र'च ड'चन Poem by Ronjoy Brahma

साउट-एमटन मोखां जानानै निउयर्क
टाइटानिकआ सानस्रिदोँ सा आटलान्टिक
आय' सोरां गैयै खोमसियाव
गोदोयो लैथोनि गोरबोआव
आंनि रजेया गोदोयो गुसुआव
-
1,500 बां बोराय-बुरै
सेंग्रा-सिख्ला गथ'-गथाय
मोगा-मोगि थैलाङो
बेनो गेजेराव आंनि रजेयाबो
-
अनजालु नोँखौ नागिरबायो आं
दिनै नागिरबाबो मोनलिया
खनफ्रोम हरनि सिमांआवल'
नोँखौ आं नुयो
हमथानो हालिया मोन्दाङो
अरायनि आनज्रायलांबाय नोँदि
-
जोबोद गोजान गोथौसिम
आं दाबो नुयो नोँखौ
साया-माया हर सानावनो
नोङो गेलेफैयो आंजोँ दाबो
-
गोजान खाथि जेरावबो
आंनि गोसोआ नोँजोँनो थाफायो
खेबसे दरजा बोलाफैयो
नोङो आंनि गोरबोआवनो
नोङो आंनि सावगारि बोयो दाबो
-
मोजां मोन्नाया बिलिरो
जोबथा आरो जिउ थासान्दि
माब्लाबाबो गोमालांलिया बेयो
नोँनि गासैबो आंजोँनो थाफायो
-
रमान्टिक जोँनि अनलायनायखौ
साबसिनै आङो हमथाथारो
आंनि जिउआव थालांबाय नोङो
नै बेयाव आंनि गोरबोआवनो
अराय थालांसिगोन जिउमायावनो
-
नोङो आंजोँ
नोङो गोजानाव नङा
मिथिगौ-
थालांसिगोन आंनि जिउआव
-
नोङो आंखौ गोबा
आं नोँखौ गोबागोन
जोँ सानैजोँनो थागोन सना
मोकथांआ जालाखार सिमांआवनो
-
दिनैबो आटलान्टिक लैथोमाया गोमोयो
जोँनि रमान्टिकखौ
खोमसिया बाखोनायनाङो
जोँनि सैथोथिखौ
आय' मुलुगा सोमो नाङो
जोँनि अनलायनायखौ।