Aur Kami Thi..? Poem by M. Asim Nehal

Ulfat ka diya jala kar chod aaye hum
Us bazm mein jahan pyar ki kami thi.

Thy sukhanwar bahut uss bazm-e-duniya mein,
Jo thi wahan per woh insaan ki kami thi.

Khoobsoorti toh lut rahi thi zarre zarre mein,
Ankhen mili thi lekin deedar ki kami thi.

Roya bahut hoon mai bhi tere shab-e-gham mein,
Khoon-e-jigar mila tou ansuon ki kami thi.

Tarkash me mere teer kam nahi thy "Ashi",
Dost tou mile hain dushmano ki kami thi.