Inqenerha Poem by NtsimbamaZizi Sibongile Potelwa

Nqenerhandini vuka kusile;
Yint’ ezwabulukayo ilulovane
Izamle umzamlo wobuvila
Linqenerha lo mntwana

Umthuma okuncinanana;
Sele uva ngenkwin’ endengendenge
Int’ esindwa nazinyawo zayo
Isantya lunwabu gqibi

Ungcathu ngemikhon’ urheme
Ululwantwentwe ngesis’ uphopho
Sisikhuthali xa kuginywa ukumala
Sisityhifilili senqenerha emsebenzini

Ngekh’ abenje fuz’ int’ ephilayo;
Lichostil’ elingaphakamis’ izihlahla
Thetha ngembiza sele etsibel’ entla
Thetha ngomsebenzi sel’ ebik’ ihlaba

Ungabinaphupha lokuba linqenerha;
Awuyi kuphumelela ebomini nje tu
Wophila ngolal’ imini nobusuku;
Wod’ uy’ olala kobandayo ulinqenerha