जिख्लाबसे लाइजाम: 'रैसुमै'नो 886-924 Poem by Ronjoy Brahma

886
खुदुम आंनि मोदैयाव
आंखौ मिनि हो खुसियाव
नोँनि सेराव आंनि आर'ज,
जोबोद मोजां मोन्नायजोँ।
887
सानफ्रोमबो आं बारा बारा गियो
आं आंनि गोरबो होनानै,
मा लुफावफैयो अन्नाय?
नेना थायो अरायबो।
888
आङो हाथासि जायो
समायना सोदोब नोँ साजायनाय,
आङो गोमागोन नोँखौ मोनो
नाथाय आं हमथाना लादोँ।
889
आङो गले गले नायो
नोँनि सावगारि बिलिरना
लिरजायो खुसेर खुसेर बिलाइयाव
नोँ बुंनाय रैसुमै राव देँखो।
890
आं आंनि गोसोखौ सिफाया
आं नोँखौ जिउ सोलेर हास्थायो
नोँनो होनाय समायखौ लाना
आं अराय गोजोँ जोथोन लायो।
891
नोङो नारसोमनो नाङा सना
गुबुंले दै सानस्रियाव,
नोङो आंखौ गासोम नाङा
बेसेबा गोथौ हाब्रुआव;
गोथार जिउ सोलेर गोसो
नोँखौ आङो अनसायो गावनि।
892
आंनि देहा सोलेराव
गिदिँ गिदिँ गेलेफै रजे
आंखौ जंखायनाल' नोङो दादोन
जिउ जिउ नोँ आंनिनो
अनसुलि जानानै रजे;
आंनि अनजानाय बार-दै-अख्रां
हार्थखि गोजोँ गोजोन जाना।
893
आङो नायहरो रोमै रोमै
नोङो मिनिसुलु दावगालांनायसिम,
आङो गोसोखांहरो सना
जोँ जेराव लोगो मोनलायो
जोँ जेराव रायज्लायो खुसियै।
894
नोँनो आंनि गासैबो,
आंनि लेपे लेपे सानजावलि
आं गाबो रैसुमै सना
नोँखौ सान्ना गावनि फेलेँआव।
895
नोँनि महर मुस्रि गोसो थोनानै,
नोँनि आखल आखु मोजां मोननानै,
नोँनि गोसो मोननो नेनानै,
दङ आं सना जुलि नेनानै,
नोँखौनो गावनि साननानै।
896
नोँनि थाखाय गोसो होनानै,
अननायनि थफ्ला बोन्नानै,
नोँखौ गले गले नायनानै,
थाबाय आं नोँखौ नेनानै।
897
रैसुमै मायनाव जिउनि सना
गोरबो आंनि गोसो जिउमा,
नोँखौ आङो बावनो हाया
नोँ होनाय आंनि साया।
898
लामायाव मोखांजोँ मोखां
नोङो समायना आंनि मोकथां,
मेगन हुब्लिरो नंखाय सान्ना
नाथाय नोङो सैथो आंनि आयना;
नुयो आंनि अननाय सना।
899
अखा फ्रि फ्रि मेगनाव
गुसु सुदेम बिखायाव,
आंखौ जेन' नोङो बिलिरदोँ
नायहरो लामा फारसे-
नोँनि गोजोन देरायाव।
900
आङो नोँखौनो मोजां मोनना
आङो नोँखौनो जिउ होनना,
जोथोन लायो मिजिँआव,
गोसो सोलेर गियानाव।
901
नोँ आंनिनो जिउ रैसुमै
नोँ जिउ आंनिनो खारसुमै,
गलिना बोहैना दं बिखायाव,
सुदेम गोजोनग्लाय हांआव;
नोँ जिउ साया आंनि
नोँ मिजिँ गोरबो आंनि
नोँ आंनि रैसुमै।नोँ आंनि।
902
एसेबां थौहाबबाय आंनि
- मोजां मोन्नाया
बांसिन जोँबाय गोफार गोसोआ,
नोँखौ बहा नागारनो आंलाइ?
जिउ थैनाय थांनाय नोँलाइ।
903
खावलायाव बोहैबोनाय मेगन मोदैखौ
होबथानो हाया जायो गोसोखौ,
नोँखौ मोजां मोनहाबनानै
जिउ गैयैबादि आङो मेँनानै
- नोँखौनो नागिरो रैसुमै, नोँखौनो।
904
बेवनो आंनि गोरबोआवनो
नोँनि महर राव फावनो,
गेलेयो जिउनि सायखं सायखं
नोँनो आंनि लामायावनो।
905
सैथोयै आं जायखौ मोजां मोनो
जेब्लाबो आं जायखौ हास्थायो
नोँ, नोँ, नोँनो रैसुमै-
नोँनो गोरबो जिउ मिजिँ आंनि।
906
नागिर नागिर नागिरनो आं
नोँनि गोरबो मोननो सना
हास्थाय हास्थायैनो नोँखौ सना
गोथार आंनि गोरबो जोँसिनलांदोँ
जिउ मिजिँ आंनि थौसिन लांदोँ।
907
नोँनि गावदां मोखांनि मिनिनायखौ
नोँनि गुसुथिनि लाजिनायखौ
आङो समायनाय नुयो
आङो मुहिनाय मोनो
समायना जिउआव रोजाबगौ आं
मिजिँआव गोजोँ नुहरो आं।
908
नोँखौ मोजां मोनबाय जेब्ला
नोँखौ गावनि सानथारबाय आं,
साया-माया नोँनो आंनि
थाबायनाय जनाय रंजानाय;
जेब्ला नोँ आंनि सेराव
नोँनो आंनि गासैबो लोगोआव।
909
नुयो नुयो नोँखौ सेराव
मिनिसुलु मिनिसुलु मोखांआव
रोजाबनो लाबाय मेथाइखौ
गोरबोआव गोरबोनि देँखोजोँ
जिउनि गोरोबनाय खबाम सुजुना आङो;
नोँ आंनि, नोँ आंनि जिउनि।
910
गोदान गोदानसिन मोनबाय आं
नोँखौ गोसो थौहाबनानै,
गोजोँ गोजोँसिन गोफारसिन
मोनबाय आंनि गोरबोखौ।
911
बेसेबा समनिफ्राय दिनैसिम
दिनैबो समाय फैसालिसिम-
रुगुं गैया नोँखौ मोजां मोन्नाय,
सिमा गैया नोँखौ हास्थायनाय।
912
गोसोआव दर्खँआव
मेगनाव मोखांआव
नुयो समायना साया माया
लामायाव हाबायाव खुसियाव;
नोँ रैसुमै जिउ साया।
913
नागारनायनि मिजिँ गैया
नेवसिनायनिबो सिमां गैया,
रैसुमै गोथौयै गोख्रोँङै
नोँखौ आङो हास्थायोल'
जिउ नोँ आंनिखा लोगोसेल'।
914
समायना जोँखोल माखोल
रिथि रिथि निहोरनि जिरायनाय,
जोबोद गोख्रै आङो जोथ्रोद लाङो-
नोङो मिनिसुलु नायहरो-
सोमखोर दुब्लिनि बिखायाव।
915
आङो गोरायै हमथायो
लाजिनाय जेन' आंदि,
जोबोद जंखायनाय खुसियै
अखोरांनि बिबार आंनि साथायाव
आङो नोँखौनो नुयो साया माया।
916
जोबोद खुसियाव मोसाबोनाय
बिमानि दैखौ दाहाराव आं नुयो
हाजोनिफ्राय गोहोगोरा बोहैनाय;
नोङो गोजाव बोयो आंनि बिखायाव।
917
गांगा थफा अखानि
रंजा फैयो सिलायाव
आङो मिनिसुलु जायो समायना
गोगो सुदेम मेगनाव
नोङो साया माया मोसायो।
918
फोरमायजोबनो हायै रावजोँ
गोसोआव सिरियैनो गेलेयो,
जादु गोनां सोदोब नोँनि
आंखौ हायना सारफावो सना।
919
नुहरो आं जोमै बिरबायनाय
गल' नायहरो दाउसिन फालोसे
हाजो सेर सेर समायना
जोङो सानैजोँ रुजु रुमु।
920
बबेवमोन आंनि हाथासि नाजानाया
दाबो दं जोँनानै मिजिँआव
नायहरो हुरागासे नोजोरजोँ-
दं थाबाय थागोन जोँनानै।
921
थिरिद थिरिद गोमोथिँ खुसेँग्रा
खोमायाव रिङो गोगोमै
ग्रुम हुरागासे अखा खोरोमो,
अब्लाबो, अब्लाबो रैसुमै-
नोँनि आङो बाहेरा जानो हाया।
922
बावनो हाया गोसो सिंनि
थरायना लाइमोनस्रि सावगारि,
आं नोँनि थिनानै दोन्नाय;
थागोन बिखा बिख्लो सना जानानै।
923
मिनिखैरो मिनिसुलु
आंखौ नोँ नायहरबोला
मेगनाव फ्लाम-
अखा मोफ्लामो-
रैसुमै... नोँ आंनि जिउनि।
924
हाथाइ रिजि खिथिनानै
जंखाय हरबोला....
दुलाबाथा गोसोआ फोर बिरलाङो-
आय' सना थाथिर हालिया
नोँखौनो गोसो खांनानै-
नोँ आंनि रैसुमै।नोँ आंनि।