کەعبەی دڵ Poem by Peshawa Kakayi

تۆ بانگى عیشقت دا،
بۆیە منیش بە پێخاوسى
دەستنوێژم هەڵگرت و
هاتمە به‌رده‌م بەردە ڕەشەکەى کەعبەى دڵت.
تا لەسەر بەرماڵى سینەت
دوو ڕکات نوێژ بخوێنم،
ئەوەندە گريام،
فرمێسکەکانم بوونه‌ ده‌نكى تەسبێح،
تا خەتمى عیشقيان پێ بکەم.
گەر خۆشت فەرمووت
بڕۆ دەرەوە لە تەکیەى عیشقم،
دەڕۆم،
فرمێسکەکانم دەکەمە بەرد و
ڕەجمت دەکەم،
هەتا شۆڕشێکى عیشق بەرپا دەکەم!

======
٢٠٠٨
شیعر: کەعبەی دڵ
پێشەوا کاکەیی
لە کتێبی: پاشماوەی هەناسەکان