नोँनो, नोँनोजोब गासैबो Poem by Ronjoy Brahma

लामायाव गारबोनाय बेसेबा जाथाय
जाथायनि आरोबाव फिसा फिसा जाथाय
अनजिमा गैयै आगर मेगननि फेखन
राव गैया नोँहा फंसे थेवबो
नोँनि गोसोनि बाथ्राखौ आं बुजियो।
आं बायदिसिना सानबाय थायो मानोना
आं नोँखौ जोबोद गोसोथोखोमायो जेहेथु
नाथाय गावनि बिखाया गावलांब्लाबो-
हे फोरमायना लानो हाथारनाय नङा।
सिरि सिरि हास्थायखुमानो गोसोजोँ गोसो
सिमांआव गलेयै लोगो हमलायनो दैसा नङाबा
लामा दथखा बिफां सायायाव सिरि सिरि
आंहा मोन्थाइ दं नोँनि आगाननि सायाव
नङा नोँनि मिनिनाय आरो लाजिनायनि सायाव।
सोर्गोनि बाजोनाखौ नाङा नोँनि राव खोनाब्ला
दुब्रि बिलाइनि बार नाङा आरो
जेबो बिफां सायख्लुमखौनो नाङा आंनो
मानोना नोँनो, नोँनो गासैबो आंनि।
नोँखौ हास्थायनाय एबा सानखोमानाय
आरोबाव सिं सिं माबा-माबि मानोना
आंखौ गोसोथोखोमाग्रा रावबो गैया होन्नानै आं सानो।