोनाबाय बियो फांनै सिमलि बिफांआव
सोरबा गोसो होना माय सौनाय सोदोब।
1243
दुम दाम आरो दुम दाम
सोदोबखौ गोमो हाब्बाय गल'आ,
सिमलि बिफां सेराव थांनानै
बियो नुबाय खर' मोन्नै गोनां सैथान।
1244
सैथाना अब्ला हाथाइ दिन्थिना मिनिबाय
बिथांनि हाथाइफोर गोसोम गोसोम,
गल' दाहोनाया बिखौ गिबाय
बिथांआ दोम गसंना थानायसै।
1245
अब्ला सैथाना लासैयै बुंबाय-
नै सेंग्रा सोर जाखो नोँलाइ?
नोँ हार्सिँ नंगौना नङा
माबार बुंदो नोङो सेंग्रा।
1246
सैथाना मानसिजोँ हार्सिँब्लासो बुलायो
बाथ्राखौ गल'आ बिबौनिफ्राय मिथिदोँमोन,
आं हार्सिँ नङालै बाहाय मिथिबायना?
आंजोँ लोगोआव गंसे लावथि माथाम मोसौ दं।
1247
गावनि आखायाव लानाय लावथिखौ
आफाखंआव एथेबना लानानै बुंनायसै गल'आ-
नै बाहाय नायनायसाय आंनि मोदोमाव
आं माबादि सुनानै लादोँ।
1248
नोँखौबो आं बेबादि सुफ्लंना होनो नामा?
होनबासो सैथाना थोर गिनायसै गल'खौ,
बियो गल'जोँ बिसिगि खानायसै
गल'आबो लोगो खालामनायसै बिखौ।
1249
सासे मदद जांगिला सेंग्रानि महर लानानै
सैथाना सांग्रांनि दाहोना जाफैनायसै,
गल'आ बिखौ गावनि बान्दाबादियै
गोसोबादि सिं खालामना लानायसै।
1250
गल'आ दानिया अलसिया जाबाय
ओजोँ सैथाना बिनि खामानिखौ मावबाय,
गल'आ जोबोद देद्ला-माला थायो
नाथाय सैथाना जोबोद मावसोमो।