Zinyarimwe Zai Regondo Poem by Wensy Mbirimi

Ko zvaizibwa nani
Nhaiwe Jerina naMukwariwa
Rungamai dangwe hupenyu hwovavira
Kumusiya ari zinyarimwe
Wave karikoga mugarandega

Vedzimwe dzimba voti tsvatu waro
Woitwa mukomberanwa garira nokokoko
Zvarwadza kuti mukoma zamu musina kusiyidzana
Povogara matare mazano igamuchidzanwa
Rako idare roumwe wozvibvunza nokupindura

Waritarira pfumo Jena
Worivhika sei rakandwa newedzinza
Wemumba akatungamira
Remuvengi pfumo richikure
Waunoseva naye okugara matunduru
Woiridza mhere kudana Chapfuta arere Mutunduru
Ndorozvwa newandakabvisira vatorwa variyo

Nhaiwe dzashe ndoipunyuka Seiko iyi
Nenyasha havachina hondo yakurirwa
Iko ndaisvikepiko rume rimwe churu harikombi
Ndave muranda wenyu
Pano pasi tongai vepasi vondipupurira

Ini zinyarimwe zai regondo
Mandiita kafiramberi
Chikokotedzai kune vakatungamira ndotevera
Jerina naMukwariwa
Rungamai ovuyeko
Nani pane raramo muvavengi
Vamasare muchafa pamunoda
Jena vofuratira