बेबादि आं लिरलिया Poem by Ronjoy Brahma

फरायथावै
नोँनि आंनि मोखां
जोँ सानैनि बिदिन्था
-
आंनि गाबनायानो नोँनाव नांबाय
नोँखौ आंदिनै बुरखायनो हालिया
बेनिखायनो
बेबादि आं लिरलिया
-
जाय नोँखौ
बेसेबांबा सोगाबो
आंनि मिनिस्लुनाय फांथेयो
-
गाबै गाबै
जोँनि दिनै सानैजोँ गोदोयो
नोँनि आंनिनो मोदैयाव
जोँ सानैजोँनो गोजावो
-
हिमालयनि आफां आफां
दैमा लैथोनि सेर सेर
जोँ बेसेबा खुसिमोन
आरो बेसेबा गोजोनमोन
-
आंनि गाबनायाव
नोँ खुसि खालामनायमोनब्ला
एबा मोदैखौ हुगारनायमोनब्ला-
-
आं गाबनायबादिनो
नोँ मिनियोब्ला
नोँ गाबनाय जानाय नङामोन
आं खुसि जागौमोन
-
नोँ आरो आं
जोँ सानैजोँ-
बेसे खुसि जागौमोन
गंसे अख्रांनि सिङाव