थास' बिलाइखौ खर'आव थिखोना
जोँ फरायसालियाव थाङोमोन दैज्लां फैब्ला,
अख्राङा फाग्ला मैदेरबादि जोमैनि सुन्दायजोँ
दैहुयै दैहु जेन'बा दै लुफावहरो
बिमाजोँ थुखैजानो गिनायबादि खारोमोन जोँ।
समनि बोहैथिया गावनि गाबजोँ रेगा बोलाङो,
दिनै आं हान्थिदोँ मोनसे जिउनिफ्राइ
गुबुन मोनसे गोदान जिउनि फारसे
गोदान गोरबोनि आखायजोँ आलपना सोरजिनो।
लेखानि हांखोखौ खेबसे नारखावना नायोब्ला नुयो
बुहुमा बेसे गुवार रिउ रिउ
अनजालि अन्नाय आबुं दद्र मेगनाव
बेसेबांदि दिदोम सोरांनि जायख्लंआ।
दाउसिनफोरा आंनि मोनफ्रोम बुब्लियाव रोजाबो
बिदिन्थानि सना फिथर खन्थुमनानै,
अनजालिनि आगर एरग्रा आखाया उसुखुथु जायो
जुलिनि सिमां बोथोरनि गारां फोजौनायाव।
खन्थाइ लिरनो सानो आं
थोबफा थोबफा नोँनि मिनिनायखौ,
आगर गोनां गावनि गोथार आफाजोँ
आलपना सोरजिनो नोँ बैसोमुथिनि बिखायाव।
This poem has not been translated into any other language yet.
I would like to translate this poem