आंनि मेगन नोँनि मोखां आरो गुसुथि Poem by Ronjoy Brahma

लैथो अख्रांमा दावबायग्रा आंनि मेगना
फैसालि सिमानि अनजिमा नागिरनानै
साननि सोरां रोदायाव गाखोग्रा,
खोमसि अख्रांनि हाथर्खि फोजोँग्रा,
आरो आंनि मेगना अखाफोरबादि
बुहुमनि आलारि फोजोँग्रा आखाय।
मेगनखौ सिनायबाय नोँ मिनिस्लुनायजोँ
सोलायबाय आयनाजोँ गावनि मोखांखौ
आरो साननि सोरां महर लानानै
अम्बासिया थाखोमा हैबाय बहाबा
मोदै सोबनानै आबै-आबौआ उन्दुनाय हाखराव।
थगायनो-फोलानो जेबो बाथ्रायानो गैया
नोँनि गुसुथिया दिनै रोजाबो
खबामनि आरोबाव खबाम लानानै,
दाउसिनफोरा बेखौनो मोजां मोनो बेसेबा
बिसोर रोजाबनो नाजायो।
मोखांखौल' नोजोर होआखै आङो
नोँनि गुसुथियादि बेसेबा खुदुमथाव,
मादि समायना हास्थायो आरोबावदि-
नोँनि गोसो दावबायग्रा आंनि मेगना!
नोँनि मोखां आरो गुसुथिनि सायावनो
आंनि मेगना थांनानै थायो अरायसम
नोँनि मोखांनि सायावनो सुजुदोँ जिउखौ
आंनि लुखुमोर जायै सोरांनि सिमां।