سەڵتێکی عاشق Poem by Peshawa Kakayi

سەڵتم،
هەمیشە و بۆ هەتاهه‌تايه‌ عاشقم.
خەیاڵم لە شوێنە دوورەکانى واقیعە و
کە بیگەمێ غەم لەوێیە،
غەم یانى عیشقى ئەبەدى.
چەند خۆشە لە قووڵاییى غەمدا
نەفەسى مەرگم دەتەقێ.
چەند خۆشە لە چۆڵاییی کێوەکانەوە
بێدەنگ بێدەنگ تەماشاى شاخەکان دەکەم و
هەناسەى ڕەشیان هەڵدەمژم.
ئەوەندەش غەمناک نیم،
بەڵام لەنێو غەمدا هەموو شتەکان دەبینم و دەبزوێت.
چ خەیاڵێکە بڵێم عیشق غەم نییە،
نا، دەبێ غەمەکانم هەڵمژمەوە،
تا بزانم غەم چییە؟

=====
٢٠٠٨
شیعر: سەڵتێکی عاشق
پێشەوا کاکەیی

لە کتێبی: پاشماوەی هەناسەکان