Da Ama An Ina (My Father & Mother) Poem by MELVIN BANGGOLLAY

DA AMA KEN INAMelvin Banggollay

Awan maka-asping iti ayat da ama ken ina
Kadakami nga bunga ti ayan ayat da
Ta uray no ania kinarigat iti nasaparan da
Trabaho da a trabaho uray pay masakit da.

Pudno unay nga ti kakaisuna nga anges da
Indaton da kadakami nga kameng iti pamilya
Nga awanan iti ania man pannaginkukuna
Ta dida ininda ania man a bunga’t sakripisyo da.

Ni tatang ko nagaget unay nga mangisursuro
No bakasyon mapan da diay uma ken nanang ko
Agmalmalem da uray no adda man iti tudo
Nga agdalus tapno adda kaninmi nga agpayso.

Ket idi inkamin nga aguskwela iti adayo
Balun mi ti napnuwan rag-o nga sursuro
Ta kanayon nga ibagbaga daydi tatang ko
Adal laeng ti innak maipatawid kadakayo.

Ni nanang no man agtagtagibalay a maymaysa
Naanus unay nga agtaraken kadakam a padapada
Lalo idi kaubingmi no adda sakit iti tungal maysa
Agpuyat da ket awan pay mangeg ko a reklamo da.

Awanen ti maka-arpat pay ti ayat iti ama ken ina
ta amin aramiden da kadagiti amin nga anak da
Ket uray inton kaanuman diak maisukat ida
Da gameng da nga awan patingat kinarimat da.

Kaasi ni Apo baiten ti ado nga sakripisyo
Dagiti naanus ken mapaguadan a nagannak ko
Naturpos mi amin ti bukod mi nga kur-kurso
Nga isu’t kapatgan a tawid dagiti nagannak ko.

Napnuwan isem idi daydi naguwapo nga tatang ko
Idi inna ikabil ti tugak idi nalpas ko ti kinakumersyo
Nga isu ita ti pagminasak met a mangitandudo
Iti pagsay-atan met dagiti babassit pay nga anak ko.

Dagiti adding ko sipud ta siak iti nauna a bunga da
Uppat ti nakalpas iti kinamistra ken maysa ti abugasya
Ngem jay buridek mi ay apo isu ti black sheep a kunada
Ta ngay nagbayangudaw idi nagkolehiyo diay Manila.

Pudno a naladingit iti ipapanaw dayti tatang ko
Ta napigsa pay laeng kalpasan na nga agretiro
Ket amok nga nadalus unay nga nagserbisyo
Iti las-od ti trenta’y singko a tawen a mangisursuro.

Ni Nanang ko laingen ti nabati ita nga mangitandudo
Nga agserbi nga lawag kadakam tapno agsakripisyo
Para iti masakbayan pam-pamilya mi iti amin a tiempo
Ket uray baketen agawir pay lang a siririgta kadagiti apo.



Ket no man maiyanakak pay ditoy nakaikariyan a daga
Dawat ko ken Dios Ama ti dakulap met lang da Ama ken Ina
Iniak manen maibislibisling ta amok a diak to maiwawa
Iti pan-nagayat a napnuwan sudi nga dinto agpatingga.

Oh Ama a Kangatuwan, ubog ti biag ditoy daga
Bendisyonam ken paraburam ti kararuwa ni ama
Iti pammakawan mo ta mairanud dita kinagrasya
Ken ni Nanang ko ti kinasalun-at ken kinapigsa.