Mahalin Natin Ang Sariling Wika Poem by Bernard F. Asuncion

Mahalin natin ang sariling wika,
Huwag natin itong ipagpapalit;
Ito'y kayamaman ng ating bayan,
Biyaya ng Diyos mula sa langit.

Ang wikang Filipino ay dakila,
Ginamit ito ng mga bayani
Na lumaban sa mga mananakop
Upang makalaya sa pagka-api.

Kahit tayo'y nasa ibayong dagat,
Itaguyod ang wikang Filipino;
Dala nito ang pambansang kultura,
Na lumalaganap sa buong mundo.

Tumitibay ang pagkakapatiran
Ng lahing Filipino bilang bansa;
Pangungusap na galing sa isipan,
Mula sa puso ang pagsasalita.

Sikapin nating ganap na tumugon
Sa isip, sa salita, at sa gawa;
Mula ngayon hanggang sa katapusan,
Mahalin natin ang sariling wika.