थिरिँ बिरिँ 607-675 Poem by Ronjoy Brahma

607
सानस्रिदोँ गोगो दैसायाव
सायखं नुनाय फुंआव,
मिनि खुसि हांसो जरासे।
608
मानखो हैयो गोसो
जोबोद गोख्रै हाजोआव,
नायहरो फैलाव हायेनाव।
609
मोदै थरथिँसे गसरदोँ
आयनि गोगो गोलोमदैयाव,
नायहाब नायो आं।
610
थैजोँ हां बोनाय सोलेरखौ
बारजोँ फोथांनो-
सान्दुं दुङो गोर्बोआव।
611
सिउ सिउ बार बारनायाव
जुब जुब अखा हादोँ,
बिफां-लाइफां मोसानायाव
मिनि खुसि गोसोआ रंजादोँ।
612
बिरलांदोँ गोसोआ-
बिफां-लाइफां बारना हाजोआव,
समायना रमायना सुदेम बाराव।
613
सिमां मिथिँगानि गोर्बोआव
गले गले फैयो-
गोजोँ आंनि मिजिँ।
614
नायो नायबाय थाथाव मिथिँगा
बिफां-लाइफां बायदि बायदि,
गोजोन रंजायो।
615
दैसा बोहैदोँ-
हांसो फालोसे गेलेदोँ,
मिनि खुसि सानस्रिदोँ।
616
गोसो दाखासे मिजिँआ
एब्रेहाबो गोर्बोआव,
जिउ बोलोखौ फोरायो।
617
सिमांआ नंगौबो नङाबो
नोँ मैखिखौ सुस्रदो-
सना दिनै हाबा दं नोँहा।
618
गांखं गैयै सोलेरा बुब्राबो गां
मुलुग लैथोखौ बारलांनो-
मिजिँ गोनां गोर्बोआ सिगां सिगां।
619
अनजालि नोँखौ लानानै
नैबे मोनाबिलियाव,
बिरलाङो हाथर्खि मोखांङै-
नोँजोँ आंजोँ लोगो लोगोआव।
620
आंनि सिगां सिगां गोसो
लोगो लोगो सोलेर,
आंनि उन उन सायखं।
621
सोदोबनि सोदोबा आंखौ एदावो
आं उसु खुथु मोनब्ला
खन्थाइ लिरना मिनिसुलुयो।
622
जोबोद समायना
जोबोद मोजां मोनो आं,
जारां समनि मोनाबिलियाव।
623
हाथर्खि मोनाबिलिनि
नायहरो आं सिंखाव सिंखाव-
जोमै दाखासेनि।
627
सोमखोर गांसो दुब्रि
गुसु आंनि आफा दावदै,
नैबे सुदेम फुंआव।
628
दिनै गोदै गोथाव
मिलौदो मिलौहाब
गोसो गोथार आहुति होनानै
नोँखौ खुलुमदोँ सोरजिगिरि।
629
जिरायनाय गोजोन समाव
खेबसे मिनिदेरो आं बिबारजोँ
मिनियै बाज्ल' बाज्ल' मोसायो बियो।
629
आं गोजोनदोँ नैबे बाराव
आंनि सोलेर गिदिँ गिदिँ
बियो जंखाय लांदोँ।
630
बिफां सिंआव
आलांगि सुदेम गोजोन,
खेबसे मुसुर हरो दाउसिन।
631
नैबेयाव दं आं
आंनि गोसो,
सिरि सिरि रायज्लायो।
632
सायखं आं सानैजोँ
लोगो लोगो लामायाव,
बादिलायनाय।
633
हाबाब मा इसे समायना
फुंनि जारौ साना,
बिफां बिबार गासैबो।
634
बियो सिमांमोन
दावहा मोनसे फोजोबनायनि,
सुदेम दैसा बोहैहोनो।
635
आयै नोँखौ गोसो खांनो
गोसो गुथाल आंनि-
आङो मानोबा गाबो।
636
खोमसि नै अखाफोर गैयै
दं आं सिलायाव,
सिउ सिउ बार लोगोआव।
637
गोसोआव बिरबोयो अननाय
गोसोनि बिरलाङो साननाय,
आं रंजायो बारजोँ।
638
सानसुनि बुब्लि
मिनियो सान
गंस्रियो बिफां-लाइफां,
आंनि मेगन मोखां सिगांआव।
639
मेगनखौ मेसेबनोसै आं
हिमालय हाजोखौ नायनो-
सेराव मिनि खुसि बिरलांनोसै।
640
दैस्लुं लामायाव
एम्बु बारसोमदोँ,
बाग्दावना मिनिदोँ आं।
641
नायनो समायनाथार
नैबे फुंनि सावगारिया
भादोरनि दान सोमखोर मिथिँगा।
642
नै सिखिरि बहा
बिरलांनो-
बिबारा नायहरो आज्लं आज्लं।
643
फ्रि फ्रि अखाया फैबाय
बहानिफ्राय फैखो?
नायहरो समायना खुदुमथाव।
644
शहरनि दावरावआ रिँफैयो
मोनाबिलिनि लामायाव,
आं शहर फारसे आगान होब्ला।
645
खन्थाइ खन्थाइ गोरबोनि
दोँसे स्राय लिरदोँ,
फरायो गावनो मिनियो आं।
646
नैबे बेसेबा खोमसियाव
आं नायहरो बारियाव-
सांग्रेमाल' होँगो दोँगो समायना।
647
दा आंनि गोसोआव
जौसे खन्थाइ-
होँगो दोँगो सोदोब।
648
सिरि जाहाबनाय खोमसि
आफानि गुजुनाय,
आं सिरि मोनो।
649
दाउस्रिनि ओँखाम खनजानाय
गरफा गरफा,
बारहां बिरहां उसुं सेर सेर।
650
आखाय खबदोँ बिलाइ
नैबे बेलासि समाव,
बेन्दोँ दालाइफोरा मोसायो।
651
थाइजौ बिलाइ
आंनि खिरखियाव,
मिनिसुलु आंनि मोखांआव।
652
मोन्दांथिया बिरदोँ
हिमालयनि थिखिनिसिम,
आयनि फंसे राव गोदै।
653
जोमैखौ बिलिरो आं
बिनि मोदैखौ हुगारो,
बिलिर बिलिर लायो।
654
बियो समायना
मिनिनाय दं बेहा,
गोजोन्नाय इशारा होनाय।
655
नायहरो आं हरै-
बिरबायो दाउब' फालोसे,
फैलाव मायनि दुब्लियाव।
656
साना मिनिसुलु
आंनि मोखांआव मोदानो,
समायना नुयो मिथिँगानि बारि।
657
औवा बिलाइ
बिरबायो आंनि मोखांआव,
ज्रय ज्रय बारजोँ सिरियो।
658
सोमखोर माय फोथार
मुहियो आंनि गोसोखौ,
नायहरो फैलाव आङो बे बेलासियाव।
659
नागिरो बिफांनि दालाइयाव
रायदाव हरनाय दाउसिननि,
रैसुमै गोदै मुसुरनाय।
660
आंनि गामियाव
आंनि मिनिसुलुनाय
नैबे गोजोन सुदेम समाव।
661
माय बिलाइ मोसादोँ
स्राय स्राय बारआव,
दाउब' बिरदोँ जोमै सेराव।
662
सोमखोर मायनि दुब्लियाव
गोथां बिफांनि दालाइयाव,
गुफुर बिबार बारदोँ,
आय' बिबार नङा बियो-
दुखु गोसो दाउब'सो।
663
मिनिसुलु जोँमानि सोरां
आं जोँनि सिलायाव,
नायगोमो हरो मिनिसुलु मिनिसुलु।
664
बार जाना गोबा फैयो
नै अनजालि आंनि,
नोँखौ आं गोसो खाङो।
665
जोँमाया मिनिसुलु नायहरो
आंबो मिनिसुलु-
मेगनजोँ मेगन नैबे फुंआव
आं खुलुमो गोजोनै।
666
अनजालि- बेयो नोँनि खुदुमनाय?
नङा बेयो अखा मोफ्लामनायसो,
सैथो- बैसागुनि।
667
जोबोद समायना फुंआ
नायबाय थाथाव सोरांआव,
जोँमा नोँनि मिनिनायजोँ।
668
हाजोनि बोहैनाय दैसायाव
मेगननि मैखिखौ सुयो,
आं गोजांस्रिउ गोजोनो।
669
दाउसिनफोरा बाज्ल'बायदोँ
सुमफ्राइ फिथाइ खेबख्लामना,
गोसो होदोँ बिसोर जानायाव।
670
सुदेम बार खोलो खोलो
थांदोँ गुसु मोदोमाव,
समायना आंनि सानस्रिया।
671
बिफां-लाइफां समायना
नोँसोर आंखौ नायहर-
आं नोँसोरखौ नायहरदोँ।
672
गोजोन्नाय मोन्दोँ गोसोआव
फुंनि नैबे लामायाव,
लासै लासै आंनि आगान।
673
थमेन थमेन गलाबफोरा
मिनिसुलु मिनिसुलु मोसादोँ,
फुंनि बारजोँ जानजि सोमावदोँ।
674
गुफुर दावदै बिबारा
आंजोँ मिनियो,
आं नायगोमो नायो।
675
साननि सोरांजोँ नुनाय
अखोरांनि बिखायाव
गैया जोमै,
आय' आं नुयो नायहरना-
गुफुर अनसुलि बिखा।