Thamarakkozhi Poem by Suresh Kumar EK

ഒരു താമരക്കോഴിയായ് മാറി
നിന്റെ ഇതളുകളിലെനിക്ക്
പാഞ്ഞു നടക്കണമായിരുന്നു.

മൊട്ടുകളുടെ ഊഷ്മളതയിൽ നിന്നും
ജലത്തിന്റെ അഗാധതകളിലേക്ക്
ഊളിയിട്ടിറങ്ങണമായിരുന്നു.

താഴെ മീനുകൾ പുളച്ചു മറിയുന്നു
നക്ഷത്രങ്ങളെമ്പാടും പ്രതിഫലിക്കുന്നു.

ഈ മനോഹര തടാകത്തിനിപ്പോൾ
നിലാവിന്റെ തണുത്ത നീല നിറമാണ്
ആമ്പലിന്റെ മദിപ്പിക്കുന്ന ഗന്ധമാണ്
നിന്നെപ്പോലെ മാദകസൗന്ദര്യമാണ്.

ഓ പ്രിയേ എന്നിലേക്ക് വരൂ വേഗം
നിന്റെ മൃദുപരാഗങ്ങളിൽ ഉമ്മ വെച്ചു
ഓടിയൊളിച്ചു കളിക്കണമെന്നുണ്ട്

പക്ഷെ പായലുകൾക്ക് താഴെയായ്
ചതുപ്പിലൊളിച്ചു കഴിയുന്നു മുതലകൾ.
അതിനാൽ ഞാനീ പൊന്തക്കാട്ടിൽ
കുടുങ്ങിത്തടവിലാവുന്നൂ പ്രിയേ.