Kwakufik'Iinkumbulo Poem by Lusapho Gladstone Nyembezi

Zintaba ndini nani zinduli;
nindisithel'isithandwa sam!
Ndalo, xesha, mgama:
ndindinqand'ukuba ndingabi
nakubon'othandiweyo wam!
Niva njani ke xa ndisifa ziinkumbulo?
Nithanda njani na xa ndinkinankineka
ngumvandedwa?
Iluyolo kuni loo nto?
Phofu nenz'umsebenzi wen'anonanga
nto! ! !
Ndisuke ndigqumele ngaphakathi
ndakumkhumbula; ndixel'inkunz'enja
igragramel'enye!
Ndifane nerhamncw'elihlasel'ixhoba!
Kuphele mpela ukonwaba ndakumcinga!
Int'embi ibe kukuswel'iimpiko;
kungenjalo ngendindiza ndiye apho
singakhoyo esam'isithandwa!
Ise ifane nephupha eyokuzibona
sendincume ndodwa ngenxa
yenkumbulo!
Ndicinge nje oku koncumo lwakhe!
Ndinga ndiyamva esithi 'baby wam'
ebobotheka luncumo phofu!
Mawethu ndingathini n'ukungancumi xa
ndikhumbul'oyichulumancisayo intliziyo
yam ngolu hlobo?
Ubunzwakazi beentombi eziliwaka
abundigungqisi ndakucinga otyunjiweyo
wam!
Ukusulungeka kolusu lweentombi
zeentlang'akundishenxisi ekuthandeni
othandiweyo wam!
Ungafung'uthi andibambi kakuhle
nalaph'entloko xa unokufika ndifikelwe
kukumkhumbula!
Kant'uthando lunjani?
Kant'uthando lunje?