Me And The Devil. Poem by PAUL COLVIN

Me And The Devil.



The flames leapt high an’ jigged aroon
Tae the screechin’ sound o’ Satan’s tune
They fiercely jumped frae North tae South
An’ belched up frae the Devil’s mouth.
The wind it blew an’ flames they flew
A’ fiery red wi’ streaks o’ blue,
Furst went left an’ then went right
Wi’ Satan’s face a’ burnin’ bright.
Up they shot an’ fired wide
Sae frightened noo, ah want tae hide,
The flames had turned frae West tae East
An’ in the middle stood the Beast!
The Beast o’ Satan, the Devil himsel’
Rose up through fiery flames frae Hell
He roared an’ set the night ablaze,
His flamin’ eyes on me did gaze.
Whit’s the De’il want wi’ me?
Ah wisnae gonny wait tae see!
Ah quickly turned an’ ran sae fast
An’ a’ mah life before me flashed.
An’ fizzin’ roon this tiny heid
Was the thought that Satan wants me deid!
Ah belted ower a field o’ green
An’ jumped the fences in between
Ah turned aroon’ an’ a’ could see
Wiz the durty Beast still chasin’ me.
The field o’ green wiz noo bright rid
The tree burnt oot where ah wance hid,
Ah’m sweatin’ blood an’ screamin’ oot
An’ hear mah echoes roonaboot.
There’s naeb’dy here tae hear mah plea
Jist the De’il chasin’ efter me.
Ah felt his flames noo lick mah back,
Ah freeze an’ stoap deid in mah tracks
An’ let oot wan almighty yell
Surroundin’ me, the fires o’ Hell!
Ah cannae move mah legs or feet
Ahm terrified an’ start tae greet.
But jist when Satan comes fur me
Ma wakes me up an’ sets me free!

COMMENTS OF THE POEM
READ THIS POEM IN OTHER LANGUAGES
Close
Error Success