Telugu Poem మళ్ళీ ఓ సారి తడిసిపోనీ... Poem by Srininivas Reddy Paaruvella

మాటలు కలుపుకున్నచోట
మనసులు కలుసుకున్నచోట
ప్రేమను పంచుకున్నచోట
మళ్ళీ మళ్ళీ తడిసిపోవాలనిపిస్తుంటది

దూరమెంత నడిచినా
భారమంతా విడిచినా
కాలమెంత కరిగినా
నీ తలపే తోడొస్తుంటది
నెలవంకై నాతో నడుస్తుంటది

ఇన్ని రోజులు నడిచిన దారి వెంబటి
మనం నాటితే మొలకెత్తిన అడుగులన్నీ
చల్లని పున్నమిలా తొంగి చూస్తుంటాయి
వెచ్చని వెన్నెలలా అలుముకుంటాయి

సఖీ! నేననే మనిషెలాగున్నా మనసులేమున్నా
ఆత్మలు పవిత్రంగానే మిగిలుంటాయి
మైలపడ్డ దేహాలు మట్టిలో శుభ్రమవుతుంటాయి.

అందుకే మళ్ళీ ఓ సారి తడిసిపోనీ...
ఇగిరిపోయేదాకా, ఇగిరి కురిసిపోయేదాకా.

పారువెల్ల
16-10-2016.